1 KINGS 14

<<  1 KINGS 14  >>

1Ciateng in Jeroboam fapa Abijah khiah ur i. 2Ciafangin Jeroboam in a nu hnenah, “Tho tulai, mite in Jeroboam nu i ti in na ling tuh lo in na thuam thleng tulai Shiloh ah feh tu. Ciata ah prawfet Ahijah um i. Amah khiah he mite vumah kumpibawi cang tuhin i rel awng tu i. 3Cen pawnghmuk hlom ha le sangper le khoitilu lang khat thawn a hnenah kawi tu. He naupang niu ziang cang tuh khiah na rel tuh i.”ti in rel i. 4Ciatih bangin Jeroboam nu in bawn i. Ani khai tho ai Shiloh ah hleng ai Ahijah inn ah hleng i. Ikhalselai Ahijah khiah a tar manin khuahmu nawn lo i hang.

5Ciafangin Bawipa in Ahijah hnenah, “Tunin Jeroboam nu khiah a fapa ur manin a fapa thu na zawt tuhin kawi i. Hetih bangin rel tuh i si. Ziangmanti fangin amah khiah inn songah lut fangin, nupui dang bangin paal khel tuh i khaw.”ti in rel i. 6Ciamanin Ahijah in cia nuu dawngkham songin luthnak a ke pau khiah za fangin, amah in, “Tlum tu, Jeroboam nu. Zaimanin mi dang tuah khel i si? Ziangmanti fangin thusia na rel tuhin i hlat i. 7Feh in Jeroboam khiah, ‘Israel Bawipa Pathian in, “Minungte lakin na ril ai i minung Israel mite uktu in na bawn ing. 8David inn in kumpibawi ram khiah zik sah ai, nangmah na pe ing. Ikhalselai i thukham khiah i hnenum David in a thinlung veksenin  hlun ai i hmai ah a pha lek bawn bang in bawn lo i si. 9Ikhalselai na hlanai te tut e tahin a pha lo bik in nung i si. Ziangmanti fangin i raw ruai tuhin, pathian dangte le milim zukte khiah bawn ai kaimah khiah na hnua ah i lon i si. 10Ciamanin Jeroboam inn ah hnophnak hleng ruai tuh ing. Cen Jeroboam hmunin Israel ai pasal  khiah sal le a luat mi tilo in a bangvek in cem tuh sio ing. Jeroboam inn ai a taanghnaklam khai lang tuhai a veksenin a bo sio hlanlo ek bangin lon tuh ing. 11Jeroboam ai naihnak le khua songai thi tute khiah uico in ei tuh i. Cen lo lakai thi tu te khiah hli lakai vaniu in ei tuh i. Ziangmanti fangin Bawipa in rel zo i.”ti in ti i.’ti in Jeroboam rel tu. 12Ciamanin tho tulai, na inn ah tlung tu. Na ke khiah khua songah lut sawng fangin, naupang niu khiah thi tuh i. 13Ciafangin Israel mi veksen in amah khiah kah tuhai vui tuh i. Ziangmanti fangin Jeroboam songin amah lek khiah hlan ah vui ngah tuh i. Ziangmanti fangin Jeroboam innkua lakah Bawipa Pathian in cia naupang pa lek a pha in tawk i. 14Ciazolo ah Bawipa in  Jeroboam innkua rek tu tuhin Israel te uktu tuhin kumpibawi suak ruai tuh i. Cia khiah tunnia ah i hang. Ziang i? Tunin i hang! 15Ziangmanti fangin Bawipa in Israel khiah ti songai phaikung hlin bangin seu tuh i. Amah in he ram pha hmunin Israel khiah a hnuk in phai tuh lio ai, Runpui kan lamah zaih tuh sio i. Ziangmanti fangin amahte in Asherah milim zuk te khiah bawn ai Bawipa khiah thinraw ruai i. 16Jeroboam sualhnak manin Amah in Israel khiah zam tuh lio i hang. Ziangmanti fangin Jeroboam  in sual ai Israel mite sual ruai i.”ti in rel i.

17Ciafangin Jeroboam nu khai tho ai tlung le Tirzah ah hleng i. Cia nuu khai innkaa ah hleng sawng fangin, naupang niu khai thi i. 18Ciafangin amahte in naupang niu khiah vui i. Ciafangin Bawipa hnenum prawfet Ahijah songin a relhnak thu bang in Israel mite veksenin cia naupang paa khiah kah i.

19Jeroboam bawnhnak a veksen khiah a raaltawng dan le a uk dan thute khiah Israel kumpibawi te thuanthu ca-uk songah khum liang i. 20Jeroboam in kum kul hluannih song uk i. Ciafangin ani khai a paate bangin thi i. Ciafangin a fapa Nadab in amah ca in kumpibawi cang i.

Rehoboam ukhnak thu

21Solomon fapa Rehoboam khai Judah ramah kumpibawi tuan i. Rehoboam khiah kumpibawi cang fangin kum sawmli le kum khat i. Ani khai Bawipa in Israel hin veksen lakin a hming dah hmun tuhin rilhnak Jerusalem khua ah kum hlai sarih uk i. A nuu hming khiah Ammon mi Naamah i. 22Ciafangin Judah mite in Bawipa hmai ah sual ai, amahte sualhnak thawn, a paate veksen tah tamin, Bawipa khiah iksikhnak thawn thintok ruai i. 23Ziangmanti fangin amahte in a saanghmun caang ah le thing hing hnia caangah biahmun tuh le khante le Asherah milim zukte khiah sa i. 24Cen cia ramah mi hlotlau rauh khai um i. Amahte in Bawipa in Israel mite hlanah hnawt awnghnak mi phunte ai ningdulkul bawnhnak bangin bawn i.

25Kumpibawi Rehoboam ukhnak kum nga khim fangin Izip kumpibawi Shisak in Jerusalem khiah sim i. 26Ciafangin amah in Bawipa inn songai le kumpibawipa inn songai hlawnthil te khiah a veksen in lang sio i. Cen Solomon ai sui thawn bawnhnak lum khai lang sah sio i. 27Ciafangin Rehoboam in cia sui lum te rol tuhin dar thawn lum bawn ai, kumpibawipa dawngkham ah santari kiltute bawite hnenah pe i. 28Ciatih bangin, kumpibawipa khai Bawipa inn songah tlum fangin, santarite in cia lum khiah phur de ai, ciaben fangin santari khaan songah kawih leh de i.

29Rehoboam bawnhnak veksen  khiah Judah kumpibawite thuanthu ca-uk songah khum lo im? 30Cen Rehoboam le Jeroboam khai amahte nun song tawng dun i. 31Ciatih in Rehoboam khai a paate bangin thi ai a paate vuihmun David khua ah vui i. A nuu hming khiah Ammon mi Naamah i. Amah khiah a fapa Abijam in rol i.

<<  1 KINGS 14  >>