Elisha le Nupui nu thau thu
1Prawfet fate ai nute pakhat khiah Elisha hnenah, “Na hnenum i pa khiah thi lio i. Cen na hnenum in Bawipa kih khiah ling i si. Cen laibat phing tu pakhat in i fapa panih khiah a hnenum cang tuhin i lang sah tum i.”ti in rel i. 2Ciamanin Elisha in amah hnenah, “Zai na bawt sah tuh ing. Inn songah zai nai i si, i rel tu?”ti in ti i. Cia nuu in, “Na hnenum nuu in inn songah thau pung khat lo zai khai nai lo ing.”ti in sawn i. 3Ciafangin amah in, “Feh tulai, a konkon ai na ompuite veksen hnenin pung lawng zawng tu. A tlawmniu lek zawng mah ih. 4Inn songah na tlum fangin, na fapa le nangmah hnua ah dawngkham tu. Cia thau khiah he pungte veksen songah thun tulai a dim fangin a tum ce in dah tu.”ti in ti i. 5Ciamanin ani khai amah hmunin tlung ai, a fate in pung khiah a hnenah kawih ben fangin anite khai dawng kham ai, thau khiah pung songah thun i. 6A pung khiah dim sio fangin, cia nuu in a fate hnenah, “Pung dang kawih rih tuu-ih.”ti in ti i. Ciafangin a fapa in, “Pung dang um lo i hang.”ti in sawn i. Ciafangin thau khai luang awl i. 7Ciafangin ani khai kawi ai Pathian minung pa rel i. Ciafangin amah in, “Feh in na thau khiah zuar tulai, na laiba khiah rul tu. Cen a taanghnak khiah nangmah le na fate in hmang tuu-ih.”ti in rel i.
Elisha in Shunam nuu fa nung ruai thu
8Ni khat nia ah Elisha khai Shunem ah feh i. Cia khua ah nupui milian pakhat um ai cia nuu in Elisha khiah rongei tuh in ko bel i. Ciamanin Elisha khai cia lamah feh cang fangin, cia nuu inn ah rongei tuhin vun de i. 9Ciafangin cia nuu in a pa hnenah, “He pa khiah Pathian cianghlim minung i ti ling ing. Cen a catlo in kin khel tio i. 10Inn cungah khaan pakhat rem sah nga singkhaw, amah ca in khuahluan pakhat le cabuai le tauhkheng le mai-inn varhmun cabuai niu bawt nga singkhaw kin vun caang fangin, he ta ah caam thai i.”ti in ti i. 11Ciafangin ni khat nia ah ani khai ciata ah hleng ai, cia inn cungta khaan ah lut ai ciata ah taal i. 12Ciafangin a hnenum Kehazi hnenah, “He Shunem nuu khiah ko tu.”ti in ruai i. Cia nuu khiah ko ben fangin, cia nuu khai a hmai ah ding i. 13Elisha in Kehazi hnenah, ‘Kin ca in he zah kin bawt i si. Zai na bawt sah nga ing? Kumpibawipa hnenah ihlahle raalbawipa hnenah pon sah na daih maw?’ti in rel tu.,”ti in ruai i. Ciafangin cia nuu in, “I minungte lakah inn nai in um ing.”ti in sawn i. 14Ciamanin Elisha in, “Zai bawt sah pha i pa?”ti in ti i. Ciafangin Kehazi in, “Thungai in amah in fapa nai lo i. Cen a pa khai tar zo i.”ti in sawn i. 15Ciafangin amah in, “Cia nuu khiah ko tu.”ti in ruai i. Cia nuu khiah ko fangin, cia nuu khai dawngkham ah ding i. 16Ciafangin Elisha in, “Tunhnua kum khat tun camcu fangin fapa niu cawi tuh i si.”ti in rel i. Ciafangin cia nuu in, “I lo i, i bawipa. Pathian minung pa, na hnenum nuu khiah zawl mah.”ti in sawn i. 17Elisha in amah hnenah relhnak khiah a cuu khim fangin, cia nuu khai naupaai ai fapa niu in nai i.
18Ciatih bangin nau niu khai khaang i. Ni khat nia ah cia naupang niu khai a paa hnenah, rongkhawmtute hnenah kawi i. 19Ciafangin amah in a paa hnenah, “I lu, i lu!” ti in ti i. Ciamanin a paa in a hnenum hnenah, “A nuu hnenah phur tu.”ti in ruai i. 20Cia hnenum pa in a nuu hnenah kawih fangin, cia naupang niu khai a nuu khuk vumah sun tian to ai, ciafangin thi lio i. 21Ciafangin cia nuu khai inn songah lut ai Pathian minung pa khuahluan vumah naupang niu khiah zau ben fangin dawng khaam ai, sumpua ah suak i. 22Ciafangin a pa khiah ko ai, “Pathian minung paa hnenah feh in tlung leh tuhin, tlangval pakhat le lak pakhat i kuat tu.”ti in ti i. 23Ciamanin amah in, “Zaimanin amah hnenah tunnia kawi na nuam i? Hla Thar khai i lo i. Cen Sabbath khai i lo i.”ti in ti i. Ciafangin amah in, “Poi lo i.”ti in sawn i. 24Ciafangin cia nuu in lak vumah a kung tauh ai a hnenum hnenah, “Hmai ah feh tulai, na rel hlahlengkhaw, fuung tau mah.”ti in ruai i. 25Ciatih in ani khai feh ai, Kharmel Mual ai Pathian minung paa hnenah feh i. Pathian minung paa in cia nuu khiah a hla ngai in hmu fangin, a hnenum Kehazi hnenah, “Sik tu, Shunem nuu khiah. 26Ninghio in amah caang tuhin dawp tulai, amah hnenah, ‘Na cak awm? Na pa tang cak awm? Na fa tang cak awm?’ti in zawt tu.”ti in ruai i. Ciafangin cia nuu in, “Cak i,.”ti in sawn i. 27Mual vumah Pathian minung paa hnenah hleng fangin, cia nuu in amah khiah a ke in pom i. Ikhalselai Kehazi khai a nong ah kawi ai cia nuu khiah tuul tuum i. Ikhalselai Pathian minung paa in, “Amah khiah hnaihnok mah. Ziangmanti fangin amah khiah thin rimsu ngai i. A rimsuhnak khiah Bawipa in i rel lo ai i hmunin thup i.”ti in ti i. 28Ciafangin cia nuu in, “I bawipa khiah fapa na ngen aw ing? ‘I zawl malaw.’ti in na ti lo ing?”ti in ti i. 29Ciafangin amah in Kehazi hnenah, “Ralring tu vut lai, i tokrolh khiah na kut in sin in feh tu teu. Mi pakhat bang khai tawk lesikhaw, pon veng mah. Cen mi pakhat khat in na pon lekhaw, sawn tau mah. Ikhalselai i tokrolh khiah naupang niu hmai ah zau tu.”ti in ruai i. 30Ciafangin naupang niu nuu in, “Bawipa nung bangin le na nung bangin, na hnenin feh tuh lo ing.”ti in ti i. Ciamanin ani khai tho ai cia nuu khiah hlun i. 31Kehazi khai amahte hlan in feh ai, a tokrolh khiah naupang niu hmai ah zau i. Ikhalselai naupang paa in pong khai pong lo, za kha za lo i. Ciamanin ani khai amah tawk tuhin let ai, amah hnenah, “Naupang niu khiah phawk lo i.”ti in rel i.
32Elisha khai inn songah tlum fangin, cia naupang niu khiah a khuahluan vumah a thi in zau i. 33Ciafangin ani khai khaan songah tlum ai, dawng khaam ben fangin, Bawipa hnenah sawngen i. 34Ciafangin ani khai tho ai naupang niu vumah bok ai, a kaa khiah naupang niu kaa vumah dah ai, a mit khiah naupang niu mit vumah dah i. Cen a kut khai naupang niu kut vumah dah i. Ciafangin ani khai naupang niu vumah taal le ciafangin naupang niu ruang khai lum i. 35Ciafangin ani khai tho ai inn songah vak thliahthlo le khaan songah tlum ai naupang niu vumah taal leh thio i. Ciafangin naupang niu khai vel sarih haihthin le a mit khiah hong i. 36Ciafangin ani in Kehazi khiah ko ai, “Shunem nuu ko tu.”ti in ruai i. Ciamanin ani in cia nuu khiah ko i. Cia nuu khiah a hnenah tlum fangin, amah in, “Na fapa khiah daang tu.”ti in ruai i. 37Ciamanin ani khai tlum ai, a ke laipua ah bok i. Ciafangin a fapa khiah daang ai sumpua ah suak i.
38Elisha khai Kilkal ah let leh i. Ciafangin cia ramah rian tlung i. Ciafangin prawfet fate khiah Elisha hmai ah to tlang ai, Elisha in a hnenum hnenah, “Prawfet fate ca in bel lianpui thawn kawk suang tu.”ti in ruai i. 39Ciamanin mi pakhat khai lo ah hinzu sii tuhin feh ai, uum ri pakhat khiah tawk ai, a kaang dim in uum thai khiah loih ai, vang in at ben fangin, kawk songah hlah i. Inapui in amahte in zai bang uum i ti khai ling lo i. 40Ciafangin cia kawk khiah amahte in ei tuhin suah i. Amahte in cia kawk khiah ei fangin, anite in, “Aw, Pathian mi pa, bel songah thihhnak um i.”ti in ti ai anite in khai cia kawk khiah ei awl i. 41Ciamanin amah in, “Ilekhaw sangvut kawih tuu-ih.”ti in ruai i. Ciafangin ani in cia sangvut khiah bel songah hlah ai, “Amahte in ei tuhin suah tuu-ih.”ti in ti i. Ciafangin cia bel songah ai urhnak um leh lo i.
42Ciafangin Baal Shalisha in mi pakhat khiah fangthar sang le kawlkawn sang hlom kul le fangthar sawng khiah ruksaih in phur ai Pathian minung paa hnenah kawih i. Ciafangin amah in, “Amahte in ei tuhin mite khiah pe tu.”ti in ruai i. 43Ciafangin a hnenum in, “Zai rel i si? Mi zakhat hmai ah he rong khiah dah ngang?”ti in ti i. Amah in, “Amahte in ei tuhin mite khiah pe tu. Ziangmanti fangin Bawipa in, ‘Amahte in ei tuh ai a khamval khai um tuh i.’ti in ti i.”ti in rel i. 44Ciamanin ani in cia rong khiah amahte hmai ah dah i. Amahte in ei ai, Bawipa thu bangin, a khamval khai um i.