1 Ciafang in, Job in,
2 “Ciabang thu tampui za awng zo ing.
Ning veksenin mi topui thiamlo pawl i si.
3 Hlivua bang teng ai ponghnak khiah
a bo nia um nga im?
Zai ning luah manin ciatih bangin i sawn i si?
4 Ningmah khiah kaimah bang in um i silai,
kai khai ningmah bang in pong thiam ve ing.
Pon tam ngai thawn thu ning rel thai ing.
I lu khai thing thai ve ing.
5 Ikhalselai i kaa in thaa ning pe tuh ai,
i pon hlum in ning lungsiahnak khiah ning lawm ruai tuh i.
6 Ikhalselai pong rinin,
i lungsiahnak khiah lawm thill lo i.
Cen pong lo in um in khai, i lawm cuang lo i.
7 Tuntu Pathian in i cawl ruai lio i.
I innkua khiah a veksen in i hnawm can sah sio i si.
8 Nangmah in i ro ruai lio ai
ciatih in i lakah tettikhan i si.
I romhnak khiah tho ai i tawng i.
Kaimah lakah tettikhan i.
9 I lakah thinraw manin amah in i hlik dek i.
Amah in i hua i.
A kaam thawn kaimah lakah kaamriat i.
I raal pa in a mit thawn i sun ai i sik i.
10 Mite in zauh i suam i.
I biang khiah hnihcip kong in i beng ai
i tawng tuhin baawm tlang i.
11 Pathian in misualte hnenah i ap lio i.
Mi pha lote kut songah i pe lio i.
12 Thinnuam ai um rih awng ing.
Inapui ai amah in i thin i khoi sah berh i.
Amah in i hawng in khai i duk ai
i thing dekai a cik niuniu in i keh ruai sio i.
A hmuisunghnak tuhin i dah i.
13 A conkiang kaptute in i kulh i.
Amah in i thin khiah i sun sahai, ning i hio lo i.
I nikkha khiah laipua ah i bung sah i.
14 Maa pakhat hnua pakhat thawn i ur ruai ai
raal bangin i nemh i.
15 I vun khukhnak tuhin vaidip khui ing.
I lu khiah laivut lakah hma ing.
16 I hmai khai i kaphnak in san berh ai
i mitte khai hang bel i.
17 Ikhalselai i kut in mi vit lo ing.
I sawngenhnak khai a ciang liang i.
18 Aw laipua aw, i thi khiah lo khuk malaw!
I kaphnak khiah lawm nia lo um ma seh.
19 Tun rinin i tettikhantu pa khiah vancung ah um i.
I thu i rel sah tu pa khiah vancung ah i.
20 I rualpuite in zauh i suam i.
Pathian hnenah mithli thawn kap ing.
21 Mi pakhat in a rual ca in ninghio ngen sah
bangin, cia pa in i ca in Pathian hnenah
ninghio i ngen sah i.
22 Kum zai cam lo ah khualsi tuh ai
ciata in letleh tuh lo i hang ing.