2 Samuel 5

<<  2 SAMUEL 5  >>

1Ciafangin Israel hin a veksenin Hebron ah David hnenah kawi ai, “Kinte khiah na ruh le na sa i peu i ing. 2Cen hlanlai ah Saul in kin uk fangin, nangmah khiah Israel mite suah tu le inn tlun tu i si. Bawipa in nangmah hnenah, ‘I minung Israel mite khaltu pa cang tuh i si. Cen Israel mite uktu i tuh i si.’ ti in na ti awng i.” ti in ti i. 3Ciamanin Israel mi upate veksen khai kumpibawipa hnenah Hebron ah kawi ai Kumpibawipa David in amahte thawn lungkhim dunhnak thukham khiah Bawipa hmai ah bawn i. Ciafangin amahte in David khiah Israel mite vumah kumpibawi cang tuhin ril i. 4David khiah kumpibawi a per pan fangin kum sawmthum i ai kum sawmli song uk i. 5Hebron ah Judah mite khiah kum sarih le hla ruk uk ai, Jerusalem ah Israel le Judah mite veksen khiah kum sawmthum le km thum uk i.

6Ciafangin kumpibawipa le a minungte khiah Jerusalem ai umtu Jebus te tawng tuh in feh i. Jebus te in David hnenah, “Heta ah lut thill tuh lo i si. Mitcaw le kawngbai te rinin na kham ben tuh i.” ti in ti i. Amahte in, “David in heta ah lut ben tuh lo i.” ti in ruat i.  7Ikhalselai David in Zion Buanhmun khiah lang ngah lio i. (Zion khiah David khuapui i.) 8Ciafangin cia nia ah David in, “Ti luang hmun kua in kaai in Jebus mite (David ai huahnak ke ze le mitcawte) neh tu pa khiah raalbawi upaber i tuh i.” ti in ti i. Ciamanin amahte in, “Mitcaw te le ke ze te in inn songah lut tuh lo i.” ti in ti i. 9Ciamanin David khai buanhmun songah um ai cia buanhmun khiah David khua ti in ko i. Ciafang in David in David khua khiah a hiang cingkim in Millo ai panin a songlam tian sa i. 10David khiah lian amam i. Ziangmanti fangin vancung mite Bawipa Pathian khiah amah thawn um i.

11Ciafang in Tyre kumpibawipa Hiram in nalaangte le lawithing le lettama le ukkhe satute khiah David hnenah kuat i. Amahte in David  inn sak i. 12Ciamanin David in Bawipa in amah khiah Israel kumpibawipa cang tuhin bawn zo khiah ling ai, a kumpibawi ukhnak ram khiah Israel mite ca in cungnung ruai khiah ling i. 13Ciafangin David in Hebron in Jersalem ah kawi fangin nu le nunawn tamngai khiah Jerusalem ah nai i. Cen David hnenah fapa le fenu khai tam amam in te i. 14Hete khiah David hnenah Jerusalem ah tehnak te i: Shammua, Shobab, Nathan, Solomon, 15Ibhar, Elishua, Nephek, Japhia, 16Elishama, Eliada le Eliphelet te i.

17David khiah Israel mite vumah kumpibawi tuhin ril i ti khiah Filistin te in za fangin, David sii tuhin, Filistin mite a veksen in feh i. Ikhalselai David in lo za lio manin ani khai buanhmun ah zu teu i. 18 Filistin te khai zu ve ai Rephaim Rawn zawllai ah tai tlang i. 19Ciafangin David in Bawipa hnenah zong ai, “Filistin te khiah tawng nga ing? I kut ah i ap nga sim?” ti in zawt i. Ciafangin Bawipa in David hnenah, “Feh tu. Ziangmanti fangin Filistin te khiah na kut ah na ap tuh rori ing.” ti in rel i. 20Ciamanin David khai Baal Perazim ah kawi ai, ciata ah Filistin te khiah neh lio i. Ciafang in David in, “Bawipa in i raalte khiah i hmai in ti ai lan bangin lan ruai i.” ti in ti i.  Ciamanin cia hmun khiah Baal Perazim ti in ko i. 21Filistin te in amahte milim zuk khiah ciata ah zam ai David le a minungte in cia milimte khiah phur sio i.

22Ciafangin Filistin te khai vel khat hong leh thio ai Rephaim Rawn zawllai ah tai tlang leh thio i. 23David in Bawipa khiah zong fangin, Bawipa in, “Amahte hnenah hong mah. Amahte hnualam in kim tulai malberi thingkung hmai in amahte khiah taih tu. 24Malberi thing vumin vak thlurhthlo aw na za fangin, a rang ngai in feh tu. Ziangmanti fangin ciafangin Bawipa khiah na hlan in Filistin raalkapte tawng tuhin feh zo i.” ti in rel i. 25Ciafangin David in Bawipa ruaihnak bangin bawn ai Filistin mite khiah Keba ai panin Kezer tianah hnawt i.

<<  2 SAMUEL 5  >>