2 Samuel 19

<<  2 SAMUEL 19  >>

1Ciafangin Joab khiah, “Kumpibawipa in Absalom  kah hnelhno i.”ti in rel i. 2Ciamanin cia nia ai raal nehhnak khiah mite in lungsiahnak in hmang i. Ziangmanti fangin mite in zaitluk in kumpibawipa khiah a fapa ca in lungsia i ti khiah rel za i. 3Ciafangin mite khai a thupniu in raal hmunin zakthi ngai in tlan tute bangin khua songah lut i. 4Ikhalselai kumpibawipa khai a lu khuk ai a cawm ngai in, “Aw Absalom, i fapa, i fapa.”ti in kap i. 5Ciafangin Joab khai inn songah kumpibawipa hnenah lut ai, “Tunnia ah na o tu na hnenumte le na fapate le na fenute le na nute le na nunawnte hmai khiah zakthi ruai i si. 6Ziangmanti fangin, nangmah in na raalte khiah it ai na rualte khiah hua i si. Na bawite le na hnenumte khiah zai khai siar lo i si. Ziangmanti fangin i hmuhnak ah, Absalom khiah nung hlen in, kin sawn kin thi berh selai, na ang tuh sawn in hmu ing. 7Ciamanin tunin tho tulai, na hnenumte hnenah a pha niu in pong tu. Ziangmanti fangin, Bawipa hming in cukcam ing, kawi hlah lesikhaw, tun zanah nangmah thawn aisu khai taang tuh lo i. Cia khiah na naupang lai ai panin tun tian na vumah rimsuhnak veksen tahin tlai tuh sawn i.”ti in ti i. 8Ciafangin kumpibawipa khai tho ai kawl dawngkham ah to i. Ciafangin amahte in mi veksen hnenah, “Kumpibawipa khiah kawl dawngkham ah to i.”ti in rel i. Mi veksenin kumpibawipa hmai ah kawi i. Ikhalselai Israel mite tu amahte inn ten ah tlung sio i.

9Ciafangin Israel hin te khiah a veksenin el dun ai, “Kumpibawipa in kin raalte kut songin kin o ai Filistin te kut songin kin luat ruai i. Cen tunin amah khiah Absalom manin ram songin tlan teu i. 10Cen kin uk tu tuhai kin rilhnak Absalom khai raaltawng hmunah thi zo i. Ciamanin zaimanin kumpibawipa khiah tlun leh tuh thu khiah kam khat bang khai rel lo i si?”ti in ti i.

11Ciafangin kumpibawipa David in Zadok le Abiathar  phungkite hnenah, “Judah mi upate hnenah, ‘Zaimanin kumpibawipa tlun leh tuhin ningte khiah a hnuataber i si? Israel mi veksen ai relhnak khiah kumpibawipa le a inn sang te hnenah hleng zo i. 12Ningte khiah i unau, i ruh le i taksa i si. Ciamanin zaimanin kumpibawi tlun leh tuhin ningte khiah a hnuataber i si? 13Cen Amasa hnenah, “Nangmah khiah i ruh le i taksa i lo i sim? Nangmah khiah Joab ca in a catlo in i raalkapte bawi cang hlah lesikhaw Pathian in a rauh ngai in i cawh tu seh.”ti in rel tuu-ih.’ti in ruai i. 14Ciafangin kumpibawipa in Judah mite thin khiah mi pakhat thin bangin khim ruai manin amahte in kumpibawipa hnenah, “Na hnenumte kawmin tlung leh tu hang.”ti in thu cah i. 15Ciamanin kumpibawipa khai tlung ai Jordan ah hleng i. Judah mi khai kumpibawi caang tuh le Jordan tanpui tuhin Kilkal ah hleng i.

16Ciafangin Bahurim ai Benjamin te Kera fapa Shimei khai a rang ngai in Judah mite kawmin David caang tuhin kawi i. 17Amah thawn Benjamin te thawngkhat le Saul hnenum Ziba le a fate hlainga le a hnenumte kul khai um ai kumpibawipa hmai in Jordan khiah tan i. Amahte khiah kumpibawipa innkuate le kumpibawi ai daihhnak khiah bawn tuhin Jordan run khiah tan i.  Ciafangin Kera fapa Shimer khiah kumpibawi hmai ah bok ai, 19kumpibawipa hnenah, “I bawipa in mawh i hluk ma selaw. Jerusalem in na tlan fangin i bawn khelhhnak khai lo i hih sah ma seh. Kumpibawipa in a thin songah lo khawi ma seh. 20Ziangmanti fangin na hnenum in i sual te khiah ling ing. Ciamanin Joseph hin songin i bawipa kumpibawipa na caang tuhin a hmasaber feh tu ing.”ti in ti i. 21Ikhalselai Zeruiah fapa Abishai in, “He manin Shimei khiah rek pha lo im? Ziangmanti fangin amah in Bawipa rilhnak pa khiah awrsia cam i.”ti in ti i. 22Ciafangin David in, “Ning Zeruiah fate, ning ai i tawng tuh heh, ning thawn i senghnak zai um i? Tunnia ah Israel ram songah aisu khiah thi ruai tuh i sing? Ziangmanti fangin kaimah khiah Israel mite vumah kumpibawi ing ti khiah ling lo ing?”ti in ti i. 23Ciamanin kumpibawipa in Shimei hnenah, “Na thi tuh lo i.”ti in ti ai kumpibawipa in amah hnenah thukham i.

24Ciafangin Mephiboseth khai kumpibawipa caang tuhin kawi i. Amah khiah kumpibawipa tlan nia ai panin a remniu in a tlung leh nia tian, a kete khai fun lo, a kahmul khai met lo, a thilthuamte khai sawp lo i. 25Jerusalem ah kumpibawipa tawk tuhin kawi fangin, kumpibawipa in amah hnenah, “Mephiboseth, zaimanin kai thawn tlan lo i si?”ti in zawt i. 26Ciafangin amah in, “I bawipa, Aw kumpibawipa, i hnenum in i zawl i. Ziangmanti fangin na hnenum khiah a ke ze manin, na hnenum in, ‘lak to in kumpibawi hnenah feh tuhin lak kung i phurh sah tu.’ti in ruai ing. 27Amah in na hnenum kaimah khiah i bawipa kumpibawi hnenah i zuar i. Ikhalselai i bawipa kumpibawipa khiah Pathian vancung mi bang i. Ciamanin a pha ti ai na hmuhnak bangin bawn tu. 28Ziangmanti fangin i bawipa kumpibawipa hmai ah i paa inn songkhat khiah mithi bang i ing. Ikhalselai na hnenum khiah na cabuai rori ah rongei tuhin i dah i si. Ciamanin kumpibawi hnenah zai cam tuhhnak a khuan nai ing?”ti in ti i. 29Ciafangin kumpibawipa in amah hnenah, “He thu khiah zai rel kul i hang? Na lo khiah Ziba thawn khan tuu-ih.”ti in rel i. 30Ciafangin Mephiboseth in kumpibawipa hnenah, “I  bawipa kumpibawipa khiah a him niu in amah inn ah hleng leh i hang. Ciamanin amah in a veksenin ping tu sio seh.”ti in sawn i.

31Ciafangin Kilead mi Barzillai khai Rokelim in zu ai, kumpibawipa tlun tuhin kumpibawipa thawn Jordan khiah tan i. 32Barzillai khiah kum tar ngai i ai kum sawmriat i. Amah khiah milian ngai manin, kumpibawipa khiah Manahaim ah umteng fangin rong cawm i. 33Ciafangin kumpibawipa in Barzillai hnenah, “Kai thawn feh tulai Jerusalem ah na cawm tuh ing.”ti in ti i. 34Ciafangin Barzillai in kumpibawipa hnenah, “Nang thawnin Jerusalem ah feh tuh tu zaicam tian i nung tuh i? 35Tunnia ah kum sawmriat i khim zo i. A pha le a pha lo khiah thia thiam awng? Na hnenum in a eihnak rong le a dinghnak ti khiah a ur le ur lo khai ling awm? Pasal le nupangte lasahnak tang za ben awng? Ciamanin zaimanin na hnenum in i bawipa kumpibawipa khiah hnaihnokhnak pe tuh ing? 36Na hnenum in kumpibawipa thawn Jordan khiah a tlawmniu tian na feh pui ngang. Ziangmanin kumpibawipa in he tluk in i tham tuh i si? 37Na hnenum khiah ninghio in let  leh ngangkhaw, i umhmun khua ah i thi tu selai, i paa le i nuute hlan hiang ah i vui tu seh. Ikhalselai na hnenum Chimham zong i bawipa kumpibawipa thawn feh tu seh. Na nuam bangin a vumah bawn tu.”ti in sawn i. 38Ciafangin kumpibawipa in, “Chimham khiah kaimah thawn kawi tuh i. Na daihhnak bangin a vumah bawn tuh ing. Na ruaihnak bangin na bawt tuh ing.”ti in sawn i. 39Ciafangin mi veksen khai Jordan khiah tan i. Kumpibawipa khai tan ben fangin, kumpibawipa in Barzillai khiah thut ai hmuifu bur i. Ciafangin ani khai a innah tlung i. 40Ciafangin kumpibawipa khai Kilkal ah feh ai Chimham khai amah thawn feh ve i. Judah mi veksen le Israel mi hrekkhatte in khai kumpibawipa khiah kawih i.

41Ciafangin Israel mi veksenin kumpibawipa hnenah kawi ai, kumpibawipa hnenah, “Zaimanin kin unaute Judah mite in na ru ai kumpibawipa le a inn songkhatte le David thawn umtu mi veksen khiah Jordan run tan pui i?”ti in zawt i. 42Ciafangin Judah mi veksenin Israel mite khiah, “Kumpibawipa khiah kin unau i. Ciamanin zaimanin he thu lakah thin ning raw i? Kumpibawipa rong khiah ei sah aw ing? Cen lehsawng tang kin sum awm?”ti in sawn i. 43Ciafangin Israel mite in Judah mite khiah, “Kumpibawipa lakah hmunha nai i ing. Cen ning hnak in David lakah tavuan lian sawn nai i ing. Ciamanin zaimanin  kin kumpibawipa khiah tlun leh fangin kin ruathnak khiah kin zawt hmasa lo in nau kin tat i si?”ti in ti i. Ikhalselai Judah mite ponghnak khiah Israel mite ponghnak tahin thupui sawn i.

<<  2 SAMUEL 19  >>