1David khai kum tar ngai manin pon silh napui ai khualum thill lo i. 2Ciamanin a hnenumte in amah hnenah, “Tlangval thawn it awng lai lo fenu niu khiah kin bawipa kumpibawi ca in sii nga singkhaw, amah khiah kumpibawipa hmai ah dingin amah khiah sik tu seh. Cen kumpibawipa kaang songah it tu selai ciatihin kumpibawipa khiah lum ruai tu seh.” ti in ti i. 3Ciamanin amahte in fenu mawi niu pakhat khiah Israel ram songah sii ai, Shunam mi Abishak khiah tawk ai, kumpibawipa hnenah kawih i. 4Cia fenu niu khiah a mawi ngai i. Cia nuu in kumpibawi khiah phantak niu in sik ai cawm i. Ikhalselai kumpibawipa in cia nuu thawn itkhat lo i.
5Ciafangin Hakkith fapa Adonijah khai amah veve tluangkhawng ai, “Kumpibawi cang tuh ing.” ti in ti ai, amah ca tuhin siphuh leng te le siphuh totu te khiah nai ai a hmai ah mi sawmnga dawp de i. 6(A paa in amah khiah zaikom in khai, “Zaimanin ciatih in bawn i si?” ti in tiam awng lo i. Amah khiah a hmel khai mawi ngai i. Amah khiah a nuu in Absalom hnua ah naihnak i.) 7Ciafangin ani khai Zeruiah fapa Joab le Abiathar phungki pa thawn thusawm tlang ai anite in Adonijah khiah bawm i. 8Ikhalselai Zadok phungki pa le, Jehoida fapa Benaiah le prawfet Nathan le Shimer le Rei le David minung raalbawi upate in Adonijah khiah hlun lo i. 9Adonijah khai En Rokel hiang ai Zoheleth lungto hiang ah tu le kawlpawte khiah hlu i. Cen a unaute kumpibawi fate a veksen le kumpibawipa hnenum Judah mi veksen khai ko i. 10Ikhalselai prawfet Nathan le Benaiah le raalbawi upate le a unau Solomon tu ko lo i.
11Ciamanin Nathan in Solomon nuu Bathsheba hnenah, “Hakkith fapa Adonijah khiah kumpibawi cang ai, kin bawipa David in ling lo khiah za aw sim? 12Nangmah nunhnak le na fapa Solomon nunhnak o tuhin thu na rel ngang. 13Kumpibawipa David hnenah kawi tu zual lai amah hnenah, ‘I bawipa, Aw kumpibawipa, na hnenum nuu hnenah, “A ngaingai in na fapa Solomon in i hnua ah kumpibawi cang tuh ai, i tauhhmun ah to tuh i.” ti in in thu i kham i ta lo i sim? Ilekhaw zaimanin Adonjah in kumpibawi cang i?’ti in zawt tu. 14Ciafangin, ciatihin kumpibawipa thawn na pong teng fangin, kai khai na hnua in kawi ngangkhaw na relhnak khiah tetti na khan sah tuh ing.” ti in rel i.
15Ciamanin Bathsheba khai inn khan songah kumpibawipa hnenah lut i. (Kumpibawipa khiah a tar ngai i ai Shunam mi Abishak in kumpibawipa khiah a naper sah i.) 16Ciafangin Bathsheba in kumpibawipa hmai ah bok ai bia i. Ciafangin kumpibawipa in, “Zai na daih i?” ti in zawt i. 17Ciafangin amah in, “I bawipa, Bawipa na Pathian hming in, na hnenum nuu hnenah, ‘A ngaingai in na fapa khiah i hnua ah kumpibawi cang tuh ai i tauhkheng vumah to tuh i.’ ti in thu i kham i si. 18Tunin sik tu cuk. Adonijah khiah kumpibawipa cang ai, i bawipa kumpibawipa nangmah in cia khiah ling lo i si. 19Adonijah in a thau tu le kawlpawte khiah a tam ngai in hlu ai, kumpibawi fapate veksen le Abiathar phungki pa le raalkapte bawipa Joab khiah ko i. Ikhalselai na hnenum Solomon tu ko lo i. 20Cen i bawipa kumpibawipa, nangmah khiah Israel mite veksenin na hnua ah aisu in kumpibawi cang tuhai na tauhkheng ah to tuh khiah rel tuhin na sik tlang i. 21Cialo fangin, i bawipa le kumpibawipa khiah a paate hnenah mitmu fang in, kaimah le i fapa Solomon khiah misual bangin kin haih tuh i.” ti in rel i.
22Ciasawng fangin, Bathsheba khai kumpibawi thawn a pong laitak fangin, prawfet Nathan khai hleng ai, 23ciamanin amahte in kumpibawipa hnenah, “Prawfet Nathan heta ah kawi i.” ti in rel i. Nathan khai kumpibawipa hmai ah kawi fang in, ani khai kumpibawipa hmai ah laipua ah bok i. 24Ciafangin Nathan in, “I bawipa, Aw kumpibawipa, nangmah in, ‘Adonijah khiah i hnua ah kumpibawi cang tuh ai i tauhkheng vumah to tuh i.’ ti in ti aw sim? 25Ziangmanti fangin amah khiah tunnia ah kawlpaw le a thau ngai ngai tute khiah a tamngai in hlu ai, kumpibawi fate veksen le raalbawite le Abiathar phungki pa te khiah ko ai, amah hmai ah ding le ei in um ai, ‘Kumpibawipa Adonijah khiah a nun sau tu seh.’ti in ti i. 26Ikhalselai na hnenum kaimah le Zadok phungki pa le Jehoida fapa Benaiah le na hnenum Solomon tu kin ko lo i. 27Hete khiah nangmah i bawipa kumpibawipa in bawn ai, na hnua ah aisu in na tauhkheng vumah to tuh khiah na hnenum hnenah rel lo i sim?”ti in zawt i.
28Ciafangin kumpibawipa in, “Bathsheba i hnen ah ko tu.” ti in ruai i. Ciamanin Bathsheba khai kumpibawipa hnenah kawi ai a hmai ah ding i. 29Ciafangin kumpibawipa in thukham ai, “Rimsu hnak songin a veksen in i nunhnak i o tu Bawipa nung song hmuah in, 30Israel Bawipa Pathian hming in, ‘A ngaingai in na fapa Solomon khiah i hnua ah kumpibawi cang tuhai, i ca in i tauhkheng ah to tuh i.’ti in thu na kham bangin, tunnia ah ciatih in bawn tuh ing.” ti in ti i. 31Ciafangin Bathsheba in laipua ah bok ai kumpibawipa khiah bia ai, “I bawipa Kumpibawi David khiah a kumkhua in nung tu seh!”ti in ti i.
32Ciafangin Kumpibawipa David in, “I hnenah Zadok phungki pa le prawfet Nathan le Jehoida fapa Benaiah i kauh tuu-ih.” ti in ruai i. Ciamanin anite khai kumpibawi hmai ah kawi i. 33Cen kumpibawipa in amahte hnenah, “Ning bawipa hnenumte khiah lang tu i lai, i fapa Solomon khiah kaimah lak vumah tauh tu i lai, Kihon ah zuk tuu-ih. 34Ciata ah Zadok phungki pa le prawfet Nathan in Solomon khiah Israel kumpibawi cang tuhin thau pawh tu selai, selki khiah tum in, ‘Kumpibawipa Solomon khiah a nun sau tu seh!,’ti in ti tu seh. 35Ciafangin ningte in a hnua in kawi tu i lai, amah khiah i tauhkheng ah to tuh ai kaimah ca in kumpibawi cang tuh i. Ziangmanti fangin Israel le Judah kumpibawi cang tuh in ril zo ing.” ti in rel i. 36Ciafangin Jehoida fapa Benaiah in kumpibawipa khiah, “Amen! I bawipa kumpibawipa ai Bawipa Pathian in khai ciatih in lo rel tu ve seh. Bawipa khiah i bawipa kumpibawipa thawn um awng bangin, Solomon thawn khai lo um tu selai, a ukhnak khiah Kumpibawi David ukhnak tahin lian ruai tu am am seh.” ti in ti i.
38Ciamanin Zadok phungki pa le prawfet Nathan le Jehoida fapa Benaiah le Chereth mite le Pelet mite khai zu ai Solomon khiah Kumpibawipa David lak vumah to ruai ai Kihon ah kawih i. 39Ciafangin Zadok phungki pa in tabernacle songai thau khiah selki dim in lang ai Solomon khiah pawh i. Amahte in selki khiah tum ai, mi veksenin, “Kumpibawipa Solomon khiah a nun sau tu seh!” ti in ti i. 40Mi veksen in amah khiah hlun ai, mite in titilu khiah tum ai, amahte khiah ang rauh ngai manin, amahte aw in laipua khiah kak tum bangin um i.
41Ciamanin Adonijah le a sualeng tute in rongei ben fangin cia aw khiah za i. Joab in cia selki tumhnak khiah za fangin, “Zaimanin khua song khiah hnaihnok ruai i pa?” ti in zawt i. 42Ciatih ai a pong laitak in Abiathar phungki pa fapa Jonathan khiah hleng ai, Adonijah in amah hnen ah, “Kawi tu. Nangmah khiah mi thupui i si. Thupha kin hlen i tuh i si.” ti in ti i. 43Ciafangin Jonathan in amah khiah, “I lo i. Kin bawipa Kumpibawipa David in Solomon khiah kumpibawi cang ruai i. 44Kumpibawipa in Zadok phungki pa le prawfet Nathan le Jehoida fapa Benaiah le Cheret te le Pelet te khiah ko ai, amahte in Solomon khiah kumpibawi lak vumah to ruai i. 45Ciamanin Zadok phungki pa le prawfet Nathan in Solomon khiah Kihon ah kumpibawi cang tuhin thau pawh i. Ciata in amahte khai ang rauh in tlung manin khua songah hnaihnok bial i. Ning zahnak aw khiah ciate aw i. 46Cen Solomon khai kumpibawi tauhkheng vumah to i. 47Ciazolo ah, kumpibawi hnenumte in kin bawipa Kumpibawi David khiah hmuifu bur ai, ‘Pathian in Solomon hming khiah na hming tahin thang ruai in, a ukhnak khiah na ukhnak tah in lo lian ruai tu selaw.’ ti in ti i. Ciafangin kumpibawipa khai a khuahluan vumin Pathian khiah bia ai, 48kumpibawipa in, ‘I mit in hmu thai in i kumpibawi tauhkheng vumah to tuhin kin pe tu Israel Bawipa Pathian khiah hmuifu tu seh.’ ti in ti i.” ti in rel i. 49Ciafangin Adonijah sualeng tute khai lau ai, amahte inn ten ah tlung i.
50Ciafangin Adonijah khai Solomon khiah kih i. Ciamanin ani khai tho ai awlta ki khiah pom meng i. 51Ciafangin Solomon khiah, “Adonijah in Solomon khiah kih peu i. Ciamanin amah in awlta ki khiah pom meng ai, ‘Kumpibawi Solomon in a hnenum khiah vangsau thawn rek tuh lo in thukham tu seh.’ti in ti i.” ti in rel i. 52Ciafangin Solomon in, “Amah khiah mi pha ilekhaw, a sam fangkhat bang khai laipua ah tlok tuh lo i. Ikhalselai sualhnak nai lekhaw, thi tuh i.” ti in ti i. 53Ciamanin Solomon in amah khiah awlta vumin lang ruai i. Adonijah khai kawi ai Kumpibawi Solomon hmai ah bok i. Ciafangin Solomon in, “Na innah tlung tu.” ti in ruai i.