1 Chronicles 17

<<  1 CHRONICLES 17  >>

1David khai amah inn ah um teng fangin, prawfet Nathan hnenah David in, “Kai tu sida inn songah um lakin, Bawipa lungkhim dunhnak thingkuang tu ponzarhnak buk songah um khiah hmu i si.”ti in ti i. 2Ciafangin Nathan in David hnenah, “Na thin songai um bangin bawn tu. Ziangmanti fangin Pathian khiah nangmah thawn um i.”ti in sawn i.

3Ikhalselai cia zan ah Pathian thu khiah Nathan hnenah, 4 “David hnenah feh tulai, amah hnenah, ‘Bawipa in, “I umhmun tuhin inn i sak tuh lo i si. 5Ziangmanti fangin Israel mite i suah ai panin tunnia tian inn songah um awng lo ai buk pakhat hnua buk pakhat songah le tabernacle pakhat hnua tabernacle pakhat songah um ing. 6Israel mite veksen thawn i vak fangin, i minungte i khal ruaihnak Israel thukhantute hnenah, ‘Zaimanin in sida inn i sak lo i si?’ ti in kam khat bang rel awng awm?”ti in ti i,’ti in rel tu. 7Ciamanin i hnenum David hnenah, ‘Vancung mite Bawipa in, “I minung Israel mite uktu tuhin, tu khal hmunin le tu inn songin na lang ing. 8Cen na vak hmun cangah na hlun ai, na hmai in na raalte khiah na rek sah sio ing. Cen na hming khai laivum ai mi lian te hming bangin lian ruai ing. 9Ciazolo ah i minung Israel te ca in hmun pakhat dah tuh ai amahte khiah cia hmun ah cing tuh ing. Ciafangin amahte khiah amahte naihnak hmun ah um tuhai thawn kul tuh lo i hang. Cen a hlan bangin, misualte fate in khai amahte khiah, 10i minung Israel te vumah i haihhnak thukhantute san ai panin nem awng bangin nem tuh lo i hang. Cen na raalte khai na nem sah tuh sio ing. Ciazolo ah Bawipa in inn pakhat na sak tuh ing. 11Cen na tikcu khim ai, na paate hnenah kawi cu khim fangin, na fapate pakhat khiah na songin suak ruai tuhai a kumpibawi ram khiah kho ruai tuh ing. 12Amah in i inn i sak tuh ai a ukhnak kumpibawi ram khiah kumzangza kho ruai tuh ing. 13Kaimah khiah a paa i tuhai, amah khiah i fapa i tuh i. Na hlan ai pa hnenin i ngaihharhnak khiah lang sah lio bangin a hnenin i ngaihharhnak khiah lang leh tuh lo ing. 14Amah khiah i inn le i ukhnak songah kumzangza in kho ruai tuh ing. Cen a kumpibawi ukhnak khiah kumzangza in kho tuh i,”ti in ti i,’ti in rel tu,”ti in ruai i. 15 He thu hmuah le a mang ai hmuhnak bangin, Nathan in David khiah rel i.

16Ciafangin Kumpibawipa David khai lut ai Bawipa hmai ah to ai, “Aw Bawipa Pathian, Nang in hetih tluk ai i bawm heh, kaimah khiah aisu ing? Cen i inn tang zai i? 17Ikhalselai Aw Pathian, na hmai ah hete khiah a cikniu i lai. Cen na hnenum inn hmailam thu khai rel zo i si. Mi lianpui bangin i ruat i si, Aw Bawipa Pathian. 18David in zai dang rel tu nai i? Ziangmanti fangin Bawipa Pathian, Nangmah in na hnenum khiah ling i si. 19Aw Bawipa Na hnenum ca in le na thu bangin, he thil lian ngai khiah bawn ai na hnenum khiah ling ruai zo i si. 20Aw Bawipa Pathian. A vekin kin bil ai kin zahnak bangin, nang bang aisu khai um lo i. Cen nangmah lo a dang Pathian um lo i. 21Cen na minung Israel bang aisu mi phun dang um i? Amahte khiah nangmah ca tuhin nangmah Pathian in feh ai ril i si. Na hming thang tuhin le, Izip ram in na ohnak na minungte hmai ah ngaihsun urkul ngai thawn mi phun dang tamngai khiah hnawt sah i si. 22Israel mite khiah kumzangza na minung tuhin dah zo i si. Bawipa nangmah khiah amahte Pathian cang zo i si. 23Aw Bawipa Pathian, na hnenum thu le a inn thu na relhnak khiah kumzangza in kho ruai tulai na relhnak bangin bawn tu. 24‘Vancung mite Bawipa khiah Israel mite Pathian i,’ti in na hming khiah kumzangza in thang tu seh. Cen na hnenum David inn khiah na hmai ah kho tu seh. 25Ziangmanti fangin, Aw i Pathian na hnenum hnenah, ‘Inn na sak tuh ing,’ti in i ti manin, na hnenah hetih bangin sawngen tuhhnak thinlung nai ing. 26Aw Bawipa, nangmah khiah Pathian i si. He phathnak khiah na hnenum hnenah kham zo i si. 27Ciamanin na hnenum inn khiah hmuifu bur tuhin lung na khim zo i. Na hmai ah catlo in lo um tu ngio seh. Ziangmanti fangin Aw Bawipa nangmah in hmuifu bur zo i si. Ciamanin kumzangza in hmuifu tuh i,”ti in ti i.

<<  1 CHRONICLES 17  >>