Passover Khelhnak Puai
1Ciafangin Bawipa in Izip ramah Moses le Aaron hnenah, 2“He hla khiah ning panhnak hla hmasaber i tuh i. Ning kum panhnak hla hmasaber i tuh i. 3Cen Israel mite hmuahhmuah hnenah, ‘He hla ni haa nia fangin aisu hmuahin amahte innkua ca tuhin tuu faniu pakhat khiah innkua pakhat ca tenin lang tu seh. 4Cen innkua tlawm naite in a ompui thawn a innkua songai minung zah in hlawm kawm tu seh. Amahte kul zah in tuu niu khiah hmang tu seh. 5Cen ning tuu fa khiah kum khat tar le a cang le pot nai lo ma nai lo i tu seh. Cen tuu fa le me fa khai i thai i. 6Cia tuu fa khiah cia hla ni hlaili tian khawi tuhai cia zanlam khuathim fangin ning veksenin ro tuh i si. 7Cen cia tuu thi thawn ning ei hmun inn dawngkham khuam khatlam le khatlam le dawngkham vum khiah mat tuh i si. 8Cen cia tuu sa khiah cia zan songah ei tuh i si. Mei thawn em tuhai col tel lo sangreu le hnuhhing kha thawn ei tuh i si. 9A sal in ei mah ih. Ti thawn khai suang mah ih. Ikhalselai a lu le a ke le a songai a rilte kawmin mei thawn em tuh i si. 10Cen cia sa khiah a thangha tian taang ruai tuh lo i si. A thangha tian ai taanghnak sa khiah mei thawn tai tuh i si. 11Cen hetih bangin ei tuh i si: Ning el ah elpen pencia in ning ke ah kedawl dawl tuh cia i si. Cen ning kut ah ning tokrolh sin tuh cia i si. A hnawraw kongin ei tuh i si. Ziangmanti fangin Bawipa Passover Khelhnak Puai i. 12Ziangmanti fangin cia zanah Izip ram a veksen songah kaimah khiah vak tuh ai a te hmasaber minung le sumhnam hmuah rek tuh ing. Cen Izip te biahnak pathiante khai cawh tuh ing. Kaimah khiah Bawipa ing. 13Cen cia thi khiah ning umhmun inn caang ah hnikhnaihhnak i tuh i. Cia thi hmu fangin ning khel tuh ing. Ciafangin Izip mite i rek fangin cia pul in ning hnawmcan tuh lo i. 14Ciamanin cia nia khiah hih kul tuh ngio i si. Ning san veksenin cia nia khiah puai in can in ul tuh i si. Kumzangza in ul tuh i si. 15Ni sarih song col tel lo sangreu ei tuh i si. Ni hmasaber nia ah ning inn songai col khiah lon tuh sio i si. Ziangmanti fangin ni hmasaber ai panin ni sarih song col thawn bawnhnak sangreu ei tu khiah Israel songin rek tuh lio i si. 16Ni hmasaber le ni sarih nia ah a cianghlim ngai in pumkhawm tlang tuh i si. Cia nia ah zai na khai per tuh lo i si. Aisu hmuah ai ei kulhnak rong ca lek in naper tuh i si. 17Ciamanin Col tel lo Puai khiah ul tuh i si. Ziangmanti fangin cia nia ah Izip ram songin ning raalkapte ning suah sah ing. Ciamanin cia nia khiah ning san veksenin kumzangza in ulhnak tuh thukham i. 18Cen hla hmasaber ni hlaili nia zanlam ai panin ni kulhluankhat zanlam tian col tel lo sangreu ei tuh i si. 19Ziangmanti fangin ni sarih song ning inn songah col um ma seh. Col thawn bawnhnak sangreu ei tu khiah Israel mi phun i tu seh mi ram dang mi i tu seh Israel mi phun songin rek tuh lio i si. 20Col thawn bawnhnak sangreu ei tuh hrimhrim lo i si. Ning umhmun caang ah col tel lo sangreu lek ei tuh i si.’ti in rel tu.”ti in ruai i.
21Ciafangin Moses in Israel mi upate khiah ko ai, “Ning innkua zah in tuufa niu khiah ril tu i lai Passover tuufa niu khiah rek tuu-ih. 22Cen hisop bor khat khai lang tu i lai hleng songai thi songah nim tuu-ih. Cia hleng songai thi khai hisop bor thawn dawngkham khuam khatlam le khatlam le a vum lam khiah phiah tuu-ih. Cen aisu khai ning inn songin a thangha khuavar hlan lo suak tuh lo i si. 23Ziangmanti fangin Izip mite rek tuhin Bawipa khiah khel tuh i. Cen ning dawngkham ai thi hmu fangin Bawipa in ning dawngkham khiah khel tuh ai ning rek tuhin rektu pa khiah ning inn songah lut siang tuh lo i. 24Cen ningte in he khiah ning fate tianin kumzangza in ul tuhhnak thukham i. 25Bawipa in ning kam bangin cia ram ah ning hleng fangin he puai khiah ul tuh i si. 26Cen ning fate in, ‘He tu zai ca in ul i sing?’ ti in ning zawt fangin, 27 He khiah Bawipa Passover Khelhnak Puai i. Ciamanin Izip ramah Israel mite khel ai Izip mite khiah rek ai kin innkua luang kin suahtu Bawipa biahnak Passover Puai i.’ ti in rel tuh i si.” ti in rel i. Ciamanin Israel minungte in lu ut kong in bia i. 28Ciafangin Israel mite khai feh ai Bawipa in Moses le Aaron ruai hnak bangin bawn i.
Pul No. 10: A te hmasaber fa thihnak
29Ciale seulai fangin Bawipa in Izip ram ai a te hmasaber fa khiah Pharaoh fapa ai panin thawng songai thawngtla pa fa tianin le a te hmasaber sumhnam fa kawmin rek i. 30Cia manin Pharaoh khai zanlai in a hnenumte le Izip mi hmuah kawmin tho i. Ziangmanti fangin a thi um lo hmun inn pakhat bang khai um lo i.
31Ciafangin Pharaoh in Moses le Aaron khai zanlai in ko ai, “ Tho tu i lai i minungte lakin ning Israel minungte veksenin tlan tu i lai ning relhnak bangin Bawipa khiah bia tuu-ih. 32Cen ning kawlpaw le ning sumhnam khai ning relhnak bang in lang tu i lai kai khai hmuifu i bur tu.” ti in ruai i. 33Ciafangin Izip mite in Israel mite khiah a rang ngai in cia ramin tlan ruai i. Ziangmanti fangin, “Kin thi tuh berh i.”ti in rel i. 34Ciamanin Israel mite in sang hlom khiah col telh lo in pakan kuum songah dah ai pon thawn amahte kodar ah phur i. 35Cen Israel mite in khai Moses relhnak bangin lo bawn ai Izip mite hnenah ngun le sui le thilrite khiah lo ngencia i. 36Bawipa in amahte khiah Izip mite in daih thai in lo bawm manin Izip mite in Israel mite ngenhnak hmuah lo pe sio i. Ciatih bangin Israel mite in Izip mite khiah rok sio i.
37Ciafangin Israel mite khai naupang siarlo pasalpui thwngzaruk tha khiah Rameses in Sukkhot ah feh i. 38 Israel mi lo mi dangte khai amahte kawmin a kawlpaw le sumhnam tam ngai thawn feh ve i. 39Cen Izip ai kenghnak col telh lo sang hlom khai anite in em i. Cia sang hlom khiah col telh lo i. Ziangmanti fangin amahte khiah Izip ramin hnawt manin amahte ca tuhin rong ei tuh khai pai man lo i.
40Israel mite khiah Izip ramah kum zali le kum sawmthum um i. 41Kum kum zali ;le kum sawmthum khim nia fangin Israel raalkapte khiah Izip ramin suak i. 42Cia zan khiah Bawipa in amahte khiah Izip ramin suahhnak zan i manin amahte in upat ngai in ul i. Cia zan khiah Israel mite san song hmuah ah Bawipa zan ti in upat ngai in ul i.
Passover uldan
43Ciafang Bawipa in Moses le Aaron hnenah, “Hetih bangin Passover ul tuh i si: Ram dang mite in ei tuh lo i. 44Ikhalselai tangka thawn laihnak hnenum in a vunpar cem hnua fangin ei thai i. 45Mikhual le hlawhthamhnak mite in ei ma seh. 46Inn songah ei tuh i si. Cen a sa khiah sumpua ah thiar tuh lo i si. Cen a ruh khai ek tuh lo i si. 47Israel mite veksenin ul tuh i si. 48Cen ning hnenai ram dang mi in Bawipa hnenah Passover khiah ul nuam lekhaw pasal hmuah in vunpar cem tu ten selai ciafangin ul tu seh. Ciafang in cia pa khiah ningte thawn bang tuh ve i. Ziangmanti fang in vunpar cem lo te in ei thill lo i. 49Cen ning lakai um tu ram dang mi le ningte ca in upadi dan pakhat lek nai tuh i si.” ti in rel i.
50Ciatih bangin Israel mite veksenin bawn i. Bawipa in Moses le Aaron ruai bangin Israel mite in bawn i. 51Cia nia rori ah Bawipa in Israel mite khiah Izip ramin a raalkapte kawm in suah i.