1 Samuel 12

<<  1 SAMUEL 12  >>

1Ciafangin Samuel in Israel mite veksen hnenah, “Ningte in i hnenah i relhnak khiah a veksenin ning ngai sah ai, ning vumah kumpibawi ning bawt ing. 2Tun kumpibawi khiah heta um ai ning hmai in vak i. I tar zo ai puak khai i par zo i. I fate khai ning hnenah um i. I naupang lai pah in tuntian ning hmai ah vak ing. 3Tun heta ah um ing. Bawipa le A rilhnak pa hmai ah tetti khan tuu-ih: Aisu kawlpaw cang lang sah awng ing? Aisu lak lang sah awng ing? Aisu ning zawl awng ing? Aisu ning nemh awng ing? Aisu hmunin nawhthuh  lang in i mit khiah caw ruai ing? Ning rul tuh ing.” ti in zawt i. 4Ciafangin amahte in, “Nangmah in kin nemh awng lo i si, kin zawl awng lo i si. Aisu kut songin khai zai khai lang awng lo i si.” ti in sawn i. 5Ciafangin amah in amahte hnenah, “I kut songah ningte in zai khai tawk lo khiah Bawipa in ning lakah tettikhan i. Cen tunnia ah A rilhnak pa in khai tettikhan i.” ti in ti i. Ciafangin amahte in, “Amah in tettikhan i.” ti in ti i.

6Ciafangin Samuel in mite hnenah, “Moses le Aaron suak ruai tu le Izip ramin ning paate suah tu khiah Bawipa i. 7Ciamanin ding tu meng i lai, ning hnenah le ning paate hnenah Bawipa ai a dikcang ai bawnhnak thute khiah Bawipa hmai ah ning rel tuh ing. 8Zakuk khiah Izip ah feh fangin, ning paate in Bawipa hnenah kap fangin, Bawipa in Moses le Aaron khiah hlat ai ning paate khiah suah ai he ramah khuato ruai i. 9Amahte in Bawipa amahte Pathian khiah hai fangin, Bawipa in amahte khiah Hazor raalbawi pa Sisera kut le Filistin te kut ah le Moab kumpibawi kut ah zuar ai amahte in amahte khiah tawng i. 10Ciafangin anite khai Bawipa hnenah kap ai, ‘Bawipa khiah zam in Baal le Ashtaroth te khiah a na per sah manin kin sual zo i. Ikhalselai tunin kin raalte kut songin kin o tulai Nangmah na khiah na per sah tuh i ing.’ ti in ti i. 11Ciafangin Bawipa in Jerubbaal le Bedan le Jepthah le Samuel khiah ning kuat ai ning hiang cingkim ai ning raalte kut songin ning luat ruai ai a himniu in um i si.  12Ammon mite kumpibawi Nahash khiah ning hmu fangin, Bawipa ning Pathian khiah ning kumpibawi i napui ai, i hnen ah, “Kumpibawi in kin uk tu seh.’ ti in i ngen i si. 13Ciamanin he khiah ning rilhnak le ning daihhnak kumpibawipa i hang. Ling tuu-ih, Bawipa in ning vumah kumpibawi ning haih sah zo i. 14Ningte in Bawipa khiah kih in Amah na khiah per sah in a aw khiah ngai in Bawipa thukham khiah hlun lo in um hlahleisikhaw, ningmah le ning uk tu kumpibawi in Bawipa ning Pathian khiah hlun tuh tio i si. 15Ikhalselai Bawipa aw khiah ngai lo in, a thukham khiah hlun hlahleisikhaw, Bawipa kut in ning paate khiah tawng bangin, ning khai ning tawng tuh i.

16Ciamanin tunin Bawipa in ning mit hmuh ai bawn tuhhnak a lian ngai khiah tho in sik tuu-ih. 17Tunnia khiah sangvut rongkhawm cuu i lo im? Ningmah in kumpibawi khiah ngen manin,  Bawipa hmai ah ning sual rauh khiah ning ling thil thai in, Bawipa khiah ko ngangkhaw,  khuari le ruah si ruai tuh i.” ti in rel i. 18Ciamanin Samuel in Bawipa khiah ko ai cia nia ah Bawipa in khuari le ruah khiah si ruai i. Ciafangin amahte in Bawipa le Samuel khiah kih rauh i.

19Ciafangin cia mite in Samuel hnenah, “Kin na hnenumte khiah kin thi lohnak tuhin Bawipa na Pathian hnenah saw kin nget sah tu. Ziangmanti fangin kin sualhnak vumah kinmah ca in kumpibawi ngen ngian manin kin sual rauh i.” ti in ti i. 20Ciafangin Samuel in cia mite hnenah, “Lau mah ih. A pha lo bik khiah bawn zo i si. Ikhalselai Bawipa hlun lo in lamtler mah ih. Ikhalselai Bawipa khiah ning thin veksen thawn a na per sah tuu-ih. 21Lamtler mah ih. Lamtler leisikhaw, miathnak khai um lo, cen o khai ning o ben tuh lo, thulovang khiah hlun ngah tuh i si. Ziangmanti fangin ciate khiah zai khai i lo i. 22Ziangmanti fangin Bawipa in a minungte khiah amah hming manin  zam tuh lo i. Ziangmanti fangin Bawipa in ningte khiah a minung ning i tuhin lungkhim i. 23Ciazolo ah, kai in ning ca in saw ning nget lo in um ing lai Bawipa hnenah i sual tuh manin com lo in saw ning nget tuh ing. Cen a pha le a hman lampui khai ning cuk tuh ing. 24Bawipa lek kih in ning thin veksenin amah na khiah per sah tuu-ih. Ziangmanti fangin ning ca in amah in zaitluk thil pha khiah ning bawt sah zo khiah ruat tuu-ih. 25Ihalselai ningte a sual in um ngio leisikhaw, ningmah le ning kumpibawipa khiah ning phiak tuh sio i.” ti in rel i.

<<  1 SAMUEL 12  >>