1Mi ai til rethnak pa khiah Bawipa pawl songah pumkhawm tuh lo i.
2Zawlfa ai tehnak pa in Bawipa pawl songah pumkhawm tuh lo i. San ha tian in a tesin fate in Bawipa pawl songah pumkhawm thill tuh lo i.
3Ammon mi le Moab mite khiah Bawipa pawl songah pumkhawm tuh lo i. Ziangmanti fangin Bawipa ning Pathian in Izip ramin ning suah fangin rong le ti thawn ning caang lo i. Cen Mesopotamia ram Pethor ai Beor fapa Balaam khiah awrsia thawn ning cam tuhin ruai i. 5Ikhalselai Bawipa ning Pathian in Balaam thu khiah ngai lo ai, Bawipa ning Pathian in ning it manin Bawipa ning Pathian in awrsia khiah ning ca ah hmuifu cang ruai i. 6Ning nun song ah kumzangza in amahte thinnuam hnak le amahte khangsohnak khiah sii sah tuh lo i si.
7Edom mi khiah hua tuh lo i si. Ziangmanti fangin amahte khiah ning unaute i. .Izip mi khiah hua tuh lo i si. Ziangmanti fangin amahte ramah mikhual i awng i si. Amahte songai tehnak fate a san thumhnak te in Bawipa pawlpui songah pumkhawm thai i.
9Ning raalkapte in ning raalte tawng fangin a pha lo thil thawn a kaang in um tuu-ih. 10Ning lakah mi pakhat khiah zanlai in rim ngah lekhaw, camp pua ah suak tu seh. Camp songah lut ma seh. 11Ikhalselai zanlam fangin ti thawn takhlu tu selai, nitla fangin camp songah lut leh tu seh. 12Buruk to hmun khiah camp pua ah nai tuh i si. 13Cen camp pua ah buruk ning to fangin ning ek khiah laipua thawn khuk tuhin cohnak tuh thilri karihza nai tuh i si. 14Ziangmanti fangin Bawipa ning Pathian khiah ning luangtlan tuh le ning raalte khiah ning ap tuhin ning camp songah vak i. Ciamanin ning camp khiah a cianghlim in dah tuhai amah in ning lakah a rim khiah hmu tuh lo i. Cialo fangin amah khiah ning hnenin tlan tuh i.
15A bawipa hnenin tlanin na ben tu a hnenum khiah a bawipa hnenah kawih leh tuh lo i si. 16Ning kawl dawng songah a nuamhmun ber le a rilhnak hmun ning lakah um tu seh. Amah khiah tihhrim tuh lo i si.
17Israel fenu te in phatemah cang tuh lo i. Cen Israel fapate in khai phatemah cang tuh lo i. 18Ning thukhamhnak ai hlu tuhin, phatemah hlawhtham le uico man tangka khiah Bawipa ning Pathian inn ah kawih tuh lo i si. Ziangmanti fangin hete khiah Bawipa ning Pathian hnenah a ningdulkul i.
19Na unau hnenah tangka i tu seh rong i tu seh thilri i tu seh a miat lang in zawn tuh lo i si. 20Ramdang mi hnenah a miat lang thai i si. Ikhalselai ping tuhai ning lut hmun ramah na kut ai perhnak hmuah vumah Bawipa ning Pathian in hmuifu na bur thai in, na unau hnenah a miat lang tuh lo i si.
21Bawipa ning Pathian hnenah thu ning kham fangin ning khamhnak bangin bawn tuhin tirhting mah ih. Cialo fangin Bawipa ning Pathian in ning ruai tuh bel le sualhnak cang tuh i. 22Ikhalselai thukham hlah lesikhaw ning sual tuh lo i. 23Na kaa ai ponghnak bang in hlunin bawn tuh i si. Ziangmanti fangin Bawipa ning Pathian hnenah ning kaa thawn ningmah thu in thukham bawn ngian i si.
24Na ompui capit vuandum na lut fangin a capit khiah na duh zah in ei thai i si. Ikhalselai na bawm songah thun tuh lo i si.25Cen ning ompui lo ai fang lakah na feh fangin a fangmu khiah na kut thawnin sik thai i si. Ikhalselai ning ompui lo ah a fang khiah vangkawn thawn at tuh lo i si.