Zisu le nulepa sualhnak bawntu nuu
1Zisu khai Oliv mual vumah feh i. 2A thangha zing niu in ani khai temple songah kawi ai mi veksenin a hnenah kawi i. Ani khai to ai amahte khiah thucuk i. 3 Upadi dan cuktu sazate le Farasite in Zisu hnenah nulepa sualhnak bawn lakai pomhnak nupang pakhat khiah kawih ai, amahte laiteng ah dah ben fangin, 4Amah hnen ah, “Saza pa, he nupui nuu khiah nulepa sualhnak bawn lak rori in pomhnak nuu i. 5Moses in upadi dan song ah ciabang mi khiah lungto in sep tuh in kin ruai i. Ikhalselai nang tang akontih in rel pa si?” ti in zawt i. 6He khiah amah mawhhluk nuam lamin a lek kong ai zawthnak i. Ikhalselai Zisu khai ut ai amahte relhnak za lo bangin, laipua ah a kut in ngan i. 7Amahte in zawt leh thio fangin Zisu khai vancau ai amahte hnenah, “Ning lakah sualhnak nai lo tu pa in cia nuu khiah lungto in a hmasaber in sep pan tu seh.” ti in ti i. 8Ciafangin ani khai ut leh thio ai laipua ah laingan leh thio i. 9Ciafangin a zatute khai amahte sualhnak ling manin, pakhat hnua pakhat a upaber ai panin a hnuataber tianin tlan sio i. Ciafangin Zisu le amahte laiteng ai dingtu nupang lek taang i. 10Zisu khai vancau ai nupui nuu lo a dang aisu khai hmu lo fangin, cia nuu hnenah, “Mawh na hluk tute tu akonah i pa? Aisu in khai na cawh lo im?” ti in ti i. 11Cia nuu in, “Bawipa aisu in khai i cawh lo i.” ti in ti i. Zisu in cia nuu hnenah, “Kai in khai na cawh tuh ve lo ing. Feh tu lai sual nawn ma hang.” ti in ti i.
Zisu khiah khuavar i
12Ciafangin Zisu in amahte hnenah, “Kaimah khiah laivum var ruai tu khuavar ing. I hluntute in khuathim lakah vak tuh lo ai nunhnak khuavar ngah tuh i.” ti in ti i. 13Ciamanin Farasite in amah hnenah, “Nangmah veve tettikhan i si. Na tetti khanhnak khiah hman lo i.” ti in ti i. 14Zisu in amahte hnenah, “Kaimah veve tettikhan khalingkhaw i tettikhan hnak khiah hman i. Ziangmanti fangin a konin hleng ing ti le a konah feh tuh ing, ti ling ing. Ikhalselai ningte in kaimah khiah konin hleng i ti le konah feh tuh i ti rel thill lo i si. 15Ningte in minung dan in thutan i si. Kai in aisu khai thutan lo ing. 16Cen thutan rinin i thutanhnak khiah hman i. Zaimanti fangin kaimah lek i lo ai i hlat tu i Pa thawn i ing. 17Ning thukham songah khai mi panih ai tettikhan hnak khiah hman i ti in ngan zo i. 18Kaimah khiah kaimah veve teti khan tu pakhat ing. Cen i hlat tu i Pa in kaimah khiah tetti i khan i.” ti in ti i. 19Ciafangin amahte in a hnenah, “Na Pa tu a konah i?” ti in zawt i. Zisu in, “Ning te in i ling lo i si. I Pa khai ling lo i si. I ling ta i silai i Pa khai ling tuh napui i si.” ti in sawn i. 20He thute khiah Zisu in temple songah thucuk teng fangin tangka khawlhmun hiang ah pong i le ciamanin aisu in khai amah khiah pom lo i. Ziangmanti fangin a cuu khim lai lo i. 21Ciafangin Zisu in amahte hnenah, “Kaimah hlanlam feh ngangkhaw ning te in i sii tuh napui ai ning sualhnak thawn ning thi tuh i. I feh hmunah kawi thill tuh lo i si.” ti in rel leh thio i. 22Ciafangin amah in, “I feh hmun ah, kawi thill tuh lo i si.” ti in ti manin, Judah mite in, “Amah veve rek tum i ni im?” ti in ti i. 23Ciafangin Zisu in amahte hnenah, “Ningte khiah laihnia mi i si. Kai khiah a vanvum in hleng ing. Ningte khiah he laivum mite i si. Kai khiah he laivum minung i lo ing. 24Ciamanin ning sualhnak thawn ning thi tuh i ning ti ing. Kaimah khiah amah i ti in sang hlahleisikhaw ning sualhnak thawn ning thi tuh i.” ti in ti i. 25Ciafangin amahte in amah hnenah, “Aisu i si?” ti in zawt i. Zisu in amahte hnenah, “A ngom ai panin ning rel ciahnak pa ing. 26Ning thu rel tuh le ning thutan tuh a tamngai nai ing. Ikhalselai i hlat tu pa khiah a hman i ai amah hnenai i zahnak khiah laivum mite hnenah rel ing.” ti in rel i. 26Amahte in Zisu in a Pa thurel i ti ling lo i. 28Ciafang in Zisu in amahte hnenah, “Ningte in mi Fapa ning tar fang in, ciafangin kaimah khiah amah i ti le kaimah thu in zaikhai bawn lo ai i Pa ai i cuk bangin he thute rel i ti ling tuh i si. 29I hlat tu pa khiah kaimah thawn um ai i Pa in kaimah lek in i hlum lo i. Ziangmanti fangin amah lungkhimhnak te bawn tio ing.” ti in rel i. 30He thute rel fangin mi tam ngai in amah sang i.
Thuhman in ning luat ruai i
31Ciafangin Zisu in amah sang tu Judah mite hnenah, “I thu hlun ngio le i sikhaw, i hnuahlun ngaingai i tuh i si. 32Ciafangin ningte in thu hman ling tuh ai cia thuhman in ning luat ruai tuh i.” ti in rel i. 33Amahte in a hnenah, “Kin heh Abraham fate i ing. Aisu sal khai cang awng lo i ing. Kontih in nang in, ‘Ning luat ruai tuh i.’ ti in ti i si?” ti in sawn i. 34Zisu in amahte hnenah, “Thungai, thungai in ning rel ing, Sualhnak bawn tute khiah sualhnak hnenum i. 35Cia hnenum in cia inn ah kum khua in um ngio lo i. Ikhalselai a Fapa zong kum khua in um i. 36Ciamanin a Fapa in ning luat ruai lekhaw, ning luat peu peu i. 37Abraham fate i si ti ning ling ing. Ikhalselai ning song ah i thu um lo manin i rek tum i si. 38I paa thawn ai i hmuhnak rel ing. Ningte in ning paa thawn ai ning hmuhnak bawn i si.” ti in sawn i. 39Amahte in a hnenah, “Abraham khiah kin paa i.” ti in sawn i. Zisu in amahte hnenah, “Abraham khiah ning paa i selai Abraham perhnak bang in per tuh i si. 40Ikhalselai Pathian hnenai a zahnak thuhman ning rel tu kaimah khiah i rek tum i si. Abraham in ciatih in bawn lo i. 41Ning paa naper per i si.” ti in ti i. Ciafangin anite in, “Zawlfa i lo i ing. Paa pakhat nai i ing. Cia Paa khiah Pathian i.” ti in ti i. 42Zisu in amahte hnenah, “Pathian khiah ning paa i selai, i it tuh napui i si. Ziangmanti fangin Pathian hnenin suak ai amah hnenin hlenghnak ing. Kaimah thu in hleng lo ai amah ai i hlathnak i. 43Zaimanin i relhnak i ling sah lo i si? I thu khiah ningte in ngai lo manin ling lo i si. 44Ningte khiah ning paa khuavang fa i si. Ciamanin ning paa sualhnak per tuh i si. Amah khiah a ngom ai panin mirek tu i ai thuhman songah um lo i. Ziangmanti fangin a songah thuhman um lo i. Amah in thudon rel fangin cia khiah amah ziaza i. Ziangmanti fangin amah khiah thudon reltu pa i ai amah khiah thudon hmuahhmuah te paa i. 45Cen thuhman ning rel manin i sang lo i si. 46Aisu in i sualhnak i hmuh thill i si? Cen thuhman rel lengkhaw, zaimanin i sang lo i si? 47Pathian mite in Pathian thu ngai i. Ningte in ngai lo i si. Ciamanin Pathian minung i lo i si.’ ti in ti i. 48Ciafangin Judah mite in amah hnenah, “Nangmah khiah Samarih mite i si ai khuavang nai i si ti in na ti heh kin hman i lo im?” ti in ti i. 49Zisu in, “Khuavang nai lo ing. Ikhalselai i Paa khiah upat ai ningte in u i pat lo i si. 50Kaimah thangphathnak sii lo ing. Thangphathnak sii tu le thutan tu pakhat um i. 51Thungai, thungai in ning rel ing, I relhnak hluntute in thi tuh veng lo i. ”ti in ti i. 52Ciafang Judah mite in amah hnenah, “Tunin nangmah in khuavang nai i si ti na ling i ing. Abraham le prawfette khiah thi zo sio i. Cia nang in, ‘I relhnak a hluntute in thi tuh veng lo i.’ ti i si. 53A thi zo kin paa Abraham hnak in na lian sawn im? Cen prawfette khai thi zo sio i. Nangmah veve khiah aisu tum i si?” ti in ti i. 54Zisu in, “Kaimah veve upat lengkhaw zaikhai i lo i. ‘Amah khiah kin Pathian i’ ti ai ning tihnak i Paa in i upat i. 55Inapui ai ningte in amah ling lo i si. Ikhalselai amah khiah ling ing. ‘Amah khiah ling lo ing,’’ ti inglai kaimah khai ningte bang in thudon rel i cang tuh i. Ikhalselai kaimah in amah ling ai a relhnak hlun i ing. 56Ning paa Abraham in i teleh nia hmu tuh khiah ang ngai i. Cia amah in hmu fangin ang rauh i.” ti in ti i. 57Ciafangin Judah minungte in amah hnenah, “Kum sawmnga rin na khim lai lo ai Abraham hmu zo i sim?” ti in ti i. 58Zisu in amahte hnenah, “Thungai, thungai in ning rel ing, Ahraham hlanah, Kaimah um zo ing.” ti in sawn i. 59Ciafangin amahte in amah huat tuhin anite in lungto khul i. Ikhalselai Zisu khai amah veve khiah thup ai temple songin suak ai amahte lakin feh ai amahte khiah khel sek i.