Revelation 21

<< REVELATION 21  >>

21Ciafangin vancung a thar le laipua a than hmu ing. Ziangmanti fangin a hmasa ai vancung le laipua khiah pai zo ai tipui khai um nawn lo i hang. ²Ciafangin a cianghlim Jerusalem a thar khuapui khiah Pathian hnenin vancung in monu in a pa ca in par ai remcia in um bangin tolh hmu ing. ³Ciafangin kumpibawi tauhkheng vumin aw cawin ngai pakhat in, “Pathian khiah minungte lakah um i hang. Amah khiah amahte thawn umkhat tuh i hang. Amahte khiah a minung cang tuhai Pathian amah rori khiah amahte thawn um tuh i. ⁴Amah in amahte mit ai mithli hmuahhmuah nul sah tuh ai thih hnak khai um tuh nawn lo i hang. Cen lungsiahnak le kaphnak le urhnak khai uni tuh nawn lo i hang. Ziangmanti fangin a hlan ai thil hmuah hmuah khiah pai zo berh i hang.” ti in rel khiah za ing. ⁵Ciafangin kumpibawi tauhkheng vumai torn pa in, “Zai hmuahhmuah khiah a thar in bawn liang i hang.” ti in rel i. Cen, “He thu khiah ngan tu. Ziangmanti fangin he thute khiah a sang tlak‘ le a hman i.” ti in khai rel i. ⁶Ciafangin amah in i hnenah, “Ben zo i hang. Kaimah khiah a hampan le a hnuakhum Alpha le Omeka ing. Tihaal tu pa hnenah cirhti hmunai nunhnak ti khiah a man um lo in pe tuh ing. ⁷Raal a nehtu in he ro co tuh i. Kaimah khiah a Pathian cang tuhai amah khiah i fapa cang tuh i. ⁸Ikhalselai raalhut le sanghnak nai lo le a riimte le mi rektute le tlangvalfenu sualhnak bawntute le milim biatute le dawi naitute le thudon reltu hmuahhmuah khiah a velnih thihhnak mai le katmai thawn kanghnak maipui co tuh i.” ti in i rel i.

⁹Ciafangin a hnuataber pul pasarih thawn dim bel pasarih naitu vancung mi pasarih songai vancung mi pakhat khiah hleng ai i hnenah, “Kawi tulai Tufa niu Monu na hmuh ngang.” ti in i rel i. ¹⁰Ciafangin amah in kaimah khiah Ciang Rauhla songin mualtlang lian ngai le saang ngai vumah i thiar ai Pathian hmunin vancung in tolh hnak Jerusalem khua thar khua cianghlim i hmuh i. ¹¹Cia khuapui khiah Pathian thangphathnak thawn var ai a mankhung ngai lungvar jasper bangin tleu ai hlalang bangin ciang i. ¹²Cia khuapui khiah a Han ngai le a saang ngai sen thawn ren ai kawl dawngkham hlainih nai i. Cia dawngkham ah vancung mi hlainih um ai dawngkham vumah Israel phun hlainihte hming khai ngan i. ¹³Nisuak hmunlam ah dawngkham pathum um i. Saklamah dawngkham pathum, hlanglam ah dawngkham pathum, nitla hmunlamah dawngkham pathum um i. ⁴Cia khuapui sen khiah a ham hlainih vumah sahnak i ai cia a ham vumah Tufa niu apawstal hnuahlun hlainihte hming um i. ¹⁵Cen i hnenah pongtu pa in cia khuapui le a kawl dawngkham le a sen renhnak teh tuhin sui tokrolh picu nai i. ¹⁶Cia khuapui kh’iah ningli ai sa i le a saulam le a kaulam khiah camvek i. Amah in cia khuapui khiah a tokrolh thawn teh ai peng thawngkhat le peng zanga i. A saulam le a kaulam le a sanglam khai camvek ten i. ⁷Amah in a sen renhnak khai teh ai minung teh danin dong zanih i ai cia khiah vancung mi teh dan ai tehhnak i. ¹⁸Cia sen khiah a mankhung lungvar jasper thawn sahnak i ai cia khuapui khiah sui a cit thawn sahnak i. Cia sui khiah hlalang bangin ciang i. ¹⁹Cia khuapui senren hnak a ham khiah a mankhung lungvar phun cang thawn sahnak i. A hmasaber khiah jasper i. A panihhnak khiah safai-a i. A pathumhnak khiah akate i. A palihnak khiah emeral i. ²⁰A pangahnak khiah onix i. A parukhnak khiah karnelian i. A pasarihhnak khiah chrisolite i. A pariathnak khiah beril i. A pakuahnak khiah topaz i. Sawmkhathnak khiah chrysoprase i. Hlaikhat hnak khiah jacinth i. Hlainihhnak khiah amethist lungvar i. ²¹Kawl dawngkham hlainihte khiah pale hlainih thawn sahnak i. Dawngkham a khim in pale pakhat ten thawn sahnak i. Cen cia khua songai lampui khiah sui cit thawn bawn ai cia sui khiah hlalang bangin ciang i. ²²Cia khuapui songah temple hmu lo ing. Ziang­manti fangin Huthawm thawn dimtu Bawipa Pathian le Tufa niu khiah a temple i hang. ²³Cen cia khuapui khiah a vumin ni le hla in var kul lo i. Ziangmanti fangin Pathian thangphathnak in khuavar pe ai. Tufa niu khiah amahte mai-inn ca i. ²⁴Cia khuavar thawn mi phun hmuahhmnah lamvak tuh i. Cen laivum ai kumpibawite in amahte thangphathnak khiah cia khuapui songah kawih tuh i. Kawl dawngkhamte khiah sunin kham tuh kel lo i hang. Cen data ah zan khai um lo i hang. ²⁶Cia khuapui songah amahte in mi phun hmuahhmuah ai thangphathnak le upat hnak kawih tuh i. ²⁷Ikhalselai a cianglo le ningdulkul ai nungtu te le thudon rel tute in cia khuapui songah lut tubh lo ai Tufa niu nunhnak ca-uk songai a hming ngansate ian in lut tuh i.

<< REVELATION 21  >>