1Ciafangin David in he hmun khiah Bawipa Pathian inn le Israel mite in mai thawn taihnak hlu hmun awlta i.”ti in ti i. 2Ciamanin David in Israel ramai ram dang mite khiah khawm tuhin thu pe i. Pathian inn sa tuhin ukkhe sa thiamte khiah a khuarhnak lungto solh tuhin dah i. 3Ciafangin David in kawl dawngkham le a pehhmunte ca tluangkhen bawn tuhin thir khiah a tamngai in pam ai dar le 4sida thingte in a siar zolo in a tam rauh in pam i. Ziangmanti fangin Sidon mite in le Tyre mite in sida thing tam rauh in David hnenah kawih i. 5Ciafangin David in, “I fapa Solomon khiah tlangval niu manin zai khai thiam lai lo i. Cen Bawipa ca ai i sa tuhhnak inn khiah a mawi rauh le a pha rauh i tuhai ram caang ah thaang tuh i. Ciamanin tunin cia inn ca in pai cia tuh ing.”ti in ti i. Ciamanin David in a thi hlanah a tamngai in pai cia i.
6Ciafangin a fapa Solomon khiah ko ai, Israel Bawipa Pathian ca inn sa tuhin tavuan pe i. 7Ciafangin David in Solomon hnenah, “I fapa, Bawipa i Pathian hming ca in inn sa tuh khiah i ruathnak i. 8Ikhalselai Bawipa thu khiah i hnenah, ‘Nangmah in thi tamngai luang ruai i si. Raal tamngai tawng i si. I hmai ah laivum ah thi tamngai luang ruai manin, i hming ca in inn sa tuh lo i si. 9Ikhalselai na songin fapa te tuh i. Amah khiah a rem minung i tuh i. Cen a hiang cingkim ai a raalte thawn rem ruai tuh ing. A hming khiah Solomon i tuh i. Ziangmanti fangin a sanah Israel ram ah remhnak le daphnak pe tuh ing. 10Amah in i hming ca in inn sa tuh i. Amah khiah i fapa i tuhai, kaimah khiah a Paa i tuh ing. Cen Israel vumai a a ukhnak kumpibawi ram khiah kumzangza in kho ruai tuh ing.’ti in i rel i. 11Ciamanin i fapa, Bawipa khiah nangmah thawn lo um tu selai, lo na khaang tu seh. Amah in na rel bangin, Bawipa na Pathian inn khiah lo sa tu. 12Bawipa in Israel mite uk tuhin na ap fangin, Bawipa na Pathian upadi dan khiah na hlun thaihnak tuhin fimhnak le thiamhnak khiah Bawipa in lo na pe tu seh. 13Ciafangin Bawipa in Israel mite thu khiah Moses hnenah ruaihnak dan upadi le thukhanhnakte khiah a kungniu in hlun lesikhaw, na khaang tuh i. Thahat le raalpha in um tu. Lau le thinhnawm in khai um mah. 14Bawipa inn ca in harsa ngai in sui talan thawng zakhat le ngun talan milian pakhat le thir le dar khiah a tamze manin a siar zolo in pam zo ing. Thing le lungto khai pam zo liang ing. Nangmah in khai belh thai i lai si. 15Ciahlai ah, thingvongtu le lungto thawn napertu le lettamate le a phun cang naper thiamtu khiah nangmah thawn a tamngai in um i. 16Sui le ngun le dar khiah a bo nia um tuh lo i. Tho in per pan tulai, Bawipa khiah nangmah thawn um tu seh,”ti in ti i.
17Cen David in Israel mi upate hmuah khai Solomon bawm tuhin, 18“Bawipa ning Pathian khiah ning hnenah um i lo im? Cen ning hiang cingkim ah raalrem in ning um ruai lo im? Ziangmanti fangin Bawipa in he ramai umtu mite khiah i kut songah i pe zo ai, he ram khiah Bawipa le Amah minungte in uk i. 19Ning thinlung le ning rauhla thawn Bawipa sii tuhin tum tuu-ih. Ciamanin tho in Bawipa Pathian inn khiah sa tu i lai, Bawipa thawn lungkhim dunhnak thingkuang le Pathian thilri a cianghlim khiah Bawipa hmingca ai sahnak inn songah kawih tuu-ih.”ti in rel i.