2 KINGS 18

<<  2 KINGS 18  >>

1Elah fapa Israel kumpibawipa Hoshea ukhnak kum thum fangin, Judah kumpibawipa Ahaz fapa Hezekiah khiah kumpibawi cang i. 2Amah khiah kumpibawi cang pan fangin kum kul hluannga i ai Jerusalem ah kum kul hluankua uk i. A nuu hming khiah Abi i ai, Zekhariah fenu i. 3Amah in Bawipa hmai ah a pa David ai bawnhnak hmuahhmuah bangin a hman niu in bawn i.

4Amah in a saanghmun ai raithawi hmunte khiah bal sio ai, mizuk le milimte khiah hnawm sio i. Cen Moses in dar thawn bawnhnak rul khai a cik niuniu in khoi sah sio i. Ziangmanti fangin cia hlan hmuah Israel mite in cia rul hmai ah rimhmui tai ai cia rul khiah Nehushtan ti in ko i. 5Amah in Israel Bawipa Pathian khiah rinsan ai, amah hlanai Judah kumpibawi hmuahhmuah lakah le a hnua ai kumpibawite lakah amah bang um lo i. 6Amah in Bawipa khiah a kho ngai in pom ai Amah hlun lo in lamtler bul lo ai Bawipa in Moses hnenah thukham pehnak khiah hlun liang i. 7Bawipa khiah amah thawn um manin, a feh hmun caang ah hmuifu i. Ciafangin Assiria kumpibawipa kut songin suak ai a naper sah lo i. 8Filistin mite khiah Kaza le a ram khiah raalvil hmun inn saang ai panin a renhnak khua tianin neh sio i.

9Kumpibawipa Hezekiah in kum li uk kum le Elah fapa Israel kumpibawipa Hoshea ukhnak kum sarih hnak kum ah, Assiria kumpibawi Shalmanesser in Samaria khiah sim ai kulh i. 10Kum thum fangin cia khua khiah amahte in lang lio i. Hezekiah ukhnak kum ruk kum le Israel  kumpibawi Hoshea ukhnak kum kua fang in, Samaria khiah neh lio i. 11Ciafangin Assiria kumpibawi in Israel mite khiah Assiria ah  phur ai, Halah le Kozan Run vumai Habor ah le Mede te khua caang ah dah i. 12Ziangmanti fangin amahte in amahte Bawipa Pathian thu khiah ngai lo ai, lungkhim dunhnak thukham le Bawipa hnenum Moses ai ruaihnak hmuahhmuah lakah sual ai ngai khai ngai nuam lo ai hlun khai hlun nuam lo i.

13Kumpibawipa Hezekiah in kum hlaili ukhnak kumah, Assiria kumpibawipa Sennacherib in Judah khuapui hmuahhmuah khiah sim ai lang sah sio i. 14Ciafangin Judah kumpibawipa Hezekiah in Assiria kumpibawipa hnenah Lachish ah, “I sual te i. I hnenin let tu. Na cawhhnak bangin na kuan tuh ing.” ti in thu cah i. Ciafangin Assiria kumpibawipa in Judah kumpibawipa Hezekiah khiah ngun tangka talan zathum le sui talan sawmthum cawh i. 15Ciamanin Hezekiah in Bawipa inn songai le kumpibawipa inn songai tangka khawl hmun ai umhnak ngun tangka hmuah khiah pe i. 16Cen Hezekiah in Bawipa temple dawngkham ai sui te le Judah kumpibawipa Hezekiah in khuam vumai mathnak sui te khiah  khaai sio ai, Assiria kumpibawipa  pe i.

17Ciafangin Assiria kumpibawipa in Tartan le  Rabsaris le Rabshakeh te a bawi upate khiah Lachish in raalkap tamngai thawn Kumpibawipa Hezekiah hnenah Jerusalem sim tuhin hlat i. Anite khai feh ai Jerusalem ah hleng i. Anite khai hleng fangin, Ponsophmun Lo hmunlam kawihmun    lamceh vumai a cungta tikhur ai tlau hiang ah ding i. 18Amahte in kumpibawipa khiah ko fangin, kumpibawipa inn sang kilkhawltu Hilkiah fapa le cazi Shebna le laikhumtu Asaph fapa Joah khiah amahte hnenah kawi i. 19Ciafangin Rabshakeh in amahte hnenah, “Tunin Hezekiah hnenah, ‘A lian ngai Assiria kumpibawipa in, “Na rinsanhnak lakah zaimanin thin na muang i? 20Raalkap le raaltawng  tuh dan ngian nai ing ti in ti i si. Ikhalselai na relhnak khiah thu lovang lolek i. Aisu rinsan in i tawng tum i si? 21Cen tunin a ek lio phaikung bang Izip khiah rinsan i si. Cia phaikung vumah a hngai tute khiah phaikung in a kut khiah dawt sah tuh ian i. Ciabang in Pharoah khiah a rinsantute veksen lakah phaikung bang i. 22Cen i hnenah, ‘Kin Bawipa Pathian khiah rinsan i ing.’ i ti silai, cia Pathian tu Hezekiah in a saanghmun ai raithawi hmun le a awlta khiah hnawm sah berh ai, Judah mite le Jerusalem mite hnenah, ‘Jerusalem ah he awlta hmai ah bia tuh i si.’ ti in ti i ta lo im? 23Ciamanin i bawipa Assiria kumpibawi pa hnenah thukham tulai, siphuh totu tuh nai le si, siphuh thawng nih na pe ngang. 24Ilekhaw a kontihin i bawipa hnenum lakah a cikber khiah tawng in Izip te khiah siphuh leng le siphuh totu tuh minung khiah rinsan tum i si? 25He ram hnawmcan tuhin Bawipa tel lo in kaimah lekin kawi i aw ing? Bawipa in i hnenah, ‘He ramah ah feh tulai, hnawm can tu.’ ti in i ruai i.’ ti in rel i.

26Ciafangin Hilkiah fapa Eliakim le Shebna le Joah in Rabshakeh hnenah, “Na hnenumte hnen ah Aramaic pon in kin pon tu. Aramaic pon ling ngawn i ing. Khuarenhnak sen vumai totu mite zak in kin hnenah Hebru pon in pong mah.” ti in ruai i. 27Ikhalselai Rabshakeh in amahte hnenah, “Ningmah thawn amahte zin ding tuh le amahte ek ei tu tuh khuarenhnak sen vumai to mite hnenah rel lo in ningte hnen lekah he thu rel tuhin i bawipa in i hlat im?” ti in sawn i. 28Ciafangin Rabshakeh khai ding ai aw cawm ngai in Hebru pon in, “A lian ngai Assiria kumpibawipa thu ngai tuu-ih. 29Kumpibawipa in, ‘Hezekiah in ning zawl ma seh. Ziangmanti fangin amah in i kut songin ning o ben tuh lo i. 30Cen Hezekiah in, “Bawipa in luang kin suah tuh rori i. He khua khiah Assiria kumpibawi pa kut songah ap tuh lo i.” ti in Bawipa ring in ning sang ruai ma seh.’ ti in ti i. 31Cen Hezekiah thu khiah ngai mah ih. Ziangmanti fangin Assiria kumpibawipa in, ‘Remhnak tuhin lehsawng thawn i hnenah kawi tuu-ih. Ning veksen in ningmah capit thai le ningmah thaihmin ten ei tuhai, ningmah tikhur song ten in ti ding tuh i si. 32Ciafang i kawi fangin, ningmah ram bang ramah rongmu le capitti zu umhmun ram le sangreu le capit vuandum umhmun ram le oliv vuandum le khoitilu umhmun ah ning thiar tuh ai ciata ah thi lo in ning nung tuh i. Ikhalselai Hezekiah in, “Bawipa in kin o tuh i.” ti in ning sohnak khiah ngai mah ih. 33Assiria kumpibawipa kut songin mi ramdangte pathian in amahte khiah o awm? 34Hamath mite le Arpad mite pathian khiah a konah i hang? Sepharviam le Hena le Ivah te pathian tang akonah i hang? Amahte in Samaria khiah i kut songin o awm? 35Aisu pathian ber in amahte ram khiah i kut songin o pa? Ciamanin a kontih in Bawipa in Jerusalem khiah i kut songin o tuh i?’ ti in ti i.” ti in rel i.

36Ikhalselai aisu in khai amah khiah kam khat bang khai sawn lo i. Ziangmanti fangin kumpibawipa in, “Amah khiah sawn mah ih.” ti in thu pe i. 37Kumpibawipa inn sang kilkhawltu Hilkiah fapa Eliakim le cazi Shebna le laikhumtu Asaph fapa Joah khai Hezekiah hnenah amahte thilthuam zik bial thawn kawi ai, Rabshakeh relhnak thu khiah rel i.

<<  2 KINGS 18  >>