2 Chronicles 2

<<  2 CHRONICLES 2  >>

1Ciafangin Solomon in Bawipa hming ca in temple le amah ca tuhin kumpibawi inn sa tum i. 2Solomon in kuli phur tu tuhin mi thawng sawm sarih le mualtlang ah lungto khuar tuhin mi thawng sawmriat le he mite khawng tu tuhin mi thawng thum le zaruk ril i.

3Ciafangin Solomon in Tyre kumpibawi Hiram hnenah, “I paa David khiah a umhmun tuh inn sahnak tuhin sida thing na kuat bangin kai khai i kuat tu ve. 4Bawipa i Pathian hnenah, Israel mite hnenah kumzangza ai bawn tuhai ruaihnak a hlu hlu tuhin le, a hmai ah rimhmui taihmun tuh le, a catlo sangreu dahhmun tuh le zing le zan le Sabbath nia le Hla thar caang in mai thawn taihnak hlu hmun tuh le kin Bawipa Pathian ai ruaihnak puai bawn hmun tuhin, Bawipa i Pathian hming ca in temple pakhat sa tum ing. 5Kin Pathian khiah a dang pathian veksen tahin lian sawn manin, i sahnak temple khai a lian ngai in sa tuh ing. 6Ikhalselai vancung hmuahhmuah rinin amah khiah thual lo manin aisu in amah khiah temple sak ben tuh i? Ciamanin a hmai ah raithawihnak taihmun siar lo amah ca ai temple sa tumtu kaimah khiah aisu ing? 7Ciamanin sui le ngun le dar le thir le thiam num le a san le mepian thawn naper thiamtu le i paa David in pehnak Judah le Jerusalem ai kaimah thawn umtu pumsu thiamte thawn zuksuai thiam pa i kuat tu. 8Cen Lebanon ai sida thing le saipress thing le alkum thingtum khai i kuat tu. Ziangmanti fangin na hnenumte khiah Lebanon ah thingat thiam ngai khiah ling ing. Cen i hnenumte khai na hnenumte thawn 9thing tamngai at tuhin kuat tuh ing. Ziangmanti fangin i sa tumhnak temple khiah a lian ngai le a mawi ngai in sa tuh ing. 10Cen na hnenum thingvawng tute khiah sangvut kor thawngkul, kawlkawn kor thawngkul, capitti zu bat thawngkul le thau bat thawngkul pe tuh ing.” ti in rel i.

11Ciafangin Tyre kumpibawipa Hiram in Solomon hnenah, “Bawipa in a minungte khiah it manin, amahte vumah kumpibawi na cang ruai zo i.”ti in lai in rul i. 12Cen Hiram in khai, “Van le laipua bawntu Israel Bawipa Pathian khiah hmuifu tu seh. Ziangmanti fangin Amah in Kumpibawi David khiah fimhnak le thiamhnak thawn dim fapa mifim khiah pe ai, cia fapa in Bawipa ca in temple le amah ca tuhin inn sa tuh i! 13Huram-Abi na kuat ing. Amah khiah thil bawn thiam ngai i. 14A nuu khiah Dan mite i ai, a paa khiah Tyre mite i. Amah khiah sui le ngun le dar le thir le lungto le thing le pon num le mepian le pon san le pon pha ngaingai thawn naper thiam ngai i. Cen zuksuai lamah khai thiam ngai manin a ruaihnak pungcan bang in suai thiam tuh i. Amah in nangmah ai le i bawipa na paa David ai pumsu thiam te kawmin per khat tuh i. 15Ciamanin i bawipa in a hnenum khiah thukham bangin, sangvut le kawlkawn le oliv thau le capittizu khiah i kuat tulai, 16Lebanon ai thingte khiah na daih zahin na vawng sah ngangkhaw, tipui vumah thingtumte khiah hmunkhat in penin Joppa tian lan ruai tuhai ciata in Jerusalem ah lo phur tu.” ti in lai in rul i.

17Ciafangin a paa David in ram dang mite khiah pumsiar hnak bangin, Solomon in Israel ramai ram dang mi khiah a veksen in siar ai, thawng zakhat le thawng sawmnga le thawng thum le zaruk lo um i. 18Ciafangin Solomon in thawng sawmsarih te khiah kuli phur ruai i. Thawng sawmriat te khiah mualtlang ah lung khuar ruai i. thawng thum le zruk te khiah ciate khawng tu tuhin dah i.

<<  2 CHRONICLES 2  >>