1Ciafangin David in a thin songin, “Saul kut songin ni khat khat ah i thi tuh i lai. Ciamanin a rang ngai in Filistin ramah tlan pha tuh i. Ciafangin Saul in Israel ramah i sii awl tuh ai, ciatihin a kut songin i luat tuh i.” ti in ruat i. 2Ciafangin David khai a minung zakhat thawn Kath kumpibawipa Maoch fapa Achish hnenah kawi i. 3Ciamanin David khai Kath ah Achish hnenah a minungte thawn amahte innkua ten thawn um tlang i. David khai a nu panih, Jezreel mi Ahinoam le Nabat nu awng Kharmel mi Abikel thawn um i. 4Ciafangin David khiah Saul khiah Kath ah tlan zo i ti in rel fangin, Saul in khai David khiah sii leh lo i hang.
5Ciafangin David in Achish hnenah, “Nangmah khiah i lakah lung na khim lekhaw, na ram songai khua pakhat khat i pe tulai, ciata ah um ngang. Ziangmanin na hnenum khiah nangmah thawn kupibawi khua ah um tuh ing?” ti in ti i. 6Ciamanin Achish in David khiah Ziklak khiah cia nia ah pe i. Ciamanin tunnia tian in Ziklak khai Judah kumpibawite in ping i. 7David khai Filistin te ramah kum khat le hla li um i.
8Ciafangin David le a minungte in Keshur mite le Kirzi mite le Amalek mite khiah rok i. He mi phunte khiah cia ramah he hlanlai in Shur ai panin Izip ram tianin um awng i. 9David in cia ram mite khiah taih fangin, pasal le nupang pakhat khai taang lo in rek sio de ai tu le kawlpaw le lak le kala-ukte le thilthuam te lek lang de le Achish ah tlung leh de i. 10Ciafangin Achish in, “Tunnia ah akonah rok pa si?” ti in zawt fangin, David in, “Judah ram hlanglam ah ihlahle Jerahmeel hlanglam ah ihlahle Ken ram hlanglam ah rok i ing.” ti in rel de i. 11“Kath hnenah, ‘David in ciatih in bawn i.’ ti in kin zuar mawh ngai.” ti in David in pasal le nupang pakhat bang khai a nung in taang ruai lo i. David khai Filistin ramah a um teng fangin ciatih bang in bawn i. 12Ciamanin Achish in David khiah sang ai, “A mi phunpui Israel mite in hua thai in David in bawn i. Ciamanin kumzangza i hnenum cang tuh i.” ti in ti i.