1Ciafangin prawfet fate in Elisha hnenah, “Nangmah thawn ai kin umhmun inn khiah a cik ze i. 2Jordan ah feh nga singkhaw, ciata in luangkiang pakhat ten phur nga singkhaw, kin umhmun tuhin inn sa nga sing.” ti in ti i. Ciafangin Elisha in, “Feh tuu-ih.” ti in sawn i. 3Ciafangin pakhat in, “Na hnenumte kawm in feh tuh ve in lung na khim tu seh.” ti in ti i. Ciafangin amah in, “Feh tuh ve i ing.” ti in sawn i. 4Ciamanin ani khai amahte kawmin feh i. Anite khai Jordan ah hleng fangin thing vawng i. 5Mi pakhat in thing vawng fangin, thir haihpui lu khiah ti songah tlok teu i. Ciamanin ani khai au ai, “I bawipa, he haihpui khiah mi hnenin zawnghnak i.” ti in ti i. 6Ciafangin Pathian minung paa in, “Akonah tlok i?” ti in zawt i. Amah in a tlok hmun khiah hmuh i. Ciafangin Elisha in thingkak pakhat khiah cem ai, cia haihpui tlok hmunah sep i. Ciafangin amah in cia thir haihpui lu khiah ti vumah daak ruai leh i. 7Ciamanin amah in, “Nangmah in khul tu hang.” ti in ruai i. Ciamanin ani khai a kut thawn haihpui lu khiah khul i.
8Ciafangin Siria kumpibawipa in Israel khiah sim tum i. Ciafang in a hnenumte kawmin thu sawm dun ai, “Ciata le khiata ah caam tuh i sing.” ti in rel i. 9Ciafangin Pathian minung paa in Israel kumpibawipa hnenah, “He lam in kawi malaw; ziangmanti fangin Siria mite khiah cia lamin kawi tuh ikhaw.” ti in rel i. 10Ciamanin Israel kumpibawi pa in Pathian minung paa ai relhnak hmun khiah chek de i. Ciatih in Elisha in kumpibawipa khiah vel tampui ralring tuhin rel de i. 11Ciamanin Siria kumpibawipa khai he thu manin thincawl ngai ai, a hnenumte khiah ko ai, “Kin lakah aisu ber in Israel kumpibawipa bawm tu khiah i rel tuh lo i sim?” ti in zawt i. 12Ciafangin a hnenum pakhat in, “Aw i bawipa, kumpibawi, aisu in khai bawm lo i ing. Ikhalselai Israel ram ai umtu Elisha tihnak prawfet in, na khuahluan khaan songai na ponghnak khiah Israel kumpibawipa rel i.” ti in sawn i.
13Ciamanin amah in, “Feh in a umhmun khiah zong tu i lai, amah pom tuhin hlat tuh ing.” ti in ti i. Ciafangin amah hnenah, “Amah khiah Dothan ah um tuh rori i.” ti in rel i. 14Ciamanin amah in siphuh le siphuh lengte le raalkap tam ngai khiah feh ruai ai, zanlai in fehai cia khua khiah kulh i. 15Pathian minung paa hnenum khai zing in tho ai sumpua ah suak fangin, raalkapte in siphuh le siphuh leng thawn cia khua kulh khiah hmu i. Ciafangin a hnenum in amah hnenah, “Bawipa, zai bawn nga sing?” ti in zawt i. 16Ciamanin amah in, “Lau mah. Ziangmanti fangin kin thawn umtute khiah amahte thawn umtute tahin tam sawn i.” ti in sawn i. 17Ciafangin Elisha in sawngen ai, “Bawipa, amah in hmu thai in a mit hong sah tuh in ninghio na ngen ing.” ti in ti i. Ciafangin Bawipa in tlangval pa mit khiah hong sah ai ani khai hmu i. Elisha hiang cingkim ai mual vumah mai siphuh le mai siphuh leng um bial khiah hmu i. 18Ciamanin Siria raalkap te khiah a hnenah kawi fangin, Elisha in Bawipa hnenah, “He mite khiah mitvai ruai tuh sio in ninghio na ngen ing.” ti in sawngen i. Ciafangin Bawipa in Elisha ai ngenhnak thu bangin amahte khiah mitvai ruai berh i.
19Ciafangin Elisha in amahte hnenah, “Ning feh nuam hmun lampui le khua khiah he lampui le he khua i lo i. I hlun tuu i lai, ning sii hnak paa hnenah ning kawih ngang.” ti in ti i. Ikhalselai amah in amahte khiah Samaria ah kawih i. 20Amahte khiah Samaria ah hleng fangin, Elisha in Bawipa hnenah, “Amahte in khuahmu thai in amahte mit khiah hong sah tu.” ti in ngen i. Ciafang in Bawipa in amahte mit khiah hong sah ai anite khai khuahmu i. Ciafangin amahte khiah Samaria khua songah hleng i. 21Israel kumpibawi pa in amahte khiah hmu fangin, Elisha hnenah, “I paa, amahte khiah rek ngang? Amahte khiah rek ngang?” ti in ti i. 22Ciafangin Elisha in, “Amahte khiah rek tuh lo i si. Na vangsau le kahpuk thawn na pomhnak thawngtlate khiah rek tur sim? Amahte in ei tuh le ding tuhin rong le ti pe tulai, amahte bawipa hnenah tlung tu seh.” ti in ruai i. 23Ciafangin amah in amahte ca in puai lianpui bawt i. Amahte in ei le ding ben fangin, amahte khiah tlung ruai ai anite khai amahte bawipa hnenah let leh i. Ciamanin Siria mite in Israel ram khiah rok leh lo i hang.
24Cia hnua ah Siria kumpibawipa Ben-Hadad in a raalkapte khiah a veksenin khawm ai Samaria khiah sim ai kulh i. 25Ciafangin Samaria ah rian a rauh ngai in tlung i. Ciatih in amahte in Samaria khiah kulh ai lak lu pakhat khiah tangka shekel sawmriat in zuar ai, khuro ek kuak hrek khiah tangka shekel panga in zuar i. 26Ciafangin Israel kumpibawipa khiah khua kulhhnak khan vumin vak fangin, nupui nuu pakhat in amah hnenah, “I bawipa, kumpibawipa, i bawm tu.” ti in au i. 27Ciafangin kumpibawipa in, “Bawipa in na bawm hlahlekhaw, akon in na bawm ben tuh ing? Rongcil hmun le capitti rial hmunin na bawm thill tuh ing?” ti in sawn i. 28Ciafangin kumpibawipa in cia nuu hnenah, “Zaimanin thin na tok i pa?” ti in zawt i. Cia nuu in, “He mi nuu in, ‘Na fapa tunnia ah ei nga singkhaw, thangha ah i fapa ei nga sing.’ ti in i ti i. 29Ciamanin kin khai i fapa khiah suang ai ei i ing. A thangha fangin cia nuu hnenah, ‘Na fapa ei nga sing.’ ti in i zawt fangin, a fapa khiah thup lio i.” ti in rel i.
30Kumpibawipa in cia nuu thu za fangin, a thuam khiah zik ai, cia khua kulhhnak khan vumah a vak fangin, kumpibawipa in a thuam songah vaidip sil khiah mite in hmu i. 31Ciafangin amah in, “Shaphat fapa Elisha lu khiah tunnia ah a ruang vumah um hlen lekhaw, Pathian in a rauh ngai in i cawh tu selaw.” ti in ti i. 32Ikhalselai Elisha khai a inn songah mi upate thawn to tlaang i. Ciafangin kumpibawipa in a hnenum khiah a hmai in Elisha hnenah hlat i. Ikhalselai cia hnenum khiah a hnen ah hleng hlanah, Elisha in upate hnenah, “He mirek tu fa in i lu i lang sah tuhin a hnenum hlat khiah hmu aw i sim? A hnenum hleng fangin, a hnua in dawngkham tu lio i lai, amah khiah dawngkham tuu-ih. A bawipa ke pau khiah a hnenum hnua ah i lo im?” ti in ti i. 33Ciatih ai a pong laitak in, cia hnenum khiah a hnenah hleng ai, amah in, “He rimsuhnak khiah Bawipa hnenin hleng i lo im? Ziangmanin Bawipa khiah hlun tuh hnelhno i lai ing?” ti in ti i.