2 Samuel 12

<<  2 SAMUEL 12  >>

David le Nathan thu

1Ciafang in Bawipa in Nathan khiah David hnenah kawi ruai i. Nathan khai David hnenah hleng ai, David hnenah, “Khua pakhat songah mi panih um i. Pakhat paa tu milian i. A khatta paa tu mifarah i. 2Milian paa in tu le kawlpawlte nai bial i. 3Ikhalselai mifarah paa in tu niu pakhat lek nai i. Cia tu khiah amah in lai ai a fak pe i. Cia tu niu khiah amah thawn le a fate thawn khaang khat ai, amah rong ei sah ai a khuat songin ti ding sah i. Cia tu niu khiah a kaang songah mitmu ai cia pa in a fenu bangin ruat i. 4Ciafangin mikhual pakhat khiah milian paa inn ah hleng i. Ikhalselai milian paa in a hnenah tlawng tu mikhual ca in a tu le a kawlpaw te khiah ro siang lo ai, mifarah paa tu niu khiah lang sah ai, a hnenah tlungtu mikhual pa ca in ro i.”ti in rel i. 5Ciafangin David khiah cia mi pa lakah thinrawn bik ai,  Nathan hnenah, “Bawipa nung song hmuah in, ciatih bang ai bawn tu pa khiah thi tuh rori i. Amah in ciatih ai bawn ai ninghiohnak nai lo manin amah in a let li in rul tuh i.”ti in ti i.

7Ciafangin Nathan in David hnenah, “Cia paa khiah nangmah i si. Bawipa Israel Pathian in, ‘Israel kumpibawi cang tuhin na ril ing. Saul kut songin na luat ruai ing. 8Na bawipa inn na pe ing. Na bawipa nute khiah na kaang songah na pe ing. Israel le Judah mite na pe ing. Ciate khiah a tlawm ze i ta selai, hete le khiate khai na pe tuh napui i lai ing. 9Zaimanin Bawipa thukham khiah zauhsuam in a hmai ah sual i si? Nangmah in Hit mi Uriah khai vangsau thawn rek ai a nu khiah nu sah i si. Uriah khiah Ammon te vangsau thawn rek i si. 10Ciamanin vangsau khiah na inn songin tlan tuh nawn lo i hang. Ziangmanti fangin nangmah in zauh i suam ai Hit mi Uriah nu khiah nu sah i si.’ti in na ti i. 11Cen Bawipa in, ‘Na inn sang songin na tawng tuh in a pha lo suak ruai tuh ing. Na nute khiah na mit hmuh in na lang sah tuh ai, na ompui paa pe tuh ing. Cia paa in sunlai var in na nuute thawn itkhat tuh i. 12Nangin he khiah a thupniu in bawn i si. Ikhalselai kai in Israel mi veksen hmai le sunlai var in bawn tuh ing.’ti in ti i.”ti in rel i. 13Ciafangin David in Nathan hnenah, “Bawipa hnenah i sual te i.”ti in ti i. Ciafangin Nathan in David hnenah, “Bawipa in khai na sual na hlat zo i. Na thi tuh lo i. 14Ikhalselai he manin Bawipa raalte in Bawipa zauhsuamhnak tuh a khuan na pe manin, na hnenah tehnak na fa khai thi tuh rori i.”ti in rel i.

15Nathan khai a inn ah tlung i. Ciafangin Bawipa in Uriah nu in David hnenah cawihnak fa khiah seu ai cia nau khai ur pan i.  16Ciamanin David in cia nau niu ca in Pathian hnenah ngen ai ani khai rongul ai a inn songah lut ai laipuai ah zan khuavar taal i. 17A inn ai mi upate khai tho ai amah hnenah kawi ai, David khiah laipua vumin tho pui tum i. Ikhalselai David in tho nuam lo ai amahte thawn rong khai ei nuam lo i. 18Ni sarih nia fangin nau niu khai thi lio i. Ciafangin a hnenumte in nau nio thil lio khiah David rel tuh ngam lo i. Ziangmanti fangin amahte in, “Nau niu a nung lai in amah khiah rel ai amah in kin relhnak thu kin ngai sah lo i. Ciamanin nau niu thi lio khiah rel singlai amah veve a pha lo zai bawn ni tur?”ti in ti i. 19Ikhalselai David in a hnenumte a hiohio ai pong khiah za fangin, David in nau niu thi zo khiah ling i. Ciamanin David in a hnenumte hnenah, “Nau niu thi lio i hang?”ti in zawt i. Amahte in, “Thi lio i hang.”ti in sawn i. 20Ciafangin David khai laipua in tho ai, takhlu ai thau nawih ben fangin, a thilthuam khiah thleng ai, Bawipa inn ah kawi ah Bawipa khiah bia i. Ciaben fangin ani khai a inn ah tlung ai rong bawn ruai ai amahte bawnhnak rong khiah ei i. 21Ciafangin a hnenumte in amah hnenah, “He na bawnhnak khiah ziang i pa? Nau niu a nung lai in nau niu ca in rongul ai kap i si. Ikhalselai nau niu thi lio fangin tho ai rongei ang si.”ti in zawt i. 22Ciafang amah in, “Nau niu khiah a nung lai in, rongul ai kap ing. Ziangmanti fangin, ‘Bawipa in ngaih lo i har thai ai nau niu khiah lo nung ruai thai pang i lo im?’ti in ruat ing. 23Tun tu nau niu khai thi lio hang. Zaimanin rongul tuh ing?Amah khiah nung ruai leh thill ing?Amah hnenah kawi thai ing. Inapui ani in i hnenah kawi tuh lo i.”ti in sawn i.

24David in a nu Bathsheba khiah thinnuam ruai ai amah thawn itkawm le cia nuu in fapa niu nai ai David in cia fapa khiah Solomon ti in a hming sa i. Bawipa in amah khiah it i. 25Ciamanin Bawipa in prawfet Nathan khiah kawi ruai ai cia fapa khiah Jedidiah ti in a hming sa i.

26Ciafangin Joab in Ammon mite Rabbah khiah tawng ai kumpibawi khua khiah lang sah i. 27Ciafangin Joab in David hnenah, “Rabbah khiah tawng ai a khua ti zuhmun tlau khiah lang zo ing. 28Ciamanin a taanghnak mite khiah hmunkhat in khawm tulai, cia khua khiah kulh tu. Cialo fangin kaimah in cia khua khiah lang tuh ai cia khua khiah i hming in ko tuh ing.”ti in rel tuhin nalaangte hlat i. 29Ciafangin David in minungte khiah hmunkhat in khawm ai, Rabbah ah feh ai Rabbah khiah tawng le lang lio i.  30Ciafangin amah in amahte kumpibawipa lukhuk khiah a lu in long sah i. Cia lukhuk khiah sui  le lungto mankhungte thawn bawnhnak i ai talan pakhat rit i. Cia lukhuk khiah David lu ah khuk i. David in cia khua songai thil tamngai khiah sut sah i. 31Cia khua ai mite khiah David in lang ai, hluah le thir taruang le haihpui thawn naper tu tuhin  le ukkhe em tutuh in dah i. Ciatih bangin Ammon khua cang ai mite khiah bawn i. Ciafangin David le a minung veksen khiah Jerusalem ah tlung leh i.

<<  2 SAMUEL 12  >>