2 Samuel 10

<<  2 SAMUEL 10  >>

1He hnua fangin Ammon mite kumpibawipa thi ai a fapa Hanun in kumpibawi cang i. 2Ciafangin David in, “A paa Nahash in ngaih i har awng bangin, a fapa Hanun khiah ngaihharhnak hmuh tuh ing.”ti in ti i. Ciamanin David in a paa thi manin topui tuhin, Hanun hnenah a hnenumte khiah hlat i. Ciafangin David hnenumte khai Ammon mite ramah hleng i. 3Ciafangin Ammon mi upate in amahte bawipa Hanun hnenah, “David in na paa khiah upat manin na topui tuhin a hnenumte hlat vuah i aw sim? David in a hnenumte khiah na khuapui khiah sii tuh le cul tuh le tawng tuhin a hnenumte hlat i lo im?”ti in ti i. 4Ciamanin Hanun in David hnenum te khiah pom ai, amahte kahmul a tlamhmat khiah met sah ai,amahte thuam khiah a tun tianin a laiteng in at sah ai tlung ruai i. 5Amahte in David khiah cia thu rel fangin, amahte khiah zakthi ze manin amahte tawk tuhin mi dang hlat i.  Kumpibawipa in, “Jerikhu ah ning kahmul khang leh hlanlo um tu i lai, ciafangin tlung tuu-ih.”ti in ruai i.

6Ammon mite in amahte khiah David hmai ah a uih khiah hmu fangin, Ammon mite in Bethrehob le Zoba ai Siria raalkapte thawngkul le kumpibawipa Maakah hnenin raalkap thawngkhat le Ishtob hnenin mi thawnghlainih nga i. 7Cia khiah David in za fangin, Joab le a raalbawite khiah a veksenin kuat i. 8Ammon mite khai suak ai, raaltawng tuhin kawl dawngkham ah pai i. Cen Zoba le Rehob le Ish-Tob le Maakah ai Siria mite khai amahte lekin lo lai ah um i. 9Ciafangin Joab in a raalte khiah a hmai ah le a hnualam ah hmu fangin, a raalpha ber Israel mite khiah Siria te tawng tuhin pai i. 10A taanghnak Israel minungte khiah Ammon mite tawng tuhin a nau Abishai kut ah ap i. 11Ciafangin Joab in, “Siria mite in i neh tum lekhaw, i bawm tuh i si. Ikhalselai Ammon mite in na neh tum lekhaw, na bawm tuhin kawi tuh ing. 12Raalpha in um tuu-ih. Kin minungte le kin Pathian khuapuite ca in pasal bang in tawng nga sing. Bawipa in a pha bangin bawn tuh i.”ti in rel i. 13Joab khai Siria mite tawng tuhin a raalkapte thawn a nong ah kawi  fangin, Siria te khai Joab hmai in dawp i. 14Ammon mite in Siria mite tlan hmu fangin, anite khai Abishai hmai in tlan ai khua songah lut i. Ciamanin Joab khai Ammon mite hnenin let ai, Jerusalem ah hleng i.

15Siria mite in Israel mite in neh lio khiah hmu fangin, anite khai hmunkhat in khawm tlang i. 16Ciafangin Hadadezer in run ralkhat ai Siria mite khiah cah ai anite khai Helam ah hleng i. Ciafangin Hadadezer raalbawipa Shobach khai amahte hmai in feh i. 17Cia thu khiah David rel fangin, David khai Israel mite khiah a veksenin hmunkhat in khawm ai, Jordan khiah tan ai Helam ah hleng i. Siria te khai David tawng tuhin pai ai David khiah tawng i. 18Ciafangin Siria mite khai Israel mite hmai in tlan i. David in Siria te siphuh leng zasarih totu mi te le siphuh totu thawnsawmli le amahte raalbawipa Shobach khiah rek ai ciata ah thi i. 19Hadadezer hnenum kumpibawite veksenin amahte khiah Israel mite in neh khiah hmu fangin, anite khai Israel mite hnenah remhnak si ai Israel mite hnenum cang i. Ciamanin Siria mite in Ammon mite khiah bawm ngam lo i.

<<  2 SAMUEL 10  >>

Recent Posts