Ecclesiastes 4

<<  ECCLESIASTES 4  >>

1 Ciafangin kai khai letleh thio ai vanhang hnia ai nemhdunhnak hmuahhmuah khiah ruat ing.

   A nemhhnak mite mithli khiah sik tu.
Topui tu tuh khai um lo i.
Amahte nemh tu te in power nai i.
Ikhalselai amahte in topui tu nai lo i.

2  Ciamanin a thi zote mithi te khiah
A nunglai minungte tahin cuan ing.

3  Ciate panihhnak ai pha sawn tu,
a te awng lo tute i.
Ziangmanti fangin amahte in
vanhang hnia ai a pha lo bawnhnak khiah hmu lo i.

4  Minung pa khiah a naperhnak le
a thiam ngai ai a bawnhnak manin
a ompui in ot khiah
hmu leh thio ing. He khai thu lovang le hlivua pom tum bang teng i.

5  Mivoi pa in a kut khiah hlep ai amah taksa khiah ei i.

6  Kut khat dim thinnuam ai um khiah
kut nih dim rimsuhnak le hlivua pom tum
tah in pha sawn i.

7  Ciafangin kai khai let leh thio ai vanhang hnia ah a thu lovang khiah hmu ing:

8  Mi pakhat khiah amah lek in um i.
Rualpui nai lo i.
Fapa le unau khai nai lo i.
Ikhalselai a naper bo nia um lo i.
Cen a mit khai a naihnak thilri thawn kham thill lo i.
Ikhalselai amah in,
“Aisu ca in naper sah in a pha khiah
sup hnelhno i pa ing?”
ti in zawt lo i.
He khai thu lovang, thintawk kul naper i.

Mi panih khiah pakhat tah in pha sawn i.
Ziangmanti fangin amahte naper hmunin hlawhtham a pha ngah i.

10 Ziangmanti fangin pakhat khiah bah fangin, a rualpa in tho bawm tuh i.

   Ikhalselai a bah fangin amah lek ai bah tu khiah rimsu tuh i.
Ziangmanti fangin a tho bawm tu tuh um lo i.

11 Cen mi panih khiah it kawm lekhaw, lum kawm tuh i.
Ikhalselai pakhat lek in akontih in lum thill tuh i?

12 Mi pakhat khiah mi dang pakhat in neh thai lio i.
Ikhalselai panih fang tu pakhat mi dang pa in neh thill lo i.
Ri pathum hualhnak rihual khiah cat tuh vut lo i.

13 Farah napui ai a fim tlangval khiah aisu in khai

tiam tuh nawn lo a tar le a voi kumpibawi tah in pha sawn i. 14Ziangmanti fangin amah khiah a ukhnak songah mi farah in te napui ai amah khiah kumpibawi cang tuhin thawng songin suak i. 15Ciafangin vanhang hnia ai vak tu minung hmuah in cia kumpibawipa rol tu tlangval pa sawn hlun khiah hmu ing. 16Amahte hlanai mite veksen lakah a bo nia um lo i. Ikhalselai a hnualeh ai hleng tu mite in amah lakah lungkhim tuh lo i. Ciamanin he khai thu lovang, hlivua khiah pom tum bang teng i.

<<  ECCLESIASTES 4  >>