Deuteronomy 14

<<  DEUTERONOMY 14  >>

1Ningte khiah BAWIPA ning Pathian fate i si. Mithi ca in ning taksa khiah at tuh lo i si. Ning cal ai sam khai met tuh lo i si. 2Ziangmanti fangin ningte khiah BAWIPA ning Pathian hnenah mi cianghlim te i si. Ningte khiah amah ca tuhin BAWIPA in ning ril zo ai laivum hmuahhmuah songai mi veksen hnakin a tumce hlawnthil i si.

3A ningdulkul sa khiah ei tuh lo i si. 4Hete sa khiah ei thai i si: kawlpaw cang, tuu, me, 5kiho, sakhi, kiho cang, sazaa, sathar, mual vumai me, antelope, mual vumai tuu sa te ei thai i si. 6Cen suumte lakai a ketin kakte le sialkiah kial tu suumte khiah ei thai i si. 7Ikhal selai sialkiah kial le a ketin kak napui ai a sa ning ei tuh lo pawl khiah: kala-uk, savek, hairax te i. Amahte in sialkiah kial napui ai a ketin kaak lo i. 8Cen vok khai ning ca ah a ciang lo i. Ziangmanti fangin a ketin kaak napui ai siahkiah kial lo i. A sa khai ei tuh lo i si. Cen vok thisa a pum khai khing tuh lo i si.

9Ti songai umte veksen lakah hete ei thai i si: a phaw nai te hmuah ei thai i si. 10A phaw nai lote khiah ei tuh lo i si. Ning ca ah a ciang lo i.

11Vaniute khiah a veksen in ei thai i si. 12Ikhalselai hete khiah ei tuh lo i si: mu dokka, langtar, 13mu san le falkhon mu le a dang mu hmuahhmuah;  14lang-aak phun hmuahhmuah; 15ostrich le a bil comniu nai simbu le pinle ai vaniu a ngote pawl le hawk phun hmuahhmuah; 16simbu phun hmuahhmuah; 17jackdaw le carrion langtar le nga sio  thai simbu le 18stork le heron te phun hmuahhmuah le hoopoe le palap te i. 19A zuang thai nunghing te hmuahhmuah khiah ning ca ah a ciang lo i. Ei tuh lo i si. 20 A ciang vaniu hmuah khiah ei thai i.

21Amah thu ai thihnak sa khiah ei tuh lo i si. Ning kawl dawngkham songai umtu mikhual in ei tuhin pe thai i si. Cen ram dang mi hnenah khai zuar thai i si. Ziangmanti fangin ningte khiah BAWIPA ning Pathian hnenah mi cianghlim i si. Me niu khiah a nuu hnawiti thawn suang tuh lo  i si.

22Kum khat hnua kum khat ning lo ai suakhnak rong khiah sephuhtaphuh pe tuh rori i si 23BAWIPA ning Pathian khiah kih hal tuh tio in ning rong sephuhtaphuh le ning capittizu thar le ning thau le ning kawlpaw le tuu le me lakai a tehmasaber te khiah BAWIPA ning Pathian hmai ah amah ai ril hmun ah ei tuh i si. 24Ikhalselai a hla ngai khualsi kul manin ning sephuhtaphuh khiah phur ben hlah leisikhaw, cen BAWIPA ning Pathian in a hming dah hmun tuhai rilhnak hmun khiah ning hnenin hla ze lekhaw, BAWIPA ning Pathian in hmuifu ning bur fangin, 25Ciate khiah paisa thawn thleng tu i lai ning kut ah paisa khiah dah in BAWIPA ning Pathian ai ril hmunah kawih tuu-ih. 26Ciafangin cia paisa khiah kawlpaw cang i tu seh, capittizu le ciabang ding tuh le na duhhnak cang lai tuhin hmang tu. BAWIPA ning Pathian hmai ah ei tu lai na innkua kawmin ang tuu-ih. 27Ning kawl dawngkham songai Levi te khiah hai mah ih. Ziangmanti fangin amahte in ning kawm in covo le rothil nai ve lo i.

28Kum thum khim cang fangin cia kum ai ning rong sephuhtaphuh khiah ning kawl dawng ah pam tuh i si. 29BAWIPA ning Pathian in ning kut ai ning perhnak hmuahhmuah hmuifu ning bur thai in ning kawl dawng songai um tu ning kawmin covo le rothil nailo Levi te le mi ram dang mi le paa nai lo te le hmaitongte khiah kawi in ei tu seh.

<<  DEUTERONOMY 14  >>