1Ciafangin Bawipa in Moses hnenah, 2“Israel mite hnenah Baal Zephon ralkhat ai tipui le Mikdol laklawh ai Pi Hahirot ah caam tuu-ih. Tipui hiang ah caam tuh i si. 3Ziangmanti fangin Pharaoh in, ‘Israel mite khiah lamvai lio ai nelrawn songah taang lio i hang.’ti tuh le 4Ciafangin kai in Pharaoh thin khiah ruh ruai tuh ai amahte khiah hnawh tuh i. Ciafangin Pharaoh manin le a raalkapte manin i hming i thang tuh ai ciafangin Izip mite in kaimah khiah Bawipa i ti i ling tuh i.”ti in rel i. Anite khai ciatih bangin bawn i.
5Izip kumpibawipa khiah Israel mite tlan sio i ti in rel fangin Pharaoh le a hnenumte thin khiah thleng ai, “Ziangman hetih bangin bawn ai Israel mite khiah kin ceng in hmang lo ai luat ruai i pa sing?”ti in ti i. 6Ciamanin Pharoah khai a siphuh leng khiah lang ai a minungte kawmin feh i. 7Cen siphuh leng a pha ber berzaruk le Izip ram songai siphuh leng hmuah khai captain pakhat ten thawn fehpui i. 8Bawipa in Izip kumpibawi Pharaoh thin khiah ruh ruai ai Pharaoh in Israel mite khiah hnawh i. Israel mite khai raalpha ngai in feh i. 9Ciamanin Izip mite in Israel mite khiah siphuh le Pharaoh siphuh leng le a raalkapte kawmin hnawh ai Baal Zephon ralkhat Pi Hahirot hiang ai tipui hiang ah man i.
10Pharaoh khai a nong ah hleng fangin Israel mite khai khuahlir le Izipte ai amahte hnawh khiah hmu fangin anite khai lau rauh ai Israel mite khai Bawipa khiah ko i. 11Ciafangin amahte in Moses hnenah, “Izip ramah hlankua um lo manin nelrawn songah kin thi tuhin kin feh pui i sim? Zaimanin Izip ram in kin suah ngian i si? 12Izip ramah kin um teng in, ‘Hnai kin hnok mah. Izip mite ceng in um hlen nga ing.’ti in na rel i ta lo ing? Ziangmanti fangin nelrawn songah thi tahin Izip mite ceng in um pha sawn napui i ta.”ti in ti i. 13Ciafangin Moses in, “Lau mah ih. Dapthen in ding tu i lai Bawipa ai ning ca ai bawn tuhhnak Bawipa luangtlan hnak khiah sik tuu-ih. Ziangmanti fangin tunnia ai ning hmuhnak Izip mite khiah zaikom in khai hmu leh tuh lo i hang i si. 14Bawipa in ning ca in ning tawng sah tuh manin dapthen in um tuu-ih.”ti in rel i.
15Ciafangin Bawipa in Moses hnenah, “Zaimanin i ko i si? Israel mite khiah hmailam ah feh ruai tu. 16Na tokrolh khiah dang tulai tipui vum lamah kawk tulai tipui khiah khan tu. 17Cen Izip mite thin khiah ruh ruai ngangkhaw amahte in Israel mite khiah hnawh tuh i. Ciafangin Pharaoh le a raalkap te le a siphuh lengte le a siphuhte manin i hming i thang tuh i. 18Pharaoh le a siphuh lengte le a siphuhte manin hming i thang fangin, Izip mite in kaimah khiah Bawipa i ti ling tuh i.” ti in rel i.
19Ciafangin Israel mite hmai ai feh tu Pathian Vancung mi khiah Israel mite hnualam ah thawn ai amahte hmai ah fehhnak meiro pui khai amahte hnua ah ding vung i. 20Cia meiro pui khiah Israelte le Izip mite laklawh ah um i. Ciatihin a khattate hnenah tu meiro le khuathim cang ai a khattate hnenah tu zanlai ah khuavar cang ai zan khuavar anite khiah pakhat le pakhat khai nong dun lo i. 21Ciafangin Moses khai a kut khiah tipui vum lamah kawk ai Bawipa in cia zanah zan khuavar nisuak hmun lam in khuahu tlung ruai le tipui khiah khan ai tipui khiah lairo cang lio i.
22Ciafangin Israel mite khai tipui songai lairo vumin vak ai a hiang veve ah ti khiah bangkhang bang in um i. 23Ciafangin Izip mite khai Pharoah siphuh le siphuh leng le siphuh totute kawmin a veksenin Israel mite khiah tipui songah hnawh i. 24Zing khuavar hlanah Bawipa in meipual pui le meiro pui songin Izip mite khiah sik ai Izip raalkap te khiah am ruai berh i. 25Bawipa in siphuh leng khiah tlok ruai sah berh manin anite khai a har rauhin siphuh leng khiah mawng i. Ciafangin Izip mite in, “Israel mite hnenin tlan nga sing. Ziangmanti fangin Bawipa in Israel mite ca in Izip mite tawng sah i.”ti in ti i.
26Ciafangin Bawipa in Moses hnen ah, “Na kut khiah tipui vum lamah kawk leh tulai Izip mite le amahte siphuh leng le siphuh totu mite vumah ti khiah luang leh tu seh.”ti in ti i. 27Ciafangin Moses in a kut khiah tipui vum lamah kawk i. Zing khuavar fangin tipui khai amah kel in let leh ai Izip mite khai tlan i. Ciatih bangin Bawipa in Izip mite khiah ti in lan ruai berh i. 28Ti khai let leh ai siphuh leng le siphuh totu te le Pharaoh raalkapte khiah cum berh ai pakhat bang khai taang nawn lo i. 29Ikhalselai Israel mite tu tipui songai lairo vumin vak ai tipui khiah amahte kiahhan le kekeh lamah bangkhang bangin um i.
30Ciamanin cia nia ah Bawipa in Israel mite khiah Izip mite kut songin o ai Israel mite in Izip mite khiah varkamah a thi in hmu i. 31Ciatih bangin Izip ramah ah Bawipa bawn hnak a lian ngai khiah Israel mite in hmu i. Ciamanin Israel mite in Bawipa khiah kih ai Bawipa le a hnenum Moses khiah sang i.