1Rehoboam in a ukhnak khiah kho ai amah khai kho fangin, amah in Bawipa thukham khiah hlun awl ai, Israel mi veksen in khai amah khiah cung i. 2Kumpibawi Rehoboam ukhnak kum nga khim fangin, amahte in Bawipa lakah sual manin, Izip kumpibawi Shisak in Jerusalem khiah 3siphuh leng thawngkhat le zanih le siphuhtotu mi thawng sawmruk le Izip ramai Lubim mi le Sukkim mi le Ethiopia mi khiah a siar zolo thawn kawi ai sim i. 4Izip kumpibawipa in a kho ngai ai renhnak Judah mite khuate khiah lang sah ai Jerusalem ah hleng i.
5Ciafangin Shisak manin Jerusalem ah hmunkhat in khawm tu Rehoboam le Judah mi upate hnen ah prawfet Shemaih hleng ai, amahte hnenah, “Bawipa in, ‘Ningmah in i zam manin, kai in khai ningte khiah Shisak kut songah ning hlup tuh ve ing.’ ti in ti i.” ti in rel i. 6Ciamanin Israel mi upate le kumpibawipa khiah thinniam in um ai amahte in, “Bawipa khiah a dikcang i.” ti in ti i. 7Bawipa in amahte khiah thinniam ai um hmu fangin, Bawipa thu khiah Shemiah hnenah, “Amahte in thinniam niu in um i. Ciamanin amahte khiah hnawmcan tuh lo ing. Ikhalselai amahte khiah luat ruai tuh ing. I thinrawhnak khiah Jerusalem ah Shishak kut in burh tuh lo ing. 8Ikhalselai amahte in mi phun dangte kumpibawi ca ai naper khiah kai ca ai naper thawn bang lo i ti ling thill thai in, amahte khiah Shishak hnenum cang tuh i.” ti in hleng i.
9Ciamanin Izip kumpibawi Shisak in Jerusalem khiah sim ai Bawipa inn songai le kumpibawipa inn songai hlawnthil te khiah a veksen in lang sah sio i. Cen Solomon ai sui thawn bawnhnak lum khai lang sah sio i. 10Ciafangin Rehoboam in cia sui lum te rol tuhin dar thawn lum bawn ai, kumpibawipa dawngkham ah santari kiltute bawite hnenah pe i. 11Ciatih bangin, kumpibawi pa khai Bawipa inn songah tlum fangin, santarite in cia lum khiah phur de ai, ciaben fangin santari khaan songah kawih leh de i. 12Rehoboam khiah thinniam in um fangin Bawipa thinrawhnak khiah a vumah amah hnawmcan tuhin hleng lo i. Ciafangin Judah mite ca ah khai zai hmuahhmuah pha liang in um ve i.
13Ciamanin Rehoboam in amah veve khiah kho ruai ai Jerusalem ah kumpibawi tuan i. Rehoboam khiah kumpibawi cang fangin kum sawmli le kum khat i. Ani khai Bawipa in Israel hin veksen lakin a hming dah hmun tuhin rilhnak Jerusalem khua ah kum hlai sarih uk i. A nuu hming khiah Ammon mi Naamah i. 22Ciafangin amah in Bawipa khiah a thinlung thawn sii lo manin, Rehoboam in Bawipa lak ah sual i.
15Rehoboam bawnhnak a ham ai panin a tong tian khiah prawfet Shemaiah ca-uk songah le prawfet Iddo pupate thu ca-uk songah khum lo im? Cen Rehoboam le Jeroboam khai amahte nun song tawng dun i. 16Ciatih in Rehoboam khai a paate bangin thi ai David Khua ah vui i. Amah ca in a fapa Abijah in kumpibawi cang i.