Deuteronomy 9

<<  DEUTERONOMY 9  >>

1Aw Israel, ngai tuu-ih: Tunnia ah ning hnak ai lian sawn le hat sawn mite khiah vanvum tian ai renhnak khuapui songin hnawt tuhin Jordan run khiah tan tuh i si. 2Cia mite khiah a ruang khai lian a dung khai saang ai, ‘Aisu in Anak tesin fate khiah tawng ben tuh i?’ti ai rel ning zahnak Anakim tesin fate i. 3Ciamanin BAWIPA ning Pathian khiah ning hmai in maipual pui bangin  feh i ti khiah ling tuu-ih. Amah in amahte khiah hnawmcan tuhin ning hmai ah tlok ruai tuh sio i. Ciamanin BAWIPA  in ning ruai bangin a rang ngai in amahte khiah hnawt in hnawmcan tuh sio i si. 4Amahte khiah BAWIPA ning Pathian in ning hmai in amahte khiah hnawt sio fangin ning thin songin, ‘I dikcang manin BAWIPA in he ram ping tuhin i kawih i.’ti in ruat mah ih. Ikhalselai he mite khiah a sual ze manin BAWIPA in ning hmai in ning hnawt sah i. 5Ning dikcang manin le ning thinlung khiah a hman manin he ram ping tuhin hleng lo i si. Ikhalselai he mite khiah a sual ze manin BAWIPA in ning hmai in hnawt ai ning paate Abraham le Aizek le Zakuk te hnenah khamhnak thu khim ruai tuhin hnawt i. 6Ikhalselai BAWIPA ning Pathian in he ram pha khiah ning dikcang manin ping tuhin ning pe i lo i ti khiah ling tuu-ih. Ziangmanti fangin ningte khiah mi ungtuang mite i si.

7BAWIPA ning Pathian khiah nelrawn songah thinraw ruai khiah hih tuu-ih. Izip ai ning suak nia ai panin heta ning hleng tian in BAWIPA thu khiah el tio i si. 8Horeb ah khai BAWIPA khiah thinraw ruai manin amah in ning hnawmcan i. 9Mual vumah BAWIPA in ningte thawn thukham bawnhnak lung tlep lang tuhin i hong fangin mual vumah ni sawmli le zan sawmli um ing. Ciafangin rong khai ei lo ing, ti khai ding lo ing. 10Ciafangin BAWIPA in Pathian kut ai nganhnak lungto tlep nih khiah i pe ai cia lung tlep vumah Israel  pawlte hnenah mai songin BAWIPA in mualvum ai a ponghnak pon khiah a veksenin um i. 11Cia ni sawmli le zan sawmli bo fangin  Bawipa thukhamhnak lungto tlep nih khiah i pe i. 12Ciafangin BAWIPA in i hnenah, ‘Tho tulai a rang ngai in heta in tolh tu. Ziangmanti fangin Izip ramai na suahhnak mite in a rauh ngai in sual i. I ruaihnak lampui in lamtler man lio i hang. Amahte in er ai milim zuk khiah bawn i.’ti in i rel i.

13Ciazolo ah BAWIPA in i hnenah, ‘He mite khiah hmu zo ing. Amahte khiah mi ungtuang pawl i. 14Kaimah lek in um rih ngangkhaw he mite khiah hnawmcan in vanhang hnia in amahte hming khiah phiat tuh sio ing. Nangmah khiah amahte hnak in lian sawn le hat sawn mi phun cang tuhin na bawn tuh ing.’i ti i. 15Ciamanin kai khai mual vumin let ai mual vum khiah mai thawn kang i. Cia lungto tlep nih khiah i kutah um i. 16Kai khai sik ta ve le ningte in BAWIPA ning Pathian lakah lo sual lio i si. A erhnak kawlpaw niu lo bawn i si. BAWIPA ai ning ruaihnak lampui in lo tler man lio i si. 17Ciafangin kai khai cia lung tlep panih khiah i kut in lang ai ning hmai ah sep ai khoi ruai ing. 18A hmasa bangin ni sawmli le zan sawmli BAWIPA hmai ah bok ing. Rong khai ei lo ing. Ti khai ding lo ing. Ziangmanti fangin BAWIPA hmai ah ningte in a siava in bawn ai amah lakah sual manin amah khiah thinraw ruai i si. 19Ziangmanti fangin BAWIPA ai ning lakah thinraw rauh manin ning hnawmcan tuh khiah i lau ngai i. Ikhalselai ciafangin khai BAWIPA in i ngai sah i. 20BAWIPA khai Aaron lakah thinraw rauh ai hnawmcan tum napui i. Ciamanin Aaron ca khai sawngen sah ve ing. 21Ciafangin kai in ning sual ruaitu ning bawnhnak cia kawlpaw niu khiah lang ai mai thawn tai ai seu dek ai vutkuang bang in nawi sio in seu ai rial dek ai mual vum ai luanghnak ti songah cia vutkuang khiah lon ing.

22Cen Taberah le Massah le Kibroth Hataavah ah khai BAWIPA khiah thinraw ruai i si. 23Ciabang in, BAWIPA in Kadesh Barnea ah ning kuat ai, ‘Hong tu i lai kaimah ai ning pehnak ram khiah ping tuu-ih.’ ti in ning rel fangin BAWIPA ning Pathian ruaihnak khiah el ai amah khiah sang khai sang lo a thu khai hlun lo i si. 24Ningte khiah kaimah in ning ling nia ai pah in BAWIPA khiah tawng tio si.

25 Ciatih bangin BAWIPA hmai ah bok ing. BAWIPA in ning te khiah ning hnawmcan tuh ing ti manin amah hmai ah ni sawmli le zan sawmli bok ing. 26Ciamanin kai khai BAWIPA hnenah sawngen ai, ‘Aw BAWIPA Pathian, Izip ramin huthawm lian ngai thawn ai na suahhnak le na huthawm thawn ai na luangtlanhnak na minung na rothilte khiah hnawmcan mah. 27Na hnenumte Abraham le Aizek le Zakuk te khiah hih tu. Hete thinruh le amahte sualhnak a siava khiah sik sah mah. 28Cialo fangin nangmah ai kin suah hmun ramte in, “BAWIPA in amahte hnenah khamhnak ram ah fehpui ben lo manin le amahte khiah hua manin nelrawn songah amahte khiah rek tuhin suah i.”ti in na ti tuh i.

29Ikhalselai amahte khiah na huthawm le na power thawn na suahhnak na minung le na rothilte i.’ ti in ti ing.

<<  DEUTERONOMY 9  >>