1Kumpibawipa Nebukhadnezzar in sui thawn mizuk pakhat bawn ai a saanglam khiah dong sawmruk saang ai a kaulam khiah dong ruk kau i. Ciafangin amah in cia mizuk khiah Babilon ram ai Dura zawllai hmunah tauh i. 2Ciafangin Kumpibawipa Nebukhadnezzar in ramuk tute le raalbawi upate le mangkite le tlangsuakte le tangka kilkhawl tute le mi thukhan sah tute le palik bawite le ram cang ai bawi upate khiah Kumpibawipa Nebukhadnezzar ai tauhhnak mizuk puai bawt tuhin hmunkhat in khawm tuhin kawi ruai i. 3Ciamanin ramuk tute le raalbawi upate le mangkite le mite thu tiam tute le tangka kilkhawl tute le mi thukhan sah tute le palik bawite le ram cang ai bawi upate khiah Kumpibawi pa Nebukhadnezzar ai tauhhnak mizuk puai bawt tuhin hmunkhat in khawm i. Ciafangin amahte khiah Nebukhadnezzar ai tauh hnak mizuk hmai ah ding tlang i. 4Ciafangin thuthan tu pa in, “Aw mi phun hmuahhmuah le ram hmuahhmuah le pon hin caang pong tute, ning te hnenah, 5Ningte in sel ki le titilu le thir congcing phun caang tum hnak aw khiah la phun caang aw kawm in ning za fangin, ningte khai bok in Kumpibawipa Nebukhadnezzar ai tauh hnak sui mizuk khiah bia tuh i si. 6Cen bok in bia lo tu khiah a sa ngai ai ko hiangho maipual laiteng ah lon tuh i.” ti in aw cawm ngai in au i.
7Ciamanin mi veksen in sel ki le titilu le thir congcing phun caang tumhnak aw khiah la phun caang aw kawm in za fangin, mi phun hmuahhmuah le ram hmuahhmuah le pon hin caang pong tute khai bok in Kumpibawipa Nebukhadnezzar ai tauhhnak sui mizuk khiah bia i.
8Ciamanin ciateng ah Khaldean mite hrekkhat khiah kawi ai Judah mite khiah mawhhluk i. 9Anite khai Kumpibawipa Nebukhadnezzar hnen ah kawi ai, “Aw kumpibawipa, kumzangza in lo na nung tu seh. 10Aw kumpibawipa nangmah in sel ki le titilu le thir congcing phun caang tum hnak aw khiah la phun caang aw kawm in ning za fangin, ningte khai bok in mizuk khiah bia tuh in le 11ciatih in bok in bia lo tu khiah a sa ngai ai ko hiangho maipual laiteng ah lon tuh in thu suah zo i si. 12 Babilon ram uk tuh in na haihhnak Judah mi hrekkhatte: Shadrak, Meshak le Abed-Neko he mite in, aw kumpibawipa, zai na nam sah lo i. Anite in na pathiante le na bawnhnak sui mizuk khai bia lo i.”ti in rel i.
13Ciamanin Nebukhadnezzar khai thinraw rauh in Shadrak le Meshak le Abed-Neko khiah kawih tuhin thu pe i. Ciamanin amahte in he mite khiah kumpibawipa hnenah kawih i. 14Ciafang in Nebukhadnezzar in amahte khiah, “Sahadrak, Meshak le Abed-Neko, ningte in i pathiante le i bawnhnak sui mizuk khai bia lo khiah a peu im? 15Ilekhaw ningte in sel ki le titilu le thir congcing phun caang tumhnak aw khiah la phun caang aw kawm in ning za fangin, ningte khai bok in i bawnhnak sui mizuk khiah bia leisikhaw pha i. Ikhalselai bia hlahleisikhaw a sa ngai ai ko hiangho maipual laiteng ah ning lon tuh vut i. Aisu bang pathian in ningte khiah i kut song in ning o ben tuh i?”ti in ti i.
16Shadrak le Mishak le Abed-Neko in kumpibawi pa khiah, “Aw Nebukhadnezzar, he thu ah na sawn kul lo i ing. 17Na relhnak bang in ilekhaw, a na kin per sahhnak kin Pathian in a sa ngai ai ko hiangho maipual song in kin o ben tuh i. Cen aw kumpibawipa, na kut song in khai kin o tuh i. 18Ihlahlekhaw, he khiah lo ling tu, aw kumpibawi pa, na pathiante khiah bia tuh lo i ing. Cen na bawnhnak sui mizuk khai bia tuh lo i ing.”ti in sawn i.
19Ciafangin Nebukhadnezzar khai thinraw rauh ai Shadrak le Mishak le Abed-Neko te lakah a mit hmai khiah thleng i. Ciamanin cia maipual khiah let sarih in sa tuh in thu pe i. 20Ciafangin Shadrak le Mishak le Abed-Neko te khiah pen in a sa ngai ai ko hiangho maipual songah khawh tuhin a raalkap songai a cak berber mite khiah ruai ai amahte khiah thu pe i. 21Ciafang in cia mite khai amahte kawt angki le bawngbi le lupawng le a dang thilthuam kawm in ri in pen ai a sa ngai ai ko hiangho maipual laiteng ah khawh i. 22Ciamanin, kumpibawipa thu pehnak khiah a rang ngai in bawn ruai manin le cia maipual khiah sa rauh manin, Shadrak le Mishak le Abed-Neko te pom tute khai cia mai lei in rek i. 23Ciafangin he mite, Shadrak le Mishak le Abed-Neko te khai a sa ngai ai ko hiangho maipual laiteng ah ri ai pen sa in tlok i.
24Ciafangin Kumpibawipa Nebukhadnezzar khai ngaihsun ur rauh i. Ani khai a rang ngai in tho ai a tlangsuakte hnenah, “Ri thawn pen in mai songah mi pathum khawh i ta lo i sing?”ti in ti i. Amahte in kumpibawipa khiah, “Na hman i. Aw kumpibawi pa.”ti in sawn i. 25Ciafangin amah in, “Sik tu cuk ih. Mai song ah mi pali khiah ri thawn pen lo in vak khiah hmu ang ing. Cen amahte khiah ur ang hlah. Cen a pali pa tu Pathian Fapa bang i ang.”ti in sawn i.
26Ciafangin Nebukhadnezzar khai a sa ngai ai ko hiangho maipual kua nongah kawi ai, “A Saangber letlo Pathian hnenum, Shadrak, Mishak, Abed-Neko, suak in heta ah kawi tuu-ih.”ti in ti i. Ciafang in Shadrak, Mishak le Abed-Neko khai mai song in suak i. 27Ciafangin ramuk tute le raalbawi upate le mangkite le kumpibawi tlangsuakte khai hmunkhat in khawm tlang ai amahte pum khiah mai ai kang ben lohnak he mite khiah sik i. Amahte sam le amahte thilthuam khai kang bul lo i. Cen amahte vumah mai khai naam bul lo i. 28Ciafangin Nebukhadnezzar in, “Shadrak, Mesha le Abed-Neko te hnenah a Vancung Mi khiah hlat ai amah sang tu a hnenum te khiah o tu Pathian khiah hmuifu tu seh. Amahte in kumpibawipa thu khiah ngai lo ai amahte Pathian lo a dang pathian khiah bia tuh lo in amahte pum khiah pe ngam i. 29Ciamanin Shadrak, Mishak le Abed-Neko te Pathian khiah siat tu mi phun hmuahhmuah le ram hmuahhmuah le pon hin caang pong tute aisu bang khai amahte pum khiah a cik niuniu in cem sah tuh sio ai amahte inn khiah vutkuang pumhnak bang in cang ruai tuh i. Ziangmanti fangin he bang ai o thai Pathian a dang pathian um lo i.”ti in thu suah i. 30Ciafangin kumpibawipa in Shadrak, Meshak le Abed-Neko te khiah Babilon ram songah do i.