1 Samuel 1

<<  1 SAMUEL 1  >>

1Ciafangin Efraim mualtlang lamai  Ramathaim Zophim khua ah mi pakhat um ai a hming khiah Elkanah i. Amah khiah Efraim mite i ai Zuph fapa ai Tohu fapa Elihu fapa Jeroham fapa i. 2Amah in nu panih nai ai a nu pakhat hming khiah Hannah i ai a khatta hming khiah Peninnah i. Peninnah in fate nai ai Hannah in tu fate nai lo i. 3He pa khai kum siar in a khua in Shiloh ah vancung mite Bawipa bia tuh in le a hlu pe tuhin kawi de i. Cen Shiloh ah Eli fate phungki panih Hophni le Phinehas khai um i. 4Elkanah in  a hlu hlu cang fangin, a nu Peninnah le a fapate le a fenute khiah amahte vo pe de i. 5Ikhalselai Hannah tu a let nih in pe de i. Ziangmanti fangin Bawipa in Hannah khiah nau nai siang napui lo ai Elkanah in Hannah khiah it i. 6Bawipa in Hannah khiah nau nai siang lo manin,  thin rimsu tu lam seh ti in Peninnah in Hannah khiah tok hnelhno de i. 7Ciamanin Hannah khai kum siar in Bawipa inn ah kawi fangin Peninnah in amah khiah tok hnelhno manin Hannah khai kap ai rong khai ei de lo i.

8Ciafangin a pa Elkanah in amah hnenah, “Hannah, zaimanin kap i si? Zaimanin rong ei lo i si? Zaimanin lung na sia i? Kaimah khiah na lakah fapa sawmkhat hnak in pha sawn lo ing?”ti in ti i. 9Ciamanin Hannah khai Shiloh ah rong ei le ding ben fangin tho i. Ciafangin phungki pa Eli khai Bawipa taberbacle dawngkham hiangah tauhkheng vumah to i. 10Hannah khai thin thip ngai in um ai Bawipa hnenah sawngen ai lungsia ngai in kap i. 11Ciafangin ani khai Pathian hnen ah thukham ai, “Aw vancung mite Bawipa, na hnenum nupang rimsu khiah sik sah in i hih in i hai lo in fapa i pe lesikhaw, amah khiah a nun song Bawipa pe tuh ing. Cen a sam khai met tuh awng lo i.”ti in thukham i.

12Ciatih in Bawipa hnenah sawngen thliahthlo fangin, Eli in Hannah kahmur khiah sik i. 13Hannah in a thin song lekin pong ai a kahmur lek mer manin a pon khiah suak lo i. Ciamanin Eli in amah khiah zukham vuah i. 14Ciamanin Eli in cia nuu hnenah, “Zukham in zai cam tian um tuh i si? Na capittizu khiah ding awl tu lio!”ti in ti i. 15Ciafangin Hannah in, “I lo i, i bawipa, kaimah khiah  lung i sia i. Capittizu le a dang zu thawn i kham lo i. Ikhalselai Bawipa hmai ah i thinlung khiah bung ing. 16Na hnenum nuu kaimah khiah mi lovang bangin i ruat mah. Thin i rit ze le lung i sia ze manin sawngen hnelhno ing.”ti in sawn i. 17Ciafangin Eli in amah hnen ah, “Thinnuam in feh tu! Israel mite Pathian in na ngenhnak bangin na pe tu seh.”ti in ti i. 18Ciafangin cia nuu in, “Na hnenum nupang kaimah khiah na hmai ah zarto hnak lo ngah tu seh.”ti in ti i. Ciamanin cia nuu khai feh ai rong khai ei le a hmai khai  lungsia leh lo i hang.

Samuel tehnak thu

19Ciafangin anite khai zingniu in tho ai Bawipa khiah bia ai thlung le Ramah ai amahte inn ah hleng i. Ciafangin Elkanah in a nu Hannah thawn itkhat le Bawipa in Hannah khiah hih i. 20Camcu khim fangin, Hannah khai naupaai le nau pasal niu in nai ai a hming khiah Samuel ti in ko i. “Zaimanin ti fangin amah khiah Bawipa hnenah ngen ing.”ti in ti i. 21Ciafangin Elkanah mipa le a innkua a veksenin Bawipa hnenah kum siar ai a hlu le thukham bawn tuhin feh i. 22Ikhalselai Hannah tu feh lo ai a pa hnenah, “Nau niu in hnawifawp awl hlan hmuah feh tuh lo ing. Ikhalselai a hnawifawp awl fangin Bawipa hmai ah pe tuhin kawi ngangkhaw ciata ah amah khiah um tuh ngio i hang.” ti in rel i. 23Ciafangin a pa Elkanah in amah hnenah, “A pha i ti ai na ruathnak bangin bawn tu. Amah hnawifawp awl tian hak tu. Bawipa in a thu bangin khim ruai tu seh.” ti in ti i. Ciamanin Hannah khai inn ah taang ai a fapa khiah hnawitul ai a hnawifawp awl hlanlo innah um i.

24Cia nuu in a fapa khiah hnawifawp awl fangin amah thawn kum thum tar kawlpaw cang le ephah pakhat sangvut le capittizu lang khat thawn feh ai Shiloh ai Bawipa inn ah kawih i. Cia naupang pa khiah naupang niu i lai. 25Amahte in cia kawlpaw cang khiah ro le cia naupang niu khiah Eli hnenah kawih i. 26Ciafangin cia nuu in, “Aw I bawipa! Na nung bangin, i bawipa, kaimah khiah na hiang ah ding in Bawipa hnenah sawngen awng tu nuu ing. 27He naupang pa khiah ngen ai Bawipa in i ngenhnak bangin i pe i. 28Ciaman in amah khiah Bawipa zawn leh i hang ing. A nung song hmuah in Bawipa hnenah zawn tuh ing.” ti in ti i. Ciamanin anite khai ciata ah Bawipa khiah bia i.

<<  1 SAMUEL 1  >>

 

Recent Posts