1Ciamanin kumpibawipa le Haman khai Kumpibawinu Esther kawmin rongei tuhin kawi i. 2A ninih nia ah anite khai capittizu ding teng fangin, kumpibawipa in Esther hnenah, “Na ngenhnak khiah zai i pa, Kumpibawinu Esther? Na pe tuh ing. Zai i ngen na nuam i, i ukhnak a tlamhmat tianin maw? Na ngenhnak bangin bawn tuh ing.” ti in zawt i. 3Ciafangin Kumpibawinu Esther in, “Na hmai ah na zartohnak ngah lengkhaw, Aw kumpibawipa, cen lung na khim lekhaw, i ngenhnak bangin i nunhnak le i phunpui te nunhnak khiah i pe tu. 4Ziangmanti fangin kaimah le i mi phunpuite khiah rek tuh le cimpil ruai tuhin kin zuar zo i. Pasal le nupang hnenum cang tuhin kin zuar selai, pong tuh napui lo ing. Ikhalselai kumpibawipa sung tuhhnak khiah kin raal pa in na rul ben tuh lo i.” ti in sawn i.
5Ciafangin Kumpibawipa Ahasuras in Kumpibawinu Esther khiah, “A thin songin ciatih bangai ruat tum pa khiah aisu i, a konah i?”ti in zawt i. 6Ciafangin Esther in, “Kin tawngtu le kin raal khiah he a siava Haman i!” ti in sawn i. Ciafangin Haman khai kumpibawipa le kumpibawinu hmai ah lau rauh i.
7Ciafangin kumpibawipa khai a thinraw ze in capittizu ding hmunin tho ai a vuandum ah kawi i. Ikhalselai Haman khai kumpibawipa in a vumah a pha lo bawn tuh khiah hmu manin, Haman khai Kumpibawinu Esther hmai ah ding in a nunhnak ca in ninghio ngen i. 8Kumpibawipa khai vuandum songin capittizu ding hmun puai khaan song ah lut leh fangin, Haman khai Esther to hmun tauhkheng saupui vumah a bok in um i. Ciafangin kumpibawipa in, “Kaimah inn songah um perpo lakin amah in kumpibawinu khai zauhsuam tum im?” ti in ti i. Kumpibawipa pon khiah a ka song in suak sawng fangin, cia ponghnakte in Haman hmai khiah hup i. 9Ciafangin tilretsa mite pakhat Harbonah in kumpibawipa hnenah, “Siktu! Kumpibawi ca in a pha ai thureltu Mordekai tar hmun tuhin Haman ai bawnhnak khuam dong sawmnga saang khiah Haman inn ah um i.” ti in rel i. Ciafangin kumpibawipa in, “Cia vumah amah khiah tar tuu-ih.” ti in ruai i. 10Ciamanin amahte in Haman khiah Mordekai tar hmun tuhai bawnhnak khuam vumah tar i. Ciafang in kumpibawipa khai a thinraw lawm i.