<< LUKE 8 >>
Rongci vorh santehhnak
(Matthew 13:2-23; Mark 4:1-20)
8Hehnua fangin Zisu khai khua khat hnua khua khat ah khualsi ai Pathian ukhnak thupha rel i. Amah thawn a hnuahlun Hlainihte le 2Amahte songai khuavangte le urhnakte cakruai hnak nupangte um i. Cia nupangte khiah a songin khuavang pasarih suakhnak Mary (Magdalene tihnak); Herod innsang kilkhawltu Zuza nupui Joanna le Susana le a dang tamngai nupangte i. He nupangte in Zisu le a hnuahlunte khiah amahte naihnak thawnin bawm ai cawm i. 4Miburpui khiah taai liang lo ai khua khat hnua khua khat ai minungte khiah Zisu hnenah kawi fangin, Zisu in he santehhnak rel i: 5“Rongci vorh tu pa khiah rongci vorh tuh in feh i. Rongci khiah vorh fangin a hrekkhat khiah lam hiang ah fu i. Cia rongci te khiah ke in fon ai hli lakai vaniute in ei berh i. 6A hrekkhatte khiah lungto lakah fu ai a po fangin ti um lo manin voi berh i. 7A dang rongci te khiah hling lakah fu ai hling thawn po khat le hling in khuk lio i. 8Cen a dangte tu lai pha vumah fu ai po le a cinghnak tahin let zakhat tam in a thai nai i.” ti in rel i. Hete khiah rel ben fangin, Zisu in, “Khuaza tuh ai bil naite in za tu seh.” ti in au i. 9A hnuahlunte in cia santehhnak a dikbe khiah zawt i. 10Zisu in, “Ningte hnenah Pathian ukhnak thuthup linghnak tuh ning pe i. Ikhalselai a dangte hnenah tu santehhnak thawn lek in rel ing. Ziangmanti fangin amahte in sik tuh napui hmu tuh lo i; za tuh napui ai ling tuh lo i. 11He santehhnak a dikbe khiah he i: Rongci khiah Pathian thu i. 12Lam hiang ai rongci te khiah cia thu za tute i. Ciafangin khuavang khiah kawi le amahte in cia thu khiah sang fangin ohnak ngah tuh manin amahte thin songin cia thu khiah lang sah lio i. 13Lung vumai te khiah cia thu za fangin ang ngai in cia thu khiah za napui le a hnuk nai lo i. Campuikhat tu sang rih le sualsohnak cuu hleng fangin amahte khiah pai berh i. 14Hling lakai a fu tute khiah amahte in cia thu khiah za i. Inapui ai amahte khiah laivum liathnak le nunnuamhnak le lauhnak in khuk ai a thai nai ben lo i. 15Ikhalselai lai ram pha ai fu tute khiah, thinlung dik le thinlung pha thawn cia thu khiah za fangin khawi ai, tuar ngio le a thai thai i.
Maivar santehhnak
(Matthew 4:21-25)
16Aisu in khai mei-inn khiah var in kho songah thup lo i. Cen khuahluan hnia ah khai dah lo i. Ikhalselai a luttute in cia meivar khiah hmu thai tuhin meivar hmun vumah dah i. 17Ziangmanti fangin laar tuh lo ai thuphnak zaikhai um lo i. Cen ling tuh lo le mualpho tuh lo ai thuphnak zaikhai um lo i. 18Ciaman in ning khuaza dan khiah ralring tuu-ih. Ziangmanti fangin a naitu te khiah a tam amam in pe tuh ai a nai lo tute hnenin a nai vuahhnak lam khai lang sah tuh i.
Zisu nuu le a naute
(Matthew 12:46-50; Mark 3:31-35)
19Ciafangin a hnenah a nuu le a unaute khiah kawi ai miburpui manin Zisu nong ah kawi thill lo i. 20Ciamanin mi pakhat in amah hnenah, “Na nuu le na unaute khiah sumpua ah ding ai na hmu caak i.” ti in rel i. 21Ciafangin Zisu in amahte hnenah, “I nuu le i unaute khiah Pathian thu ngai ai a bawntute i.” ti in ti i.
Zisu in khuahu dapruai i
(Matthew 8:23-27; Mark 4:36-41)
22Ni khat nia ah Zisu in a hnuahlunte hnenah, “Tipui ralkhat lamah feh nga sing.” ti in ti i. Ciamanin anite khai khawm songah lut ai feh i. 23Ciatih ai a feh teng fangin Zisu khai mitmu i. Ciafangin tipui vumah khuahu pui tlung ai khawm khiah ti in cum ai amahte khiah laukul ngai in um i. 24A hnuahlunte in Zisu hnenah kawi ai, “Bawipa, bawipa, ti in kin lan tuh i.” ti in ti ai phawr i. Ciafangin Zisu khai tho ai khuahu le tihual khiah hau ai khuahu khai dapsut ai zai hmuahhmuah a dap niu in um i. 25Ciafangin a hnuahlunte hnenah, “Ning sanghnak a konah i?’ ti in zawt i. Anite khai lau kong le ngaihsun ur kongin, “Aisu i pa? Hli le ti te khiah thu pe ai anite in a thu ngai i.” ti in ti i.
Khuavang naitu pa cakruaihnak
(Matthew 8:28; Mark 5:1-20)
26Ciafangin anite khai Galilee ralkhat lam ai Kadarenes ram ah hleng i. 27Zisu khai laipua ah theuh sawng fangin khua songin mi pakhat in amah khiah caang i. Cia pa in khuavang tamngai khiah a rai ngai nai zo ai pon sil lo in le inn ah khai um lo ai hlan lakah um i. 28Amah in Zisu khiah hmu fangin, au ai Zisu hmai ah bok ai aw cawm ngai thawn, “A Saangber Pathian Fapa Zisu, nang thawn zai bawn tuh nai i sing? Na ngen ing, i rim mah.” ti in ti i. 29Ziangmanti fangin Zisu in a ciang lo rauhla khiah cia songin suak ruai i. Ziangmanti fangin cia khuavang in cia pa khiah vel tamngai pom de le ciamanin cia pa khiah a kut le a ke khiah thirri thawn hen napui cia thirri te khiah cat sek de ai cia khuavang in amah khiah hampalakah hnawt de i. 30Ciafang in Zisu in amah hnenah, “Na hming aisu i si?” ti in zawt i. Amah in, “I hming khiah Legion ing.” ti in sawn i. Ziangmanti fangin khuavang tamngai khiah amah songah um i. 31Ciafangin khuavangte in Zisu hnenah amahte khiah a tongnia um lo rawnkua thuk songah lut ruai tuh lo in ninghio ngen i. 32Ciafangin ciata ah vok rual rualkhat khiah mual vumah rongei lianglo in um i. Ciafang in cia khuavang te in cia vokrual songah luthnak tuh khuan ngen ai Zisu in luthnak tuh khuan pe i. 33Ciafangin cia khuavangte khai cia pa songin suak ai vokrual songah lut le vokrual te khai liang vumin tipui songah theu ai ti in lan berh i. 34Vokkhaltute in cia khiah hmu fangin, anite khai tlan ai khua songah le ram lakai umtute hnenah cia thu khiah rel i. 35Ciafangin cia mite khai a canghnak thu khiah zai i ni ti sik tuh in feh i. Anite khai Zisu hnenah hleng ai a songin khuavang tamngai suakhnak mi pa khiah Zisu ke hamah pon khai sil ai a lungmu khai fim ngai in um khiah hmu fangin anite khai lau ngai i. 36Zisu in khuavang naitu pa cakruai dan thute khiah amahte hnenah a hmutute in rel i. 37Ciafangin Kadarenes ram le a hiang ram ai umtu burpui in amah khiah amahte hmun tlan tuhin ngen i. Ciafangin Zisu khai khawm songah lut ai let leh i. 38A songai khuavang tamngai suakhnak pa in Zisu thawn in um tuhin Zisu khiah ngen napui ai 39Zisu in amah hnenah, “Na inn ah tlung tulai zaitluk lian in Pathian in nangmah ca ai bawn hnak thilte khiah hmuh tu.” ti in ti i. Ciafangin ani khai feh ai cia khua pumpalah ah Zisu in amah ca in zaitluk lian ai bawnhnak thilte khiah phuang i..
Jairus fenu nung ruai i
(Matthew 9:18-26; Mark 5:21-43)
40Zisu let leh fangin mi tamngai in amah khiah ang ngai in caang i. Ziangmanti fangin amahte in Zisu khiah haak hnelhno i. 41Ciafangin sanginn uktu Jairus tihnak mi pakhat khiah kawi ai Zisu ke hamah bok ai, a inn ah kawi tuhin ninghio ngen i. 42Ziangmanti fangin amah in fenu niu pakhat lek nai ai, cia nuu khiah kum hlainih dung i ai a thi banghma i. Zisu khai ciata ah feh fangin miburpui in teltun lio in bur ngal i. 42Ciafangin nupui pakhat khiah kum hlainih song thisuak in ur ai a naihhnak hmuah sibawite pe napui aisu in khai cia nuu khiah cakruai ben lo i. 44Cia nuu khai Zisu hnuahlam in kawi ai Zisu pon par khiah khing le ciasawng fangin a thisuak hnak khiah lawm vut i. 45Ciafangin Zisu in, “Aisu in i khing i?” ti in zawt i. Mi hmuah in el piang fangin, Peter le amah thawn umtute in, “Bawipa, miburpui in na bur ai na nem ai, ‘Aisu in i khing i?’ ti i sim?” ti in ti i. 46Zisu in, “Mi pakhat in i khing i. Ziangmanti fangin i songin power suak khiah ling ing.” ti in ti i. 47Cia nuu in a thup in um thill lo khiah hmu fangin, thing biakbo kongin kawi ai a ke hamah bok le mi veksen te hmai ah, zaimanin Zisu khiah khinghnak thu le cak vuthnak thu khiah rel i. 48Ciafangin Zisu in cia nuu hnenah, “Fenu, na sanghnak in na cakruai zo i. Thinnuam in feh tu.” ti in ti i. 49Ciatih in a pong lak fangin, sanginn uktu Jairus inn in mi pakhat khiah hleng ai, “Na fenu thi zo i. Bawipa khiah hnaihnok ma hang.” ti in rel i. 50Cia khiah Zisu in za fangin, Zisu in Jairus hnenah, “Lau mah. Sang tulai na fenu khai cak tuh ngawn i.” ti in ti i. 51Zisu khiah Jairus inn ah hleng fangin, Peter, John le James le fenu nuu le paa siar lo aisu khai lut siang lo i. 52Cialak in mi veksenin kap ai cia nuu khiah kah tlaang i. Ikhalselai Zisu in, “Kap mah in. Amah khiah thi lo i. Mitmu ngawn i bang.” ti in ti i. 53Amahte in cia nuu khiah a thi i ti ling manin Zisu khiah zauhsuam kong in hnihcip i. 54Ikhalselai Zisu in cia nuu khiah a kut in awh ai, “Fenu niu, tho tu.” ti in ruai i. 55Ciafangin a rauhla khiah hleng leh ai, cia nuu khai tho vut i. Ciafangin Zisu in cia nuu khiah rong pe ruai i. 56Ciafangin a nuu le a paa khiah multing ngai i. Ikhalselai Zisu in amahte in a canghnak thu khiah aisu khai rel tuh lo in kham i.