1BAWIPA ning Pathian hnenah a maa nai a khimlo naitu kawlpaw cang i tu seh tuu i tu seh hlu tuh lo i si. Ziangmanti cia khiah BAWIPA ning Pathian hnenah a ningdul kul i. 2BAWIPA ning Pathian ai ning pehnak kawl dawng songah pasal i tu seh, nupang i tu seh BAWIPA ning Pathian hmai ah sual in a thukham lakah sual in 3a dang pathiante khiah hlunin bia in, i ruai lohnak ni le hla le van vumai thilte bia khiah 4ning rel in ning in za leisikhaw, a kungniu in zong tuh i si. Ciafangin cia thu khiah hman peu in cia bang ningdulkul khiah Israel ramah lo bawn peu lekhaw, 5cia bang ai sual tu cia pa le cia nu khiah ning kawl dawng ah kawih tuh le lungto thawn sep in rek tuh i si. 6Thi tlak ai sual tu khiah tetti panih le pathum khanhnak bangin rek tuh i si. Ikhalselai tetti pakhat lek relhnak menma in rek tuh lo i si. 7 Tettikhan tute in a hmasaber in amah khiah rek pan tu selai ciaben fangin mi zapui in rek bawm tu seh. Ciatih ning lakin mi sual khiah rek tuh i si.
8Mi rekhnak thute bang, khia le he thukhan hnak, khia le he cawhkuan hnak le ning kawl dawng songai eldunhnak khiah thukhan tuh har ze lekhaw, BAWIPA ning Pathian ai ril hmun ah tho in kawi tuu-ih. 9Levi phungkite le ciateng ai thukhantu pa hnenah kawi in zawt tuu-ih. Amahte in a thukhan sah tu seh. 10BAWIPA ai rilhnak hmunah amahte ai sungphiathnak bangin bawn tu. Amahte ruaihnak bang rori ai bawn tuhin ralring tuh i si. 12Amahte ai ruaihnak dan upadi bangin le amahte sungphiat hnak bangin bawn tuh i si. Amahte sungphiathnak bang lo in kiahhan lam le kekeh lamah lamtler tuh lo i si. 12Cen cia pa khiah puar in BAWIPA ning Pathian hmai ah naper tuhai dingtu phungki thu i tu seh, thukhantu pa thu rel hnak i tu seh, ngai hlahlekhaw cia pa khiah thi kul tuh i. Ciatih bangin a pha lo pa khiah Israel ram songin rek tuh i si. 13Ciafangin mi zapui in za tuh le anite khai a puar in um ngam tuh lo i.
14BAWIPA ning Pathian ai ning pehnak ramah hleng in ping in to fangin, ‘Kin hiang cingkim ai mite bangin kumpibawi nai nga i sing.’ti in ning ti fangin, 15Bawipa ning Pathian ai rilhnak pa ian ning uk tu tuh kumpibawi in dah tuh i si. Ning unau songin ril tuh i si. Ning unau lo mi ramdang mi khiah ning uktu tuhin dah tuh lo i si. 16Ikhalselai amah in siphuh khiah zua tuh lo i. Cen a minungte khai siphuh zua tuhin Izip ramah let ruai tuh lo i. Ziangmanti fangin Bawipa in ning hnenah, ‘Khia lampui ah let leh tuh lo i si.’ti in ning rel zo i. 17Nu tam ngai khai nai ma seh. A nu te in a thinlung khiah sual ruai tuh i. Cen amah ca tuhin ngun le sui khai khawl hnelhno ma seh.
18Cen amah khiah a kumpibawi tauhkheng vum ah a to leh fangin Levi phungki hmai ai he upadi dan khiah ca-uk songah amah ca tuhin ngan in khum tu seh. 19Cen Bawipa a Pathian khiah kih in he upadi dan le thukhamte khiah a veksenin hlun tuhin cia ca-uk khiah amahte in a nun song hmuah siar tu tio seh. 20Ciafangin amah khiah a unaute lakah puar tuh lo ai thukham hnenin kiahhan lam le kekeh lamah tlamtler tuh lo i. Cen a ukhnak Israel mite lakah amah le a fate khiah nun sau tuh i.