1 Samuel 25

<<  1 SAMUEL 25  >>

Samuel thihnak

1Ciafangin Samuel khai  thi ai Israel mite khai hmunkhat in khawm tlang ai Samuel khiah kah ai Ramah khua a innah vui i. David khai tho ai Paran Nelrawn songah zu  i.

2Ciafangin Moan ah mi pakhat um ai a naper hmuntu Kharmel ah i. Amah khiah milian ngai i. Amah in tu thawngthum  le me thawngkhat nai i. Ani khai Kharmel ah a tu te hmul met i. 3Cia pa hming khiah Nabal i. A nu hming khiah Abikel i. Abikel khiah mifim le hmel mawi ngai i.   Ikhalselai a pa tu Khalep mi  i  le mipuar le misual i. 4David in Nabal khiah nelrawn songah a tu hmul met i ti za fangin, 5David in tlangval sawmkhat khiah a hnenah hlat ai, “Kharmel ah hong in Nabal hnenah feh tu i lai, i hming in  pon nem in pon tuu-ih.  6Hetih bangin, nunnuam ai umtupa hnenah, ‘Nangmah hnenah le na inn le na naih hnak veksen vumah thin na nuam tu seh! 7Tu hmul met cu i ti in za i ing. Na tukhaltute khiah kin hnenah um ai  ur ruai lo i ing.  Cen amahte khiah Kharmel ah a um teng in zai khai pai bul lo i. 8Na tlangval te khiah zawt tulai na rel tuh i. Ciamanin he i tlangvalte in lung lo na khim ruai tu selai, na hnenumte  le na fapa David hnenah na kut ai na naihnak  khiah kin pe tu. Ziangmanti fangin puai bawn teng i si.’ ti in rel tu.” ti in ruai i. 9Ciamanin David tlangval te khai hleng fangin Nabal hnenah David hming in he thute khiah rel ai iang i.

10Ciafangin Nabal in David hnenumte hnenah, “David khiah aisu i? Jesse fapa khiah aisu i?  Tun sanah hnenumte khiah a bawi te hnenin tlan tu a tam ngai um i. 11I tu hmul mettu te ca ai rong le i ti le i sa rohnak khiah lang in konin hleng pah khai i ling lohnak mite khiah pe tuh ing?” ti in sawn i. 12Ciamanin David tlangvalte khai a rang ngai in let ai, cia thu khiah a veksenin  David  rel i. 13Ciafangin David in a minungte hnenah, “Ning veksenin ning vangsau khiah lang tuu-ih.” ti in ti i. Ciamanin anite khai a veksenin a vangsau khiah lang ai, David khai a vangsau lang ve i. David thawn mi zali tluk feh ai mi zanih te tu amahte thilri  kil in um i.

14Ciafangin tlangval pa pakhat in Nabal nu Abikel hnenah, “David in a hnenumte khiah nelrawn songin kin bawipa pon tuhin hlat ai kin bawipa in amahte khiah zauhsuam i. 15Ikhalselai amahte in phantak ngai in kin sik i. Amahte thawn kin lo lai ah kin um fangin, kin paihnak zai khai um lo i. Cen kin ur khai kin ur ruai lo i. 16Amate thawn tu kin khal fangin amahte khiah sun le zan kin ca ah sen bangin  kil kin khawl i. 17Ciamanin zai bawn pha khiah ruat tu. Ziangmanti fangin kin bawipa le a innsang a veksen vumah urhnak hleng tuh a cia i. Ziangmanti fangin amah khiah aisu in khai pon thill lo mi tawlol i.” ti in rel i.

18Ciafangin Abikel khai hnawraw ngai in pawnghmuk zanih le capittizu lang nih le a rosa tu panga le rongtheu comvoh panga le capitti thai a ro bor zakhat le thaihmin pawnghmuk zanih khiah lang ai lakte vumah phurh i. 19Ciafangin a hnenumte hnenah, “I hlan in lo feh tuu-ih. Ning hnua in kawi tuh ing.” ti in rel i. Ikhalselai a pa Nabal tu rel lo i. 20Ciatih in ani khai lak khiah to ai  mualtlang in zu fangin, David le a minungte khai a hnen lamah kawi ai anite khai tawk dun i. 21David in, “He paa naihhnak khiah zaikhai pai tuh lo in, nelrawn songai a naihnak khiah kilkhawl sah khiah a lovang i lo im? A pha bawn sah ai a pha lo in i rul i.  22Ciamanin Nabal naihhnak veksen lakin pasal pakhat niu khiah zing khuavar fangin taang ruai leingkhaw, Pathian in David  hnenah a rauh hngehnge in cawh tu seh.” ti in rel zo i.

23Abikel in David  hmu fangin ani khai a lak vumin tolh ai, David hmai ah bok ai a lu khiah ut i. 24Ciatih in ani khai David ke ham ah bok ai, “ I bawipa, he sualhnak manin kaimah mawh i hluk tu. Na hnenum nuu in na bil ah pong ngangkhaw, na hnenum nuu pong hnak khiah i ngai sah tu.  25I bawipa in he mi tawlol pa khiah zainam ma seh. Ciamanin a hming bangin amah khiah mivoi i. Ciamanin a hming  khai Nabal, mivoi i.  Ikhalselai kaimah na hnenum nuu in i bawipa ai hlathnak tlangvalte khiah lo hmu lo ing. 26Ciamanin, i bawipa, mi rek tuh lo in le na kut in mi phuzul tuh  lo in Bawipa in na kham zo manin, Bawipa nung song hmuah le na nung song hmuahin na raalte le na ur ruai nuamtute khiah Nabal bangin cang tuh seh. 27Cen he na hnenum nuu ai kawihhnak lehsawng khai i    bawipa hluntu te tlangvalte khiah lo pe tu. 28Na hnenum nuu sualhnak khiah lo hlat sah tu. Ziangmanti fangin i bawipa in Bawipa raal khiah tawng sah ai na nun song ah a pha lo in nung lo manin Bawipa in i bawipa innkua khiah kumzangza in kho ruai tuh i. 29Mi dangte in na rek nuamin na hnawh napui ai, Bawipa na Pathian in na nunhnak khiah  a nungmi te lakah  a himniu in na pen sah tuh meng i. Ikhalselai na raalte nunhnak khiah kuahli in sai bangin Bawipa in sai tuh sek i. 30Cen Bawipa in i bawipa hnenah a pha bawn tuh ai thu na kham bangin bawn leh fangin, Israel uktu in na dah fangin, 31a thu um lo ai mi rek ngah le i bawipa in amah ca in mi phuzul ngah te ti in lungsiahnak le sirhnak um tuh lo i. Ikhalselai Bawipa in i bawipa khiah na bawm leh fangin, na hnenum nuu khiah lo hai malaw.” ti in rel i.    32Ciafangin David in Abikel hnenah, “I tawk tuhai na hlat tu Bawipa Israel Pathian khiah hmuifu tu  seh! 33Na thu relhnak khiah hmuifu tu seh. Nangmah khai hmui na fu tu seh. Ziangmanti fangin tunnia ah mi rek tuhin le i kut in phuzul tuin i kham i si. 34Ziangmanti fangin, Bawipa Israel Pathian nung bangin, nangmah khiah ur ruai tuhin i kham i. Ziangmanti fangin nangmah khiah a rang ngai in i tawk tuhin kawi ta hlahsilai, zing khuavar fangin Nabal hnenah pasal pakhat bang khai taang tuh bul lo i.” ti in rel i. 35Ciamanin David in a kut ai kawihhnak te khiah saang sah ai amah hnenah, “Thinnuam in na innah tlung tu. Na aw khiah na ngai sah ai nangmah khiah na upat ing.” ti in ti i.

36Ciafangin Abikel khai Nabal hnenah kawi i. Nabal khai ciateng in a innah kumpibawi puai bangin puai bawn i. Nabal khiah zukham rauh manin a thinnuam ngai in um i. Ciamanin Abikel in amah khiah zing khuavar tian zaikhai rel lo i. 37Ciamanin a thangha fangin a zukham khai lawm fangin, a nu in cia thute khiah Nabal rel fangin, Nabal khai a thinzul ai lungto bangin cang i. 38Ni ha tha fangin Bawipa in Nabal khiah seu ai Nabal khai thi i.

39David in Nabal thi za fangin, “Nabal ai zauh i suam napui ai i bawmtu Bawipa khiah hmuifu tu seh. Cen a hnenum khai a pha lo hmunin o i. Ziangmanti fangin Bawipa in amah  sualhnak khiah a lu ah hleng ruai i.” ti in ti i. Ciafangin David in Abikel khiah a nu tuhin  dong i. 40David hnenumte khiah Kharmel ah Abikel hnenah hleng fangin, amah hnenah, “David in nangmah khiah a nu tuhin zawt tuhin kin hlat i.” ti in rel i. 41Ciafangin ani khai tho ai a lu khiah laipua lamah ut ai, “Kaimah khiah i bawipa hnenumte a ke somsah tu tuhin ning hnenum nuu ing.” ti in ti i. 42Ciamanin Abikel khai a rang ngai in tho ai lak khiah to ai a hnenum nupang panga in hlun i. Abikel in David hnenumte khiah hlun ai David nu cang i. 43David in Jezreel mi Ahinoam khai lang ai a panih in a nu cang i. 44Ikhalselai Saul in a fenu  David nu Mishal khiah Kallim ai Laish fapa Palti pe lio i.

<<  1 SAMUEL 25  >>

Recent Posts