<< LUKE 10 >>
10 Ciahnua ah Bawipa in a dang mi sawmsarih khai naper pe ve ai amah feh hmun tuh khua le ram caang ah panih panih in a hlanin feh ruai i. 2Ciamanin amahte hnenah, “Rongkhawm tuh khiah dim napui ai rongkhawm tute khiah tlawm i. Ciamanin rongkhawm tu Bawipa in a rongkhawm tuhin napertute hlat tuhin sawngen tuu-ih. 3Feh tuu-ih. Mahleng lakah tu bangin ning hlat ing. 4Paisa dip i tu seh, rong dip i tu seh, kedawl i tu seh zaikhai keng mah ih. Cen lam lakah aisu khai pon mah ih. 5Cen ning tlung hmun inn ah a hmasaber in, “He inn ah remhnak hleng tu seh.” ti in ti tuu-ih. 6Cia inn ah mi thawn ai rem tu pa um lekhaw ning remhnak khiah cia inn ah hleng tuh i. Um hlahlekhaw, ningmah hnenah hleng leh tuh teu i. 7Cen cia inn ah um tu hlen i lai ning pe hnak hmuahhmuah khiah ei in ding tuu-ih. Ziangmanti fangin napertu khiah a pumcawmhnak ngah tlak i. Inn khat hnua inn khat ah thawn mah ih. 8Cen khua songah ning lut fangin ning caang lekhaw ning hmai ai dahhnak khiah ei sah tuu-ih. 9Ciata ai a urte khiah cakruai tu i lai amahte hnenah, ‘Pathian ukhnak khiah ning nong ah hleng i hang.’ ti in rel tuu-ih. 10Ikhalselai khua songah ning lut fangin, ning caang hlah lekhaw, cia khua songai lampui ah feh tu i lai, 11‘Kin ke ah bekhnak ning khua songai laivut rori khai thing sek i ing. Ikhalselai he khiah ling tuu-ih, Pathian ukhnak khiah ning nong ah hleng i hang.’ 12Ikhalselai ning rel ing, Cia nia ah cia khua tahin Sodom khua khiah tuar khop tuh sawn i.
Sir nuam lo khuate vumah rimsuhnak
(Matthew 11:20-24)
13Khorazin, na vumah siathnak khiah hleng tu selaw! Bethsaida, na vumah siathnak khiah hleng tu selaw! Ziangmanti fangin na hmun ai naper lian puipui khiah Tyre le Sidon ah per taselai, amahte khiah vutkuang le vaidip sil in amahte sual khiah sir awng tuh zo napui i. 14Ikhalselai thukhan nia ah ning hnak in Tyre le Sidon khiah tuar khop tuh sawn i. 15Cen vancung tian ai thaang tu nang Kapernaum khai hell songah na hla tuh teu i. 16Ning za tute in i za ve i. Nau ning tat tute in nau i tat ve i. Nau i tat tute in i hlat tu pa nautat i.” ti in rel i.
17Ciafangin sawm sarihte khai ang kongin let leh ai, “Bawipa, Khuavangte rin na hming in kin thu kin ngai i.” ti in rel i. 18Ciafangin Zisu in amahte hnenah, “Satan khiah vancung in tlektla bangin tlok khiah hmu ing. 19Ning te in rul le momsir tlawhhnak tuh huthawm le ning raalte vumah power khiah ning pe ing. Zai in khai ning ur ruai ben tuh lo i. Ikhalselai khuavangte in ning thu ning ngai manin ang mah ih. Ikhalselai ning hming khiah vancung ah khum manin ang tu sawn ih.” ti in rel i.
Zisu in Pathian Thangphat i
(Matthew 11:25-27; 13:16-17)
21Ciafangin Zisu khai a thin songin ang ai, “Aw i Pa, Van le lai uktu Bawipa, na an ing. Ziangmanti fangin hete khiah mifimte le lailingte hmun in thup ai naupangte hnenah larruai i si. I Pa ciatih i tu selaw. Ziangmanti fangin, cia khiah na daihhnak i. 22I Pa in zai hmuahhmuah i ap zo i. A Fapa khiah a Pa lek in ling i. Ciabang in a Pa khai a Fa le a Fa ai ling ruaihnak te ian in ling ve i.” ti in rel i. 23Zisu khai a hnuahlunte hnen lamah her ai a thupniu in, “”Ning hmuhnak he thilte hmu tu mit khiah a hmuifu i. 24Ziangmanti fangin ning rel ing. Prawfet le kumpibawi tamngai in ning hmuhnak thilte khiah hmu nuam napui ai hmu lo i. Ning zahnak thute khiah za nuam napui ai za lo i.” ti in rel i.
A Pha Samarih Pakhat
25Ciafangin thukhantu pakhat khai ding ai amah khiah leklam kongin, “Bawipa, nun ohnak co tuhin zai bawn i kul i?” ti in zawt i. 26 Zisu in amah hnenah, “Upadi Dan songah kon tih in ngan i? Kon tih in siar pa si?” ti in sawn i. 27Ciafangin amah in, “Nangmah in Bawipa na Pathian khiah na thinlung veksenin le na rauhla veksenin le na thari veksenin le na ruathnak hmuah thawn it tuh i si; cen na ompui khiah nangmah bangin it tuh i si.” ti in sawn i. 28Ciafangin Zisu in amah hnenah, “A hman ngai in phi i si. Ciabang in hlun tulai na nung tuh i.” ti in ti i. 29Ciafangin cia pa in amah veve khiah mawh lo in luat nuam manin, Zisu hnenah, “I ompui khiah aisu i?” ti in zawt i. 30Ciafangin Zisu in, “Mi pakhat khiah Jerusalem in Jerikhu ah zu le rukote thawn tawk dun le rukote in a thilthuam khiah hawk sah ai amah khiah vit ben fangin a thi banghma in hlum i. 31Ciafangin phungki pakhat khiah cia lamah lo feh ngelcel le cia pa khiah hmu fangin cia phungki khai lampui nak khat lam in khel i. 32Ciabang in Levi pakhat khai ciata ah hleng fangin cia pa khiah sik ai lam nak khat lamin khel ve i. 33Ikhalselai Samarih mi pakhat khai khualsi ai cia pa hmun ah hleng fangin cia pa khiah hmu le amah khiah ninghio i. 34Ciamanin ani khai cia pa hnenah kawi ai a hmaihma khiah pon thawn pen ben fangin thau le capitti khiah burh ai a siphuh vumah tauh le inn pakhat ah kawih ai amah khiah tuamhlawm i. 35A thangha fangin ani khai a feh hlanah denari paisa panih khiah lang ai inn naitu pa khiah pe le, ‘Amah khiah tuam lo hlawm tulai i hleng leh fangin amah ca ai na bohnak hmuah na rul tuh ing.’ ti in ti i. 36Ciamanin hete pathum songah kon mi ber in rukote ai vithnak pa lakah a ompui cang i?” ti in zawt i. 37Cia pa in, “A ngaihhar tu pa khiah a ompui i.” ti in sawn i. Ciafangin Zisu in, “Nang khai feh tulai ciatih bangin bawn tu ve.” ti in rel i.
Zisu in Martha le Mary te leng i
38Anite khai feh ai khua pakhat songah lut ai Martha tihnak nupui pakhat in amah khiah a innah tlung ruai i. 39Martha in Mary tihnak farnu pakhat nai ai Mary khai Zisu ke hamah to ai Zisu thurelhnak khiah ngai i. 40Ikhalselai Martha tu rong suang pai in na hnok ngai in um i. Ciamanin Martha khai Zisu hnenah kawi ai, “Bawipa, i nau in kaimah lek in rong suang tuh ai i dah khiah zai na poi lo im? I bawm ruai tu.” ti in ti i. 41Ciafangin Zisu in, “Martha, Martha, thil tampui lakah thin na cawl hnelhno i. 42Ikhalselai pakhat lek khiah thupui i. Cia khiah Mary in ril zo manin a hnenin aisu in khai lang sah tuh lo i.” ti in sawn i.