A unaute in khai sang lo i
1Hehnua ah Zisu khiah Galilee ramah feh i. Ziangmanti fangin Judah mite in amah khiah rek tuh in sii manin Judea ramah vak nuam lo i. 2Ciafangin Judahte Tabernacles tihnak rongkhawm puai khiah nong i hang. 3Ciamanin a unaute in Zisu hnenah, “Heta in thawn tulai, na hnuahlunte in khai na perhnak hmu thill thai in Judea ramah feh tu. 4Aisu in khai mi zapui ai ling daih lawn si in a thupniu ai naper hnelhno um lo i. Hete khiah bawn peu ilesikhaw, laivum mi hmuahhmuah hnenah hmuh tu.” ti in ti i. 5Ziangmanti fangin a unaute in khai amah khiah sang ce lo i. 6Ciafangin Zisu in amahte hnenah, “I cuu khiah khim lai lo i. Ning cuu tu zaikom in khai um tio i. 7Laivum mite in ning hua thill lo i. Ikhalselai amahte bawnhnak khiah a pha lo i ti in tettikhan manin laivum mite in i hua i. 8Ningte in he puai ah lo feh tuu-ih. Kai ngawn feh tuh lai lo ing. Ziangmanti fangin i cuu khim lai lo i.” ti in rel i. 9Ciatih ai rel ben fangin ani khai Galilee ah um hlen i. 10Ikhalselai a unaute feh sio fangin, ani khai a lar ngai in i lo ai a thupniu in cia puai ah feh i. 11Ciafangin Judah mite in amah khiah puai lakah sii ai, “A konah i?” ti in ti i. 12Ciafangin amah manin mite khai eldun tlaang hnelhno i. Ziangmanti fangin a hrekkhatte in, “Amah khiah mi nun pha i.” ti in ti ai a dangte in, “I zel hlah. Amah in mite zawl i.” ti in ti i. 13Ikhalselai Judahte kih manin aisu in khai a laar ngai in a thu rel ngam lo i. 14Puaihnak a laiteng dung khim fangin Zisu khai temple songah kawi ai thucuk i. 15Ciafangin Judah mite in, “Kontih ai he pa in lai rin zir awng lo ai lai ling i pa?” ti in ngaihsunur kong in rel i. 16Zisu in amahte hnenah, “I cukhnak thu khiah kaimah thu i lo ai a hlat tu pa thu i. 17A daihhnak bawn tu hmuah in, he thu khiah Pathian hnenin maw kaimah thu ai relhnak i ti ling tuh i. 18Amah thu reltu pa in amah thangphathnak sii i. Ikhalselai a hlat tu pa thangphathnak sii tu pa khiah a hman i ai a songah dikcang lohnak um lo i. 19Moses in thukham ning pe lo im? Ikhalselai aisu in khai a thukham hlun lo i si. Zaimanin i rek tum i si?” ti in sawn i. 20Cia mite in, “Khuavang nai i si. Aisu in na rek tum i?” ti in sawn i. 21Zisu in amahte hnenah, “Kaimah in na pakhat per ai ngaihsun ning ur i. 22Moses in vunpar cemhnak thukham ning pe i; (cia heh Moses ai i lo ai pupaate ai pehnak i) cia sabbath nia ah vunpar cem i si. 23Moses thukham hnawm lohnak tuhin sabbath nia ah vunpar cem leisikhaw, sabbath nia ah mi cakruai manin i lakah ning raw im? 24Ning mit ai hmuhnak bangin thutan lo in a dikcang niu in thutan tuu-ih.” ti in sawn i. 25Ciafangin Juersalem ai mi hrekkhatte in, “He pa heh amahte ai rek tuh ai sii hnak pa i lo im? 26Ikhalselai amah in raalpha ngai in pong ai amahte in a amah khiah zaikhai sawn lo i. Mi-uk tute in he pa heh Khrih ngaingai i ti ling i nim? 27Ikhalselai he pa khiah konin i ti ling i sing. Ikhalselai Khrih hleng fangin aisu in khai a konin hleng i ti ling tuh lo i.” ti in ti i. 28Ciafangin Zisu in temple songah thu a cuk teng fangin, “Ningte in i ling i si. Cen konin hleng ing ti khai ling i si. Kaimah thu in hleng lo ing. Ikhalselai i hlat tu pa khiah a hman i. Ningte in amah khiah ling lo i si. 29Ikhalselai amah khiah ling ing. Ziangmanti fangin kaimah khiah amah hnenin hleng ai amah ai i hlathnak i.” ti in au i. 30Ciafangin amahte in pom tum napui ai aisu in khai amah pom ngam lo i. Ziangmanti fangin amah cuu khim lai lo i. 31Mi tamngai in amah sang ai, “Khrih hleng fangin he pa hnakin tam in ngaihsunurkul naper ni tur im?” ti in ti i. 32Farasite in mite in amah manin eldun tlaang hnelhno i ti za ai Farasite le tlangbawite in Zisu pom tuh in raalbawite hlat i. 33Ciafangin Zisu in amahte hnenah, “Ning hnen ah camkhat niu um rih tuh ing. Ciaben fangin i hlat tu pa hnenah feh tuh ing. 34Ningte in i sii tuh ai i tawk tuh lo i si. Cen i umhmun ah khai kawi thill tuh lo i si.” ti in rel i. 35Ciafangin Judah mite in amahte tlaangtlaang khiah, “Kin ai tawk thill thai lo in a konah kawi tum i ni? Zental minung lakai a piak ai umtu Judah minungte hnenah fehin Zental mite thucuk tum i ni im? 36 ‘Ningte in i sii tuh ai i tawk tuh lo i si. Cen i umhmun ah khai kawi thill tuh lo i si.’ ti ai a relhnak tu zai ti ca i pa?” ti in ti i. 37Ni hnuataber puaipui nia ah Zisu khai ding ai, “Tihaal tute in i hnenah kawi tu selai, ding tu seh. 38I sang tute in Lai Cianghlim songai relhnak bangin, a pum songin nunghnak ti khiah runpui bangin luang tuh i.” ti in au i. 39(Ikhalselai he khiah a sangtute in ngah tuhhnak Ciang Rauhla thurel i. Ziangmanti fang in, Zisu khiah thangphat lailo manin, Ciang Rauhla khiah pe lai lo i.) 40Mi tamngai in he a relhnak thu za fangin, “Thungai in he pa khiah Prawfet i.” ti in ti i. 41A dangte in, “He pa khiah Khrih i.” ti in ti i. Ikhalselai a hrekkhatte in, “Khrih khiah Galilee in hleng tuh im? 42Lai Cianghlim in, ‘Khrih khiah David umhmun Bethlehem khua songin le David phun song in hleng tuh i.’ ti in rel i lo im?” ti in ti i. 43Ciamanin amah manin mi zapui khiah eldun i. 44A hrekkhatte in amah khiah pom tuh zo napui ai aisu in khai pom ngam lo i. 45Ciafangin raalbawi te khai phungki upate le Farasite hnenah kawi ai, amahte in, “Zaimanin amah kawih lo i si?” ti in zawt i. 46Raalbawite in, “Aisu in khai he pa bangin thurel awng lo i.” ti in sawn i. 47Ciafangin Farasite in amahte khiah, “Ning tang ning zawl ve im? 48Mi-uk tute le Farasite pakhat bangin tang amah sang awm? 49Ikhalselai upadi dan ling lo tu he mite khiah cukcamhnak tuar tu seh.” ti in ti i. 50Nikhawdemus (zanlai in Zisu hnenah kawi tu pa i ai amahte minung i ve i) in amahte hnenah, 51“Kin upadi dan ah mi pakhat khiah amah relhnak thu kin za hlanah le a perhnak kin ling hlan ah a thutan thill im?” ti in ti i. 52Amahte in amah hnenah, “Nang tang Galilee mite i aw sim? Si tulai sik tu. Galilee songin prawfet pakhat bang khai suak awng lo i.” ti in ti i. 53Ciafangin anite khai amah te inn ten ah tlung i.