Zisu in thawng nga zolo rongdo i
(Matt. 14:13-21; Mark 6:30-44; Luke 9:10-17)
1Hete ben fangin Zisu khai Galilee tipui khatlam Tiberias tipui hmun lamah feh i. 2Ciafangin miburpui in amah hlun i. Ziangmanti fangin Zisu in a urte vumah bawnhnak ngaihsunurkul khiah hmu i. 3Zisu khai mual vumah feh ai, ciata ah a hnuahlunte thawn to i. 4Judahte puai passover khelhnak puai nong i hang. 5Zisu khai khuahlir ai mi tampui a hnen ah kawi hmu fangin, Filip hnenah, “Hete ei tuhin a konah rong lai nga sing?” ti in zawt i. 6Cia khiah Filip cu kong ai ponghnak i. Ziangmanti fangin Zisu in zai bawn tuh ti ling zo liang i. 7Filip in amah hnenah, “Tangka zanih man rong in hete in a tlawmniu ten ei rinin tham tuh lo i.” ti in sawn i. 8A hnuahlun pakhat Simon Peter nau Andrew in Zisu hnen ah, 9“Heta ah naupang pakhat um ai sangper panga le ngasa panih nai bang. Inapui mi he zah lakah zaitlak i?” ti in ti i. 10Zisu in, “Mite to ruai tuu-ih.”ti in ti i. Ciata ah hampa tam ngai um i. Ciamanin mite thawng nga tluk i. 11Zisu in sangper khiah lang ai sawngen ben fangin, a hnuahlunte hnenah zem ai, a hnua hlunte in a tote hnenah zem ai ngasa khai a duh zah in zem i. 12Amahte khiah rongkham liang fangin Zisu in a hnuahlunte hnenah, “Rongval pai lohnak tuhin rongval khiah khawm tu sio ih.” ti in rel i. 13Ciamanin anite in rongval khawm ai mite eihval sangper le ngasa songin bawm hlainih khawm i. 14Cia mite in Zisu bawnhnak ngaihsunurkul khiah hmu fangin, “Thungai in he pa heh laivumah a hleng tuhhnak Prawfet i.” ti in ti i. 15Amahte in Zisu khiah a khengkhebel in Kumpibawi cang ruai tuh khiah Zisu in hmu fangin, ani khai amah lekin mualvum ah feh leh thio i.
Tivumah Zisu vak i
(Matt. 14:22-27; Mark 6:45-52)
16Zanlam khuathim fangin a hnuahlunte khai tipui hmun ah zu teu i. 17Anite khai khawm songah lut ai Kapernaum lamah tipui vumin feh i. Khuathim zo napui ai Zisu tu amahte hnenah kawi lai lo i. 18Khuahu pui tlung manin tilawi tlung le 19Ciamanin anite khai khawm khiah peng thum le peng li tha cawk fangin Zisu khiah ti vumin vak ai khawm nong ah kawi hmu fangin anite khai lau i. 20Ciafangin Zisu in, “Kaimah ing. Lau mah ih.” ti in ti i. 21Ciafangin anite in Zisu khiah ang ngai in khawm songah caang tlang i. Ciafangin khawm khai amahte feh nuam hmun varkam ah hleng i. 22A thangha fangin tipui ralkhat lamai dingtu miburpui in, ciata ah khawm pakhat lek um ai Zisu khiah a hnuahlunte thawn feh lo ai a hnuahlunte khiah amahte lek in feh hih i. 23Ikhalselai Bawi Zisu in sawngen ben fangin amahte in rongei hmun thawn nong hmun Tiberias lamin khawm dang hleng i. 24Mite in Zisu le a hnuahlunte ciata ah um lo i ti hmu fangin anite khai khawm thawn Zisu sii tuhin Kapernaum ah feh i. 25Amahte in Zisu khiah tipui ralkhat lamah tawk fangin, amah hnenah, “Rabbi, zaikom in heta ah hleng i si?” ti in zawt i. 26Zisu in amahte hnenah, “Thungai, thungai in ning rel ing. Ngaihsunurkul i bawnhnak ning hmu manin i lo ai sangreu ei ai ning kham manin i sii ngawn i si. 27A rall thai rong ca in naper hnelhno mah ih. Ikhalselai mi Fapa ai ning pe tuhhnak kumzangza tian in taang thai rong ca in naper tuu-ih. Amah vum ah a Pa Pathian in a lungkhim i ti in tacik khet zo i.” ti in rel i. 28Ciafangin amahte in a hnenah, “Pathian naper kin per thillhnak tuhin zai per nga ing?” ti in zawt i. 29Zisu in amahte hnenah, “He khiah Pathian naper i: A hlathnak pa khiah sang tuu-ih.” ti in sawn i. 30Ciamanin amahte in amah hnenah, “Ilekhaw kin hmu fangin na sang thil thai tuhin zai hnikhnaihhnak kin hmuh nga si? Zai per i si? 31Kin paate in hampalakah, ‘Amahte ei tuh in Pathian in vancung in rong pe i.’ ti ai nganhnak bang in manna ei i.” ti in ti i. 32Ciafangin Zisu in amahte hnenah, “Thungai, thungai in ning rel ing, Vancung in Moses in rong ning pe lo i. Ikhalselai i Pa in vancung in rong ngai ngai ning pe i. 33Ziangmanti fangin Pathian rong khiah, vancung in tolh ai laivum mite hnenah nunhnak pe tu pa i.” ti in ti i. 34Ciafangin anite in Zisu hnenah, “Bawipa, cia rong tun ai panin kin pe tu.” ti in ti i. 35Ciafangin Zisu in amahte hnenah, “Kaimah khiah nunhnak rong ing. I hnenah kawi tute in rikam tuh nawn lo i hang. Cen i sang tute khai tihaal tun nawn lo i hang. 36Ikhalselai ning rel ing, Ningte in i hmu napui ai i sang lo i si. 37I Pa ai i pehnak hmuah in i hmun ah kawi tuh i. Cen i hnenah kawi tute khiah kontih bangin khai hnawt tuh lo ing. 38Ziangmanti fangin vancung in i nuamhnak bawn tuhin tolh lo ai i hlat tu pa nuamhnak bawn tuh in tolh ing. 39Cen he khiah i hlat tu i Pa daihhnak i: Amah ai i pehnak hmuah pai ruai tuh lo ai ni hnuataber nia fangin amahte khiah tho ruai tuh ing. 40Cen he khiah i hlat tu pa daihhnak i: A Fapa hmu ai a sang tu hmuah kumzangza nunhnak ngah tuh ai ni hnuataber nia ah amahte khiah tho ruai tuh ing.” ti in rel i. 41Ciafangin Zisu in, “Kaimah khiah vancung in hlenghnak rong ing.” ti manin Judah mite in amah lakah caam tlang i. 42Amahte in, “He pa khiah Joseph fapa Zisu i lo im? cen a nuu le a paa tang ling i lo sing im? Ilekhaw a kontih ai vancung in hleng ing ti i pa?” ti in ti i. 43Zisu in amahte hnenah, “Ningmah tlaangtlaang cam hnelhno mah ih. 44Aisu khai i hlat tu Pa in duk hlah lekhaw i hnenah kawi thill lo i. Cia pa khiah ni hnuataber fangin tho ruai tuh ing. 45‘Amahte khiah Pathian in cuk tuh i.’ ti in prawfette in ngan zo i. Ciamanin aisu khai za ai i Pa hnenin zir tu hmuah in i hnenah kawi tuh i. 46Aisu in khai i Pa khiah hmu awng lo i. Pathian hnenai hleng tu pa, cia pa lek in i Pa khiah hmu zo i. 47Thungai, thungai, in ning rel ing, I sang tu hmuah in kumzangza nunhnak ngah tuh i. 48Kaimah khiah nunhnak rong ing. 49Ning paate in hampalakah manna ei ai thi berh i. 50He khiah vancung ai hlenghnak rong i ai a ei tute in thi tuh lo i hang. 51Kaimah khiah vancung in hlenghnak a nung rong ing. He rong ei tu pa in kumzangza nung tuh i. Cen i pe tuhhnak rong khiah i tiksa i ai laivum nunhnak ca ai i pe tuhhnak i.” ti in rel i. 52Ciamanin Judah mite in amahte tlaangtlaang khiah, “A kontih in he pa in a tiksa ei tuhin kin pe thill tuh i?” ti in eldun tlang i. 53Ciafangin Zisu in amahte hnenah, “Thungai, thungai in ning rel ing, Mi Fapa sa le mi Fapa thi khiah ei le ding hlahleisikhaw ning songah nunhnak nai lo i si. 54I sa ei tu le i thi ding tu in kumzangza nunhnak nai tuh ai ni hnuataber fangin amah khiah tho ruai tuh ing. 55Ziangmanti fangin i sa khiah rong ngaingai i ai, i thi khiah ding tuhhnak ti ngaingai i. 56I sa ei tu le i thi ding tu khiah i songah um tuh ai kaimah khiah amah songah um tuh ing. 57A nung mi i Pa in i hlat ai i Pa manin i nung bang in, i sa ei tu pa in khai kaimah manin nung tuh ve i. 58He khiah vancung ai hleng hnak rong i. Cia rong khiah ning paate in hampalak ah manna ei ai thi berh bang in i lo ai he rong ei tute in kumzangza nung tuh i.” ti in rel i. 59He thu te khiah Zisu in Kapernaum ah thucuk teng fangin sanginn songah a relhnak thute i. 60Ciamanin a hnuahlunte tamngai in he thu za fangin, “He khiah thu har ngai i, aisu in ngai ben tuh i?” ti in ti i. 61Zisu in a hnuahlunte in caam lianglo i, ti ling fangin amahte hnenah, “He manin thin ning raw im? 62Ciailekhaw mi Fapa khiah a umhmun awng vancung ah kaai hmu i silai, kontih bang in um tur i si? 63Nunhnak pe tu khiah Ciang Rauhla i. Taksa pum in zaikhai hnempui lo i. Ning hnenai i ponghnak khiah rauhla nunhnak i. 64Ikhalselai ningte a hrekkhat in sang lo i si.” ti in ti i. Ziangmanti fangin Zisu in a ngom ai panin aisu te in sang tuh lo ai aisu in amah khiah zuar tuh i ti ling zo i. 65Ciafangin amah in, “Ciamanin i Pa in a pe lohnak te in i hnenah kawi thill lo i, ti in ning rel cia ing.” ti in ti i. 66Ciata ai panin a hnuahlun tampui khiah let berh ai amah khiah hlun awl sek i hang. 67Ciafangin Zisu in hlainihte hnenah, “Ning tang tlan berh nga i sim?” ti in zawt i. 68Ciafangin Simon Peter in, “Bawipa, aisu hnenah kawi tuh i ing? Nangmah in kumzangza nunhnak thu nai i si. 69Cen nangmah khiah a nungmi Pathian Fapa Khrih i si ti khiah sang rori i ing.”ti in ti i. 70Zisu in, “Hlainih ning ril i ta lo ing? cia ningte lakai pakhat tu manah i si.”ti in ti i. 71Cia khiah Simon fapa Judas Iskaariat thu rel i. Ziangmanti fangin amah khiah hlainih lakai mi i ai a zuar tu tuh pa i.