1Judah kumpibawipa Jehoiakim kumpibawi tuan hnak kum thum fangin, Babilon kumpibawipa Nebukhadnezzar khai Jerusalem ah kawi ai Jerusalem khiah sim i. 2Ciafangin Bawipa in Judah kumpibawipa le Pathian inn songai thilrite kawmin amah hnenah pe ai ani khai ciate khiah Shinar ram ah thiar ah a pathian inn ah dah i. Cia thilrite khiah a pathian hlawnthil khawi hmun ah dah i.
3Ciafangin kumpibawipa in tilret sa mite uktu bawi Ashpenaz khiah Israel mite le kumpibawi tesin fate le milian fate khiah kawih ruai i. 4Cia tlangval te khiah ma nai lo, hmel mawi, zianglam ah khai thiam ai fimhnak nai ai a rang ngai in ling thiam thai pawl tlangval te i le kumpibawi inn songah naper tuh in amahte khiah Khaldean te pon le lai khiah cuk nuam i. 5Kumpibawipa in amahte ei tuhin kumpibawi rong ur berte le a ding hnak capittizu khiah pe ai kum thum khim fangin amahte in kumpibawipa na per sah tuhin kum thum song zirh tuh in dah i. 6Ciafangin Judah fate lakah Daniel le Hananiah le Mishael le Azariah lo um i. 7Ciate khiah tilret hnak mite bawipa in hming pe i. Daniel hming khiah Belteshazzar pe i. Hananiah khiah Shadrak pe i. Mishael khiah Meshak pe i. Azariah khiah Abed-Neko pe i.
8Ikhalselai Daniel in amah khiah kumpibawipa rong ur ei le a ding hnak capittizu ding in riim ruai tuh lo in a thinlung in tum i. Ciamanin amah veve khiah riim ruai tuh lo in tilret hnak mite bawipa hnenah khuan ngen i. 9Ciafangin Pathian in Daniel khiah tilret hnak mite bawipa in zarto thai in lo bawn i. 10Ciafangin tilret hnak mite bawipa in Daniel hnenah, “Na rong ei tuh le ding tuh na pe tu i bawipa kumpibawipa khiah kih ing. Ziangmanti fangin zaimanin kumpibawi pa in na khukpui te hnak in ning hmai khiah sia sawn in hmu tuh i? Ciafangin ningmah manin i nunhnak khiah lau kul tuh i.”ti in sawn i.
11Ciamanin Daniel in tilret mite uktu bawi in Daniel le Hananiah le Mishael le Azariah te khawngtu tuh ai dahhnak Melzar hnenah, 12“Na hnenumte khiah ni ha song cul tu. Ei tuhin sa tel lo rong le ding tuhin ti lek kin pe tu. 13Ciafangin kin mithmai le kumpibawipa eihnak rongur ei tu te mithmai thawn kin sik sah tulai, ciafangin na nuam bangin na hnenumte vumah bawn tu.”ti in rel i.
14Ciamanin ani khai amahte relhnak bangin lungkhim le ni ha song cul i. 15Ni ha khim fangin he te mithmai khiah kumpibawipa rongur ei tu te mithmai tah in pha sawn ai thau khai thau sawn i. 16Ciaman in amahte ei vo rongur le amahte ding tuhhnak capittizu khiah Melzar in lang sah ai amahte khiah sa tel lo rong pe i.
17Cen he tlangval pali te khiah Pathian in lai lamah le thiamhnak lamah fimhnak le thiamhnak pe i. Daniel in mangman hnak thu te khiah let thiam ai Pathian ai hmuhhnak thilte hmu thiam i. 18Kumpibawipa ruaihnak bangin amahte khiah a hnenah kawih tuh nia khim fangin, amahte khiah tilret mite bawipa in Nebukhadnezzar hmai ah kawih i. 19Kumpibawipa in amahte khiah pon fangin, amahte lakah Daniel le Hananiah le Mishael le Azariah bang minung tawk lo i. Ciamanin amahte in kumpibawi na per sah i. 20Amahte khiah kumpibawipa in thuzawt fangin, fimhnak le thiamhnak lamah kumpibawipa ukhnak ram song ai mitkher thiam te le tlahsan thiam te veksen tah in let ha in fim sawn khiah ling i. 21Daniel khai Kumpibawipa Sairas ukhnak kum khat tian naper i.