2 Chronicles 31

<<  2 CHRONICLES 31  >>

1Hete ben liang fangin, ciata ai umtu Israel mite khai a veksenin Judah khua hmuah ah feh ai, mizuk le thingvum ai suaihnak zukte khiah cem sio ai, a saanghmun ai raithawi hmun innte le awlta te khiah Judah le Benjamin le Efraim le Manasseh ram in a pumpalah in bal sio ai hnawmcan berh i. Ciaben fangin Israel mite khai amahte khua le amahte inn ten ah tlung i.

2Ciafangin phungkite le Levi te in Bawipa inn ah mai thawn taihnak a hlu hlu tuhin le remhnak hlu tuhin le Bawipa inn dawngkham ah Bawipa cuan tuh in, phungki le Levi te khiah amahte pawl bang in Hezekiah in tavuan pe i. 3Kumpibawipa in mai thawn ai taihnak a hlu khiah zinglam ca le zanlam ca le Sabbath ca le Hla Thar ca le Bawipa Dan Upadi songai nganhnak bangai bawnhnak puaite ca in a naihhnak a hrekkhat khiah dah i. 4Ciazolo ah phungki le Levi mite in Bawipa Dan Upadi bangin naperhnak in amahte tikcu khiah hmang thill thai in, phungki le Levi te cawmhnak tuh khon tuhin kumpibawipa in Jerusalem ai umtu mite khai ruai i.

5Kumpibawipa ai ruaihnak thu than sawng fangin, Israel mite in rongthar hmasaber le capittizu le thau le khoitilu le lo songai suakhnak rong hmuahhmuah khiah a tamngai in kawih ai zai hmuahhmuah khiah sephuhtaphuh hlu i. 6Judah khua songai umtu Judah le Israel mite in kawlpaw le tu khiah sephuhtaphuh pe i. Cen Bawipa amahte Pathian hnenah hluhnak a cianghlim thilte sephuhtaphuh khai amahte in a dim in pum i.

7Ciatih in hla thumhnak fangin pum pan ai hla sa rihhnak fangin pum ben i. 8Hezekiah le mi upate in amahte pumhnak hmu fangin, Bawipa le amah minung Irael mite khiah hmuifu bur i.

9Ciafangin Hezekiah in phungkite le Levi mite khiah cia pumhnak thu zawt i. 10Ciafangin Zadok innkua songai Azariah in, “Mite in Bawipa inn songah a hlu kawih khelleh ah, ei tuh khai nai bial ai a val khai tamngai um i. Ziangmanti fangin Bawipa in a minungte khiah hmuifu bur manin i. Cen he a taanghnak khai a tamngai um i.” ti in sawn i.

11Ciafangin Hezekiah in Bawipa inn songah rongkhawi hmun tuh khaan sa ruai ai anite in sa i. 12Ciafangin amahte in a hlu le sephuhtaphuh le Pathian hnenah hluhnak thilte khiah a kungniu in kawih i. Levi mi Khononiah in amahte khiah uk ai, a nau Shimei khiah a son tu i. 13Kumpibawipa Hezekiah le Pathian inn uktu Azariah te ruaihnak bangin, Jehiel, Azaziah, Nahath, Asahel, Jerimoth, Jozabad, Eliel, Ismachiah, Mahath le Benaiah te khiah Khononiah le a nau Shimei te kuthnia ah mite khiah khawng i. 14Nisuak hmunlam Dawngkham kiltu Levi mi Imnah fapa Kore khiah Pathian hnenah amahte thu ai hluhnak thilte uktu le Pathian hnenah hluhnak thilte le a cianghlimte thilte zem tu i. 15A kuthnia ah Eden, Miniamin, Jeshua, Shemaiah, Amariah, le Shekhaniah te um ai amahte khiah phungki te khua ah a cik le a lian ti lo in amahte unau phungkite khiah amahte pawl bangin zem bawm i. 16Ciahlai ah, amahte pawl le amahte tavuan bangin Bawipa inn songah lut in naper tuh ai, amahte hming khiah amahte suahkehhnak cazin songai umhnak naupang pasal kum thum le tanvumte khai zem i. 17Cen amahte suahkehhnak cazin songai khumhnak phungkite le ciabang in amahte tavuan le amahte pawl bangin cazin songah khumhnak kum kul le a tanvum Levi mite khai zem i. 18Ciate lakah naupangte, a nu te, le a fapa le a fenute khiah a veksenin telh i. Ziangmanti fangin amahte in a kungniu in amahte veve khiah cianghlim ruai i. 19Cen amahte khua le a khua hiang lo song ai umtu Aaron tesinfate phungkite ca in, amahte lakai pasal hmuah le Levi te suahkehhnak cazin songai khumhnak te a veksen khiah zemtu tuhin pasalte ril i.

20Ciatih bangin Hezekiah in Judah ram pumpalah ah bawn ai, Bawipa a Pathian hmai ah a pha le a hman khiah bawn i. 21Cen zai hmuahhmuah Pathian inn songah a naperhnak i tu seh, upadi dan le thukham hlun lamah i tu seh, a Pathian khiah sii hmasa ben fangin thintak ngai in per i. Ciamanin a perhnak khiah khim liang i.

<<  2 CHRONICLES 31  >>