1 I thin songin, “Hiamhnak thawn na cu tuh ing. Ciamanin a hiam ngai in nung tu.” ti in ruat ing. Ikhalselai cia khai a lovang i. 2Ciafangin hnihsa khai, “Hnihsa khai amhnak i. Cen hiamhnak khai, “Zai bawn benhnak nai pa?” ti in ti ing. 3Mi fapate in amahte nun song ah vanhang hniaah a pha zai bawn pha ni ti sik tuhin, i taksa khiah capittizu khiah ding ruai ai i thinlung khiah fimhnak thawn konghoi ai voihnak khiah kuah ing. 4Naper lian ngaingai per ing. Innte sa ai capit vuandum te bawn ing. 5Dum le thingthai dum khai bawn ai thing thai phun cang bir ing. 6Ciaben fangin cia thingkung burh tuhin tikhur khai co ing. 7Pasal le nupang hnenum khai lai ing. Cen i inn ah hnenumte khai te i. Cen i hlanah Jerusalem ah um awng tute hnak in kawlpaw le tu le me rual khai a tam ngai in nai ing. 8Cen ngun le sui le kumpibawi te le ramuk te hlawnthil khai tamngai khawm ing. Cen mite hmuhhiamhnak lasatu pasal le nupang khai nai ing. Lasahnak karihza khai a phun cang in nai ing.
9 Ciamanin i hlan ah Jerusalem ah umtu te tahin a rauh ngai in i lian sawn i. Cen fimhnak khai nai pah hlen ing.
10 I mit ai i irhnak thil khiah i nai lohnak pakhat khai um lo i.
I thinlung ai hiamhnak cang khiah el lo ing.
Ziangmanti fangin i naperhnak hmuah lakah i thinlung khiah ang i.
Cia khiah i naper veksen ca ai i hlawhthap i.
11 Ciafangin kai khai i kut ai bawnhnak
hmuahhmuah le i perhnak hmuahhmuah khiah ii sik fangin,
A veksen in a lovang i.
Hlivua pom tum bang teng i.
Vanhang hnia ah a miathnak zaikhai um lo i.
12 Ciafangn kai khai fimhnak le amhnak le
voihnak khiah ngaisung tuhin ruat ing.
Kumpibawipa hnua ai kumpibawi tuan tu in, a bawn sa siar lo a dang zai bawn thill tuh i?
13 Ciafangin khuavar khiah khuathim tahin pha sawn bangin,
fimhnak khiah voihnak tahin pha sawn khiah hmu ing.
14 Mifimte mit khiah a lu ah i.
Ikhalselai mivoite in khuathim lakah vak i.
Ikhalselai hete panih vumah zaikhai dang cuang lo in khim khiah hmu ing.
15 Ciamanin i thin songin, “Mivoi pa hnenah khim bangin i hnenah khai khim ve i.
Ilekhaw zaimanin kaimah khiah i fim sawn i?” ti in ruat ing.
Ciafangin i thin song in, “He khai thu lovang i.” ti in ruat ing.
16 Ziangmanti fangin a kumkhua in mifim pa khiah mivoi pa tahin hih cuang lo i.
Ziangmanti fangin tunai thilte khiah tunhnua a hleng tuh lai niakhua ah hai tuh sek i.
Mifim pa khiah a kontih bang in thi pa? Mivoi bang in thi ve i.
17 Ciamanin vanhang hnia ah bawnhnak te manin rim i su manin, nunhnak khiah i hua i. Ziangmanti fangin zai hmuahhmuah khiah a lovang i. Hlivua pom tum bang teng i.
18 Ciafangin vanhang hnia ai i perhnak hmuahhmuah khiah i luah rauh i. Ziangmanti fangin a veksen in i hnua ai hleng tu hnenah hlup kul tuh ing. 19Cen cia pa khiah mifim maw mivoi i ti in aisu in ling i? Ikhalselai vanhang hnia ai i perhnak hmuah khiah amah in uk tuh cop i. Ciamanin he khai thu lovang i. 20Ciamanin kai khai vanhang hnia ai i perhnak lakah thin i hnawm rauh i. 21Ziangmanti fangin fimhnak le linghnak le thiamthilhnak thawn naper tu mi pakhat um napui ai a ro khiah a per lo tu pa hlup kul tuh i. Ciamanin cia khai thu lovang a pha lo rauh i. 22Ciamanin minungte in a naperhnak le a thinlung thawn zuam rauh ai vanhang hnia ah a perhnak khiah hnempuihnak zai um i? 23Ziangmanti fangin a nun song hmuah lungsia in um ai a perhnak lakah rimsu ngai i. Zanlai rin in a thin nuam niu in um thill lo i. He khai thu lovang i.
24 Ciamanin minungte in ei le ding in um in, a perhnak na khiah hiam ngai in per tahin a dang a pha um lo i. Cen he khai Pathian kut songin hleng i ti khiah hmu ing. 25 Ziangmanti fangin kai hnak in tam sawn in ei le nunnuam ai um thai aisu um i? 26Ziangmanti fangin Pathian a lungkhim ruai tu mi hnenah fimhnak, thiamhnak le anghnak pe i. Ikhalselai mi sualte in amahte thilri khiah Pathian lungkhim ruai tu mi hnenah pe tuhin, amahte khiah thilri khawm tuh le pum tuhin Pathian in haih i. He khai thu lovang, hlivua khiah kut in pom tum bang teng i.