1Aaron fate panih in Bawipa hnenah Bawipa ai ruai lohnak mei hlu manin thi tuar hnua ah Bawipa in Moses pon ai, 2“Na u Aaron khiah khaandanhnak pon song ai a Cianghlim Hmun ah a nuam cang in lut tuh lo in rel tu, cialo fangin thi mawh ngai. Ziangmanti fangin ngaihharhnak tohkheng vumah mairo songin daak tuh ing. 3Hetih bangin Aaron in a Cianghlim Hmun ah lut tuh i: sualhnak ca ai hluhnak kawlpaw cang niu thi le mei ai tai ai hluhnak tuu cang thi thawn lut tu seh. 4Amah in a cianghlim angki sau khiah sil in bawngbi khiah feng tu seh. Cen a el ah ponniu pen tu selai a lupawng khiah vel tu seh. Hete khiah a cianghlim thilthuam i. Ciamanin amah in ti thawn takhlu tu selai sil tu seh. 5Cen Israel mite hnenah me faniu panih khiah a khatta sualhnak ca ai hlu tuh in le a khatta khiah mei ei tai in hlu tuhin lang tu seh.
6Aaron in kawlpaw cang khiah amah sualhnak ca in hlu tu selai amah le a innsang ca in sualhnak khukhnak tuhin bawn tu seh. 7Cia me panih khiah lang in tawkdunhmun tabernacle hmai ah Bawipa hnenah pe tu seh. 8Ciafangin Aaron in cia me panih te vumah mee hlah tu seh. Me pakhat khiah Bawipa ca tuh i. Cen a khatta khiah mawhhlukhnak me tuhin mee hlah tu seh. 9Ciafangin Bawipa ca ai mee hlah hnak me khiah Aaron in lang tu selai sualhnak ca in hlu tu seh. 10Ikhalselai mawh hlukhnak tuhai mee hlah hnak me khiah a nung in Bawipa hnenah kawih tu selai sualhnak khuk tu tuh in hampalak ah mawhhluk hnak me cang tuhin hlat tu seh.
11Ciafangin Aaron in sualhnak ca ai hlu tuhin kawlpaw cang khiah kawih tu selai amah ca le a innkua ca sualhnak khukhnak tuhin cia kawlpaw cang khiah ro tu seh. 12Ciaben fangin Bawipa hmai ai awlta vumai mei songai meihol ko khiah bel dimin lang tu selai a nawi niu ai huathnak rimhmui khiah a kut dimin lang in khaandanhnak pon songah tlum tu seh. 13Amah khiah thi lohnak tuhin cia rimhmui khiah Bawipa hmai ah mei in tai tu selai cia rimhmui khu in tettikhan hnak vumai ngaihharhnak tohkheng khiah khuk tu seh. 14Cen cia kawlpaw cang thi khiah lang tu selai kutzung thawn ngaihharhnak tohkheng ziatlam khiah phiah tu seh. Cen a kutzung thawn cia ngaihharhnak tohkheng hmai ah thi thawn vel sarih phiah tu seh.
15Ciafangin mirunpui ca tuhin sualhnak ca ai me khiah ro tu selai a thi khiah khaandanhnak pon songah kawih in cia thi khiah kawlpaw cang thi bangin ngaihharhnak tohkheng vumah le a hmai ah phiah tu seh. 16Israel mite ciang lohnak manin le amahte khelhhnak le sualhnak manin ciatihin Aaron in A Cianghlimber Hmun ca in sual khukhnak bawn tuh i. Cen ciatih bangin amahte ciang lo hmunai dahhnak tawkdunhmun tabernacle ca in bawn tuh i. 17Cen Aaron in amah ca le a innkua le Israel mite ca in sual khukhnak bawn tuhin A Cianghlimber Hmun ah lut fangin a suak leh hlan lo aisu in khai tawkdunhmun tabernacle songah um tuh lo i. 18Ciafangin Aaron in Bawipa hmai ai awlta hmai ah suak tu selai sual khukhnak khiah bawn tu seh. Kawlpaw thi le me thi khiah lang tu selai awlta hiang cingkim ai kite vumah nawih tu seh. 19Cen a thi hrekkhat khiah a kutzung thawn awlta khiah vel sarih phiah tu selai Israel mite a ciang lohnak hmunin ciang ruai in cianghlim ruai tu seh.
20Cen a Cianghlimber Hmun le tawkdunhmun tabernacle le awlta te ca in sual khukhnak bawn ben fangin, Aaron in a nung me khiah kawih tu selai, 21cia me lu vumah a kut zau in Israel mite sualhnak le khelhhnak le mawhhnak hmuahhmuah phorh in me lu vumah haih tu selai cia me khiah mi pakhat kut in hampalak ah hlat tu seh. 22Cia me in amahte sual hmuahhmuah khiah hampalakah phur tuhin cia me khiah cia pa in hampalakah hlat tu seh.
23Ciafangin Aaron khai tawkdunhmun tabernacle songah lut tuhai a Cianghlimber Hmun songah a lut fangin a silhnak thilthuam khiah hawk tu selai ciata tabernacle songah hlum tu seh. 24Cen a cianghlim hmun pakhat ah a ruang khiah ti thawn som ben fangin a thuam khiah sil tu selai tabenacle songin suak in amah ca le mi zapui ca ai mei thawn taihnak a hlu khiah hlu tu selai amah sualhnak le mizapuite sualhnak khiah khuk tu seh. 25Sualhnak ca ai hluhnak a thau khiah awlta vumah mei thawn tai tu seh. 26Cen hampalakah me hlattu pa in a thilthuam khiah sawp tu selai ti thawn a ruang khiah takhlu tu selai ciaben fangin camp songah lut tu seh. 27Cen a Cianghlimber Hmun songah sual hnak khukhnak tuhai hmanghnak a thite khiah, sual hnak ca ai hluhnak kawlpaw cang le me pum khiah camp pua ah phur tu seh. Cen mei thawnin a vun le a sa le a sapak khiah tai tu seh. 28Ciaben fangin ciate mei ai tai tu pa in a thilthuam khiah sawp tu selai ti thawn a ruang khiah takhlu tu selai ciaben fangin camp songah lut thai i.
29He khiah ning ca ah kumzangza thukham i: Hla sarih hla ni 10 nia ah ning sual sir in ning mi phunpui i tu seh, ning lakai ramdang mi i tu seh na per tuh bul lo i si. 30Ziangmanti fangin cia nia ah Bawipa hmai ah ning sual hmuahhmuah songin ning ciang thil thai in phungki pa in ning ciang ruai tuhin ning sualhnak ning khuk sah tuh i. 31Cia khiah ning ca ah a thupui com tuh nia sabbath i ai ning sualhnak sir tuh i si. Kumzangza ning ca ah thukham i. 32Cen a paa ca ai phungki per tuh ai rilhnak le haihhnak phungki pa in sualhnak khukhnak bawn tuh i. Amah in a cianghlim thuam khiah sil tuhai, 33a Cianghlimber Hmun ca le tawkdunhmun tabernacle ca le awlta ca le phungkite ca le mizapui ca in sual khukhnak bawn tuh i. 34Kum khat ah vel khat Israel mite ca in amahte sualhnak khukhnak bawn tuh khiah ning ca ah kumzangza thukham i.” ti in rel i. Ciafangin amah in Bawipa ai Moses ruai bangin bawn i.