2 Chronicles 23

<<  2 CHRONICLES 23  >>

1Kum sarih hnak fangin, Jehoiada in amah veve khiah kho ruai ai, raalkap zakhat uktute: Jehoram fapa Azariah, Jehohanan fapa Ishmael, Obed fapa Azariah, Adaiah fapa Maaseiah, Zikhri fapa Elishaphat te thawn thukham dun i. 2Anite khai Judah ram song hmuahhmuah ah feh ai, Judah khua caang ai Levi te le Israel mi upate khiah khawm ai anite khai Jerusalem ah hleng i. 3Ciafangin pawlpuite veksenin kumpibawipa thawn Pathian inn songah thukham dun i. Ciafang in amah in amahte hnen ah, “Bawipa ai David fapate thu relhnak bangin, kumpibawipa fapa in kumpibawi cang tuh i. 4Ningte in hetih bangin bawn tuh i si: Sabbath nia ah naper tuhai kawi tu ningte phungkite le Levi mite songin hmun thum khan hmun khat te in dawngkhamte cul tuh i si. 5Cen hmun thum khan hmun khat in kumpibawi pa inn kil tuh i si. Cen hmun thum khan hmun khat te in Inham Dawngkham ah um tuh i si. Mi dangte hmuah khiah Bawipa inn tualvan ah um tu seh. 6Ikhalselai Bawipa inn songah naper tute phungkite le Levi te lo aisu khai lut ma seh. Amahte khiah lut tu seh. Ziangmanti fangin amahte khiah cianghlim i. Ikhalselai mi dang hmuah in Bawipa ai semhnak bangin cul tu seh. 7Levi mite in kumpibawipa khiah amahte kut ah raal thilthuam vong in a hiang cingkim in kulh tu seh. A hiang ah kawi tu khiah rek tu lio ih. Kumpibawi suak fangin le lut leh fangin amah thawn um tuh tio i si.”ti in rel i.

8Ciamanin Levi mite le Judah mi veksen in Jehoida phungki pa ai ruaihnak bangin a veksen in bawn i. He bawite in Sabbath nia ai naper tu tuhte le Sabbath nia ai naper zo tute khiah lang i. Ziangmanti fangin Jehoida phungki pa in amahte khiah tlung ruai lai lo i. 9Ciafangin Jehoida phungki pa in Bawipa temple songai khawihnak Kumpibawi David ai feipui le lumte a cik le a liante khiah raalkap zakhat uktu bawite hnenah pe i. 10Ciafangin amah in amahte kut tenah raal thilthuam vongin, kumpibawi hiang cingkim ah awlta le temple hiangah, temple kekeh lamai panin temple kiahhan lam tian ah ding ruai i. 11Ciafangin amahte in kumpibawi fapa khiah suah ai kumpibawi lukhuk khiah khuk ai, Thukham khiah pe ai amah khiah kumpibawi cang tuhin nawih ai, “Kumpibawipa nun sau tu seh.”ti in au tlaang i.

12Athaliah in mite dawp hnak aw le kumpibawi pa cuanhnak aw khiah za fangin, Bawipa temple songah mite hnenah kawi i. 13Ani khai sik fangin, kumpibawipa khiah a dan bangin khuam hiang ah ding in hmu i. Cen mi upate le thirhlung tumtute khai kumpibawipa hiang ah ding khiah hmu i. Cia ramai mi veksen khai ang rauh ai, thirhlung tum i. Cen lasa tute in lasa ai cuanhnak la pantute khai hmu i. Ciafangin Athaliah khai a thuam khiah zik ai, “Raltho i si, raltho i si.”ti in au i.

14Ciafangin Jehoiada phungki pa in, raalkap zakhat uktute raalbawite hnenah, “Amah khiah pom in sumpua ah suah tuu-ih. A hlun tu khiah vangsau thawn rek tuu-ih.”ti in ruai i. Ziangmanti fangin phungki pa in, “Cia nuu khiah Bawipa inn songah rek ma seh.”ti in ti i. 15Ciamanin amahte in cia nuu khiah pom ai, kumpibawipa inn ah siphuh lut hmun ah kawih ai ciata ah rek i.

16Ciafangin Jehoiada in amah le mite le kumpibawipa khiah Bawipa minung cang tuhin thukhamhnak bawn i. 17Ciafangin mi veksen khai Baal temple ah kawi ah Baal temple bal sah i. A awlta le milim zuk hmuah a veksenin khoi sah sio ai Baal phungki pa Mattan khai awlta hmai ah rek i. 18Ciafangin Jehoida in phungkite le Moses Dan Upadi songah nganhnak bangin, David in Bawipa hnenah mai thawn taihnak a hlu khiah ang kong le lasa kong in hlu tu tuhin David in Bawipa inn ah tavuan pehnak Levi mite khiah Bawipa inn kiltu tuhin Jehoiada in dah i. 19 Cen a ciang lote aisu khai Bawipa inn songah lut tuh lo in kham tuh in dawngkham kiltute khiah Bawipa inn dawngkham ah dah i. 20Ciafangin raalkap zakhat uktute bawite le miliante le mi-ukte le cia ram ai mite veksen khiah lang ai kumpibawipa khiah Bawipa inn songin zuk ai, a Cungta Kawl dawngkham songin kumpibawi inn songah tlum i. Ciafangin amah khiah kumpibawite tauhkheng vumah tauh i. 21Ciamanin cia ramai mi hmuah khai a veksenin ang tlaang i. Athaliah khai kumpibawi inn songah vangsau thawn rek zo manin cia khua khai dapthen in um i.

<<  2 CHRONICLES 23  >>