Deuteronomy 7

<<  DEUTERONOMY 7  >>

1Bawipa ning Pathian in ping tuhin ning feh hmun ramah ning kawih fangin, ning hlanin mi phun tam ngai Hit mite, Kirkash mite, Amor mite, Khanaan mite, Periz mite, Hiv mite le Jebus mite, mi phun sarih ning hnak in lian sawn le cak sawn  khiah ning hnawt sahai 2Bawipa ning Pathian in amahte khiah ning hnenah ning pe fangin amahte khiah neh in hnawmcan tuh sio i si. Amahte thawn thu khai kham dun tuh  lo i si. Ngaih khai har tuh lo i si. 3Cen amahte thawn khai nu dun pa dun tuh lo i si. Ning fenu khiah amahte fapa pa tuhin pe tuh lo i si. A fenu khiah ning fapa ca tuhin lang tuh lo i  si. 4Ziangmanti fang in amahte in ning fapate khiah i hlun lo in let ruai tuhai a dang  pathiante na per sah tuh i. Ciafangin Bawipa khiah ning lakah thinraw ruai tuhai camkhat in ning hnawmcan tuh sio i. 5Ikhalselai amahte khiah hnawmcan tuh i si: amahte awlta khiah hnawmcan tuh i si; amahte khan khiah ek sah tuh sio i si; amahte thing thawn bawnhnak milim zuk khiah cem sah tuh sio i si; cen amahte milim zuk suaihnak khiah mei in tai tuh sio i si. 6Ziangmanti fangin ningte khiah Bawipa ning Pathian hnenah a cianghlim mi i si. Bawipa ning Pathian in ningte khiah amah ca tuhin ning ril zo ai laivum ai minung hmuahhmuah hnak in a phun dang rauh hlawnthil i si. 7Ningte khiah mi danghnak in ning tam manin Bawipa in ning it ai ning ril lo i. Ziangmanti fangin ningte khiah mi hmuahhmuah lakah a tlawm ber i si. 8Ikhalselai Bawipa in ning it ai ning paate hnenah a thukham hnak khiah khim ruai nuam manin Bawipa in sal le cengfa inn le Izip kumpibawi kut songin huthawm lian ngai thawn ning suah ai ning tlan i. 9Ciamanin Bawipa ning Pathian khiah Pathian i ti khiah ling tuu-ih. Amah khiah a rinsan tlak Pathian i ai a thukhamhnak khiah khim ruai tu Pathian i. Cen a it tu le a thukham hluntute vumah a ngaihharhnak khiah san thawng khat zolo vumah um i. 10Amah hua tute khiah amahte hmai rori ah rul tuh ai hnawmcan tuh i. A hua tute lakah tirhting lo ai a hmai rori ah rul tuh vut i. 11Ciamanin tunnia ai kaimah in ning ruaihnak thukham le dan upadi le thukhanhnakte khiah hlun tuu-ih.

12Ciafangin ningte in he thukhanhnakte khiah ngai ai hlun manin Bawipa ning Pathian in ning paate hnen ah a khamhnak a thukham le a ngaihharhnak khiah khim ruai tuh i. 13Ciafangin amah in ning it tuhai hmuifu ning bur tuhai ning zaai ruai tuh i. Ning pe tuh in ning paate hnenah kham hnak ramah ning fate le ning ramai thingthai le ning rongmu le ning capttizu thar le ning thau le ning suum le ning tuu fate vumah hmuifu ning burh tuh i. 14Mi dang veksen hnakin hmuifu ning bur tuh i; ning lakah pasal le  nupang aisu khai fa nai lo in um tuh lo i. Cen ning suumte khai fa nai lo in um tuh lo i. 15Bawipa in urhnak hmuahhmuah ning lakin lang tuh sio ai ning ling awnghnak Izip ramai ur rauh ngaingai  thawn ning ur tuh lo i. Ikhalselai cia urte khiah a huatute veksen vumah dah tuh i. 16Bawipa ning Pathian ai ning aphnak mi te khiah a veksenin hnawmcan tuh sio i si. Ning mit in amahte khiah ninghio tuh lo i si. Amahte pathian khai na per sah tuh lo i si. Ziangmanti fangin ciate in thang bang in ning awk tuh i.

17Ning thin songin, ‘He mite khiah kin hnak in lian sawn i. Kontih in hnawt ben tuh i ing?’ ti in ruat leisikhaw 18amahte khiah kih tuh lo i si. Ikhalselai Bawipa ning Pathian in Pharaoh le Izip mite veksen hnenah bawn hnak khiah hih tuh i si.  19Harsahnak lian ngaingai le hnikhnaihhnak le ngaihsunurkul le thuthawm lianpui thawn BAWIPA ning Pathian in ning suah khiah ning mit in hmu i si. Ciatih bangin ning kihhnak mi hmuahhmuah vumah BAWIPA ning Pathian in bawn tuh i. 20Ciazolo ah a taang tute le ning hmunin relh tute hnenah amahte khiah hnawmcan berh hlanlo BAWIPA ning Pathian in amahte lakah khoitu hlat tuh i. 21Amahte khiah kih tuh lo i si. Ziangmanti fangin a lian le a ngaihsunurkul Pathian, BAWIPA ning Pathian khiah ning lakah um i. 22Cen BAWIPA ning Pathian in ning hmai ai mi phunte khiah a tlawm niu niu in ning hnawt sah tuh cekco i. Cialo fangin hampalak ai ramsate khiah ning ca ah tam ze tuh i. 23Ikhalselai BAWIPA ning Pathian in amahte khiah ning hnenah ning ap tuh ai amahte khiah hnawmcan sio hlanlo amahte khiah neh tuh sio i si. 24Amahte kumpibawite khiah ning kut ah ning ap tuhai amahte hming khiah vanhang hnia in pai tuh sio i. Amahte khiah ning hnawmcan sio hlanlo aisu in khai ning tawng ben tuh lo i. 25Amahte suaihnak amahte pathiante zuk khiah mai thawn tai tuh i si. Amahte vumai sui le ngun khiah ot tuh lo i si. Cialo fangin thang bangin ning awk tuh i. Ziangmanti fangin ciate khiah BAWIPA ning Pathian hmaiah a ningdulkul i. 26Cen ningdulkul thil khai ning inn songah kawih tuh lo i si. Cia thil bangin ning rall in ning hnawm tuh ve i. Ikhalselai cia thil khiah hua in cim tuh i si. Ziangmanti fangin cia thil khiah a awrsia camhnak thil i.

<<  DEUTERONOMY 7  >>