1 Chronicles 11

<<  1 CHRONICLES 11  >>

1Ciafangin Israel mi veksenin Hebron ah David hnenah kawi ai, “Kinte khiah na ruh le na saa i peu i ing. 2Cen hlanlai ah Saul in kin uk fangin, nangmah khiah Israel mite suah tu le inn tlun tu i si. Bawipa in nangmah hnenah, ‘I minung Israel mite khaltu pa cang tuh i si. Cen Israel mite uktu i tuh i si.’ ti in na ti awng i.” ti in ti i. 3Ciamanin Israel mi upate veksen khai kumpibawipa hnenah Hebron ah kawi ai Kumpibawipa David in amahte thawn lungkhim dunhnak thukham khiah Bawipa hmai ah bawn i. Ciafangin amahte in David khiah, Samuel ai relhnak Bawipa thu bangin, Israel mite vumah kumpibawi cang tuhin ril i.

4Ciafangin David le Israel mi veksen in cia ramai umtu Jebus mite umhmun Jebus tihnak Jerusalem ah kawi i. 5Ciafangin Jebus mite in David hnenah, “Heta ah lut tuh lo i si.” ti in ti i. Ikhalselai David in Zion Buanhmun khiah lang ngah lio i. (Zion khiah David khuapui ti in ko i.) 6Ciafangin David in, “Jebus mite a taih hmasaber pa khiah raal bawi upaber cang tuh i.” ti in ti i. Ciafangin Zeruiah fapa Joab khai kawi hmasaber manin raalbawi upaber ngah i. 7Ciafangin David khai cia Buanhmun ah um i. Ciamanin amahte in cia hmun khiah David Khua ti in ko i. 8David in cia Buanhmun hiang cingkim ah khuapui pakhat khiah Millo ai panin a hiang cingkim ah sa i. Joab in a taanghnak khua khiah rem i. 9David khai khang am am ai Bawipa khiah amah thawn um i.

10Hete khiah David kumpibawi kho ruaitu David kut hnia ai bawite i. Amahte le Israel mite in David khiah Bawipa thu bangin kumpibawipa cang ruai i. 11Hete khiah David kut hnia ai a bawite i: Hakhmonite fapa Jashobeam khiah bawi lakah a bawi ber i. A feipui thawn mi zathum khiah velkhat in rek sio i.

12A son tu khiah Aho mi Dodo fa Eleazar i. Amah khiah mi upaber pathum songah pakhat i. 13Amah khiah David thawn Pasdammim ah um i. Ciata ah Filistin te in raaltawng tuhin pai i. Cen kawlkawn dim lo pakhat khai ciata ah um i. Israel mite khiah Filistin te hmai in tlan sio i. 14Ikhalselai anite khai cia lo lai in tang ai Filistin te khiah tawng le Filistin te khiah rek ngah i. Amahte khiah Bawipa in a rauh ngai in nehhnak pe i.

15Ciafangin sawmthum songai mi pathum te khiah Addullam khu kua ah David hnenah kawi i. Filistin raalkapte khiah Rephaim Rawn zawllai ah caam tlang i. 16Ciateng in David khai a relhhmun ah um ai Filistin raalkapte khai Bethlehem ah um i. 17Ciafangin David in a lungleng ngai in, “Aw, Bethlehem kawl dawngkham hiang ai namkum songai ti khiah ding tuhin i kawih sah selai.” ti in ti i. 18Ciamanin cia mi upa ber pathum te khai Filistin te camp khiah khel teu ai Bethlehem kawl dawngkham hiang ai namkum songai ti khiah cawi ai, David hnenah kawih i. Ikhalselai amah in ding nuam lo ai Bawipa hmai ah lai sek i. 19Ciafangin David in, “Aw i Bawipa, he ti khiah ding tuh hrimhrim lo ing. He khiah amahte nunhnak liam ngam tute thi khiah ding tuh ing?” Ziangmanti fangin amahte nunhnak liam ngam in he ti khiah kawih i.” ti in ti i. Ciamanin ding nuam lo i. Hete khiah cia mi upaber pathum te in bawn i.

20Joab nau Abishai khiah a dangte pathum lakah a upaber i. A fei pui thawn mi zathum khiah rek ai cia pathum lakah a hming ngah i. 21A pathum lakah upathnak ngah ber i. Ciamanin amah khiah amahte bawi cang i. Ikhalselai amah khiah a hmasa pathum thawn camra lo i.

22Benaiah khiah Jehoida fapa le Kabzeel mi i ai raalpha ngai i. Amah in a bawnhnak tam ngai nai i. Moah ai chintit bang minung panih khiah rek i. Cen ani khai zu ai vurtla nia ah chintit pakhat khiah kua laiteng ah rek i. 23Cen Izip mi pakhat khai rek i. Cia Izip pa khiah dong nga saang ai a kut ah fei pui sin i. Ciafangin Benaiah khai Izip pa hnenah tokrolh thawn kawi ai, Izip pa kut songin a fei pui khiah long sah ai a fei pui thawn amah khiah rek am lio i. 24Hete khiah Jehoida fapa Benaiah in bawn ai mi upate pathum lakah a hming nai i. 25Amah khiah mi 30 tah in upathnak ngah sawn i. Ikhalselai amah khiah a hmasa pathum thawn camra lo i. David in amah kil tu in dah i.

26Cen raalbawite khiah Joab nau Asahel, Bethlehem mi Dodo fapa Elhanan, 27Haror mi Shammot, Pelon mi Helez, 28Tekoa ai Ikkesh fapa Ira, Anathot mi Abiezer, 29Hushat mi Sibbekhai, Ahohi mi Ilai, 30Netophat mi Maharai, Netophat mi Baanah fapa Heled, 31Benjamin mite Kibeah ai Ribai fapa Ithai, Pirathon mi Benaiah, 32Kaash rawn ai Arbat mi Abiel, 33Baharum mi Azmaveth, Shaalbon mi Eliahba, 34Kizon mi Hashem fapate, Harar mi Shakeh fapa Jonathan, 35Hara mi Sakar fapa Ahiam, Ur fapa Eliphal, 36Mecherat mi Hepher, Pelon mi Ahijah, 37Kharmel mi Hezro, Ezbai fapa Naarai, 38Nathan nau Joel, Hakri fapa Mibhar, 39Ammon mi Zelek, Beroth mi Naharai (Zeruiah fapa Joab raal thilthuam phurtu), sawmli Ithri mi Ira, Ithri mi Kareb, 41Hit mi Uriah, Ahlai fapa Zabad, 42 Reuben mi Shiza fapa Adina (Reuben lakah a bawi i) le amah thawn sawmthum mite, 43 Maakhah fapa Hanan, Mithni mi Joshaphat, 44Ashterat mi Uzzia, Aroer mi Hotham fapate Shama le Jeiel, 45Shimri fapa Jediael, a nau Joha, Tizite mi, 46Mahav mi Eliel, Elnaam fapate Jeribai le Joshaviah, Moab mi Ithmah, 47Eliel, Obed, le Mezoba mi Jaasiel te i.

<<  1 CHRONICLES 11  >>