4Ciamanin a comhmun ah luthnak thukham khiah um hlen lai manin railing nga sing! Cialofangin ningte pakhat khat khiah cia songah lut tlak lo in thu ning khan mawh ngai. 2Ziangmanti fangin kawspal thupha khiah amahte hnenah tazahaw awng bangin kinte hnen ah khai taza kin haw zo i hang. Ikhalselai amahte zahnak kawspal thupha in amahte khiah hnempui ruai lo i. Ziangmanti fangin cia kawspal thupha khiah a zatute songah sanghnak thawn komdun lo i. 3Ziangmanti fangin Pathian in a naperhnak khiah laivum po hlanah ben zo napui ai,
“I thinraw kongin, ‘amahte in i comhmunah lut tuh hrimhrim lo i.’ ti in thukham ing,” ti in rel zo bangin kin a sangtute in khai comhmun songah lut i sing.
4Ziangman tifangin Pathian in hmunkhat ah ni sarih nia khiah hetih bangin rel i: “dale Pathian khai ni sarih nia fangin a naperhnak hmuah hmuah lakin com i.” 5Cen he hmunah Pathian in, “Amahte in i com hmun ah lut tuh hrimhrim lo i.” ti in rel leh thio i. 6Ciamanin cia comhmun songah mi hrekkhatte khiah lut tuh i. Cen kawspal thupha za awngtute lut ngah lo i. Ziangmanti fangin amahte in thungai nuam lo i. 7Ciamanin Pathian in “Tunnia” ti in ni khat khiah dah leh thio ai a lehhnua lam a rai ngai fangin David songin, “Tunnia ah amah aw ning za fangin, ning thinlung khiah ruh mah ih.” ti in rel awng zo bangin rel leh thio i. 8Ziangmanti fangin amahte khiah Joshua in comhmun lo pe zo i selai, a lehhnua lam fangin Pathian in ni dang khiah rel leh tuh napui lo i. 9Ciamanin Pathian minungte ca ah Sabbath col um nia um hlen i lai. 10Ziangmanti fangin Pathian in a naper hmunin com bangin, Pathian comhmun ah lut tupa khai a naper hmuma com ve i.
11Ciamanin amahte in thu ngai lo manin rail bang in anite cuung lo in cia comhmun songah lut tuh in zuam nga sing. 12Ziangmanti fangin Pathian thu khiah a nung le power thawn dim i. Haa panih nai vangsau tahin san sawn i. Rauhla le taksa pumpui khiah khan ai hlehpet in dawt ben i. Ruhliklak le ruhling khai khan ben i. Cen mite thinlung songai ruathnak hmuahhmuah le tuumhnak hmuahhmuah khai ling sah sio i. 13Amah hmai ah aisu khai thup thill lo i. Ikhalselai kin thucit tu pa hmai ah zaizongza khiah khuk thill lo ai a veksen in lar liang i.
14Ciamanin Phungki upa ber Pathian Fapa Zisu khiah vancung ah kaai zo i. Ciatih in vancung ah Zisu kin. nai manin kin sanghnak khiah a kho ngai in sang nga sing. 15Ziangmanti fangin kin phungki upa Zisu khiah kin urhnak vumah ninghio thai lo phungki i lo i. Ikhalselai zaizongza ah kinmah bangin sualsohnak tuar ve napui ai sual lo tu phungki nai i sing. 16Ciamanin ninghiohnak ngah tuhin le kin kul fangin ngaih- harhnak kin tawk thill thai in Pathian ngaihharhnak umhmun Pathian tauhkheng hnenah a ngam ngai in kawi nga sing.