Esther 3

<<  ESTHER 3  >>

1He hnua ah Kumpibawi Ahasuras in Akak mi Hammedatha fapa Haman khiah do ai a naper sahtu a tlangsuakte veksen vum ah do i. 2Ciamanin kumpibawipa kawl dawngkham songai umtu kumpibawipa hnenumte in Haman khiah zul i. Ziangmanti fangin, kumpibawipa in ciatih bang in bawn tuhin ruai i. Ikhalselai Mordekai in Haman khiah zul nuam lo i. 3Ciafangin kumpibawipa kawl dawngkham songai umtu a hnenumte in Mordekai hnenah, “Ziangman in kumpibawipa thu khiah ngai lo i si?” ti in ti i. 4Amahte in Mordekai khiah ciatih bangin ni siar in rel ai Mordekai in ngai nuam lo fangin, anite in Haman khiah rel i. Ziangmanti fangin, Mordekai in amahte khiah Judah minung ing ti in lo rel i. 5Haman in Mordekai in zul lo le upat lo khiah hmu fangin, Haman khai thinraw rauh i. 6Ikhalselai amahte in Mordekai minungte phun thu khiah lo rel loi manin, Haman in Mordekai lek pom tum lo i. Ikhalselai Ahasuras ram songai Mordekai minung Judah mite khiah a veksen in rek tuhin Haman in ruat i.

7Ahasuras ukhnak kum hlainih kum, hla hmasaber Nisan hla ah, a ni le a hla ril tuhin amahte in Pur tihnak mee khiah Haman hmai ah hla fangin, hla hlainih hnak Adar hla songah khim i.

8Ciafangin Haman in Kumpibawi Ahasuras hnen ah, “Minung phun khat khiah na ukhnak ram caangcaang ah um bial i. Amahte dan upadi khiah mi dang te thawn bang lo i. Cen amahte in kumpibawipa dan upadi khai hlun lo i. Ciamanin amahte khiah kumpibawipa in a nung in um ruai tuh khiah tlak lo i. 9Ciamanin kumpibawipa lungkhim lekhaw, amahte khiah rek tuhin thusuah tu selai, kumpibawi tangka khawihmun ah kawih tuhin tangka talan thawngha khiah amahte rek tute kut ah pe ngang.” ti in sawm i. 10Ciamanin kumpibawipa in a hmingthuhnak kutruk khiah a kut songin hawk ai Judah mite raal, Akak mi Hammedatha fapa Haman khiah pe i. 11Ciafangin kumpibawipa in Haman hnen ah, “A pha ti ai na ruathnak bangin bawn tuhin minung le tangka na pe ing.” ti in ti i.

12Ciafangin kumpibawi cazite khiah hla hmasaber ni hlaithum nia fangin ko ai, Haman ai ruaihnak bangin thusuahhnak khiah kumpibawi ukhnak ram caang ai bawite le mi upate hnenah amahte pon ten in Kumpibawi Ahasuras hming in ngan ai kumpibawi hmingthu hnak kutruk thawn khet i. 13Judah mite khiah a veksen in patar le mino ti lo, naupang le nupui ti lo in hla hlainih hnak Adar hla, ni hlaithum nia ni khat songah rek tuh sio in le amahte naihhnak khiah long sah tuh sio in cia lai khiah kumpibawi ukhnak ram caang ah laiphurtute kut songin kuat i. 14Cia nia ah mite in ralring cia in um thai in, cia thu khiah ram caang ah dan upadi bangin suah tuhin mi veksen khiah than ruai i. 15Laiphurtute khai kumpibawi pa in a rang ngai in feh ruai bang in feh i. Cen cia thu khiah Shushan khuapui songah than i. Cialak in kumpibawipa le Haman tu zu ding tuhin to kawm ai Shushan khua ai mite tu ngaihsun ur ngai in um tlang i.

<<  ESTHER 3  >>