1 Ciazolo ah Job in hetih bangin thurel i:
2 “Pathian nung song hmuah in,
a dikcang ai thu i khan sah lo tu Pathian,
thin i thip ruaitu a Cungnung Pathian,
3 Haihawhhnak i songah um song hmuah in
Pathian haihawh khiah i hnar songah um song hmuah in,
4 I kaa in a pha lo pong tuh lo ing.
I lei in thudon rel tuh lo ing.
5 Ning hman i ti in khai pong tuh hrimhrim lo ing.
I thi hlanlo i dikcanghnak khiah lon tuh lo ing.
6 I dikcanghnak khiah a kho ngai in pom tuh meng ai hlat tuh lo ing.
I nung song hmuah in i thinlung in i hau tuh lo
7 I raalte khiah misualte bangin lo cang tu seh.
I tawngtu khai mi dikcanglo te bang in lo cang tu seh.
8 Pathian in a nunhnak khiah lang sah lio lekhaw,
mihrokhrawl pa in a miat tam ngai ngah rinin,
zai umm tuhhnak nai i?
9 Amah vumah harsahnak hleng fangin,
a kaphnak khiah Pathian in za sah tuh im?
10 Amah khiah a Cungnung Pathian lakah ang tuh im?
Amah in Pathian khiah ko nga im?
11 Pathian huthawm khiah ning cuk ngang.
A Cungnung Pathian dan khiah thup tuh lo ing.
12 Ning veksenin hmu tuh zo i si.
Ilekhaw ziangmanin thulovang pong hnelhno i si?
13 He khiah misual pa in Pathian hnenai ngahhnak i.
Mi nemhtute in a Cungnung Pathian hnenin cohnak ro khiah he bang i:
14 Fate tamngai nai lekhaw,
vangsau thawn thi tuh i.
A fate khiah rong kham tuh lo i.
15 A hnua ai nunglaite khai thi tuh ai vui tuh i.
A hmaitong nuute in amahte khiah kah tuh lo i.
16 Amah in tangka khiah laivut bangin khawl ai,
thilthuam khiah laisawr bangin pum khalselai,
17 Amah in pum tuh napui ai mi dikcangte in sil sah tuh i.
Mawhhluk tuh nai lote in a tangka khiah zeem tuh i.
18 A inn khiah pelep bang in sa ai
santari kiltu pa bangin buk khiah sa i.
19 Milian pa khiah zau tuh ai tholeh tuh lo i.
A mit khiah hong tuhai amah khiah um leh tuh nawn lo i.
20 Amah khiah lauhnak in ti bangin cum tuh i.
Zanlai in amah khiah khuahu in lan tuh teu i.
21 Nisuak lamai hlivua in amah khiah lan tuh ai amah khiah pai tuh lio i.
A umhmunin amah khiah thiar tuh teu i.
22 CiaPathian in amah khiah khawh tuhai,
amah khiah zah tuh lo i.
A huthawm songin amah khiah siarmawti in tlan tuh i.
23 Mite in amah hmai ah papabeng tuhai,
amah khiah tlan ruai tuhin mite in nger tuh i.