Joshua 13

<<  JOSHUA 13  >>

1Joshua khai kum tar ngai i hang.  Ciafangin BAWIPA in a hnenah, “Tunin na tar zo i hang. Ram ping tuh khai a tam ngai um i lai. 2Cia ramte khiah hete i: Filistin te ram le Keshur ram veksen khiah 3Izip ramin nisuak hmunlam Sihor in a saklam ram Ekron ram tian i ai Khanaan ram ti ai siarhnak i. Cia khiah Filistin bawipa panga ai ukhnak Kaza le Ashdod le Ashkelon le Kit le Ekron te le 4hlanglam ai Avi ram te i. Cen saklam ai Khanaan ram hmuahhmuah le Sidon te ai Mearah in Amor te ramrithawn nong Aphek tian i. 5Kebal te ram le Lebanon ram hmuah le nisuak hmun lam ram le Hermon Mual hnia ai Baal Kad le Hamath luthmun tian le 6Cen mual vumai umtu mite Lebanon ramin Misrepot Rawn tian le Sidon mite khiah a veksenin Israel mite hmai in hnawt tuh ing. Kaimah in na ruai zo bang in cia ram khiah Israel mite in roco tuhin zem tu. 7Ciamanin he ram khiah Israel mite hin kua le Manasseh hrekkhatte hnenah zem tu.” ti in rel i.

8Cen Manasseh hin hrekkhatte le Reuben hin le Kad hint tetu BAWIPA hnenum Moses in pe zo bangin Jordan runin nisuak hmunlam ram co i. 9Amahte ram khiah Arnon Run kamai Aroer le rawn laiteng ai khua le Medeba zawllai Dibon tian le 10Heshbon khua in uktu Amor kumpibawi Sihon khua hmuahhmuah le Ammon ramri tian le 11Kilead le Keshur le Maakha te ramri tian le Hermon mual veksen le Bashan a veksenin Salkah tian i. 12Cia Bashan kumpibawi Ok khiah Astharoth le Edrei khua in uk awng i. Ok khiah a hnuataber tanghnak tlami fate i ai cia tlamite khiah Moses in neh awng manin cia ramin hnawt awng sek i. 13Ikhalselai Israel mite in Maakha te le Keshur te tu hnawt lo manin tunnia tianin cia mite khiah Israel mite lakah um hlen i. 14Levi hinte tu roco tuhin ram pe lo i.  BAWIPA Pathian in amahte khiah rel bangin Israel BAWIPA  Pathian hnenah mei thawn taihnak raithawihnak a hlu khiah amahte ro i.

15Moses in Reuben hin mite khiah amahte songkhat bangin roco tuhin ram pe zo i. 16Amahre khiah Arnon Run kamai Aroer le rawn laiteng ai khua pakhat lke Medeba zawllai hmuah le 17Heshbon zawllai hmun ai Dibon, Kedemoth Baal, Beth Baal Moen, 18Jahaza, Kedemoth, Mephaath, 19Kirjathaim, mual vumai Sibmah, Zereth Shahar, 20Beth Peor, Piskah mualtlaang tluan le Beth Jeshimoth khuah hmuahhmuah le 21Moses in Midian bawite Evi, Rekem, Zur, Hur, le Reba te thawn ai rekhnak Heshbon khua in uktu Amor kumpibawi Sihon ram hmuahhmuah le zawllai hmunai khuate khiah a veksenin Reuben hint e in co i. 22Cen Israel mite in tlahsantu Beor fapa Balaam khai vangsau thawn a dangte kawmin rek i. 23Cen Reuben fate ramri khiah Jordan runkam i. He khuapui te le khuaniu te khiah Reuben songkhat te ai cohnak ram i.

24Cen Moses in Kad  hin mite khai amahte songkhat bangin roco tuhin ram pe i. 25Amahte ramri khiah Jazer le Kilead khua hmuahhmuah le Rabbath hmai ai Ammon mite ai ram a hrekkhat Aroer tian le 26Heshbon in Ramah Mizpah le Betonim  tian le Mahanaim in Debir ramri tian i. 27Cen rawn zawllai ai Beth Haram,Beth Nimrah, sukkoth, le Zaphon le a taanghnak Heshbon kumpibawi Sihon ram khai i. 28He khuapuite le khuaniute khiah Kad fate songkhat ai cohnak ram i.

29Moses in Manasseh hin hrekkhat te khai roco tuhin ram p eve i. Manasseh fate hrekkhat in a songkhat bangin cohnak i. 30Amahte ram khiah Mahanai, in panai Bashan veksen le Bashan kumpibawi ram hmuahhmuah le Bashan ramai Jair ai khua sawmruk te i.  31Kiliead tlamhmat le Bashan ai kumpibawi Ok khua Ashtaroth Edrei khiah Manasseh fapa Makhir fate songkhat ca i. 32Ikhalselai Levi hinte tu co tuh in Moses ram pe lo i. Moses in amahte khiah rel bangin Israel BAWIPA Pathian khiah amahte ro i.

<<  JOSHUA 13  >>