Leviticus 15

<<  LEVITICUS 15  >>

1Ciafangin Bawipa in Moses le Aaron hnenah, 2“Israel mite hnenah hetih in rel tu: ‘Mi pakhat in a songin hmaihma hnai suak lekhaw a suakhnak cia hnai khiah ciang lo i. 3A hnai suakhnak thawn senghnak thu ah hetih bang i: A hmaihma hnai suak i tu seh, suak lo in kham i tu seh, amah khiah a ciang lo i. 4A hmaihma hnai naitu pa taal hmun ithmun i tu seh a tohmun caang khiah a ciang lo cang tuh i. 5A ithmun khing tu hmuahin amahte pon khiah sawp tu selai ti thawn takhlu tu selai zanlam tian  ciang lo in um tuh i. 6Cen hmaihma hnai suak naitu pa tohmun ah to tu pa in a pon khiah sawp tu selai ti thawn takhlu tu selai zanlam tian ciang lo in um tuh i. 7A hmaihma hnai suak naitu pa khing tu pa in a pon khiah sawp tu selai ti thawn takhlu tu selai zanlam tian ciang lo in um tuh i. 8Cen a hmaihma hnai suak naitu pa in a ciang pa cilthuih lekhaw cia pa in a pon khiah sawp tu selai ti thawn takhlu tu selai zanlam tian ciang lo in um tuh i. 9A hmaihma hnai suak naitu pa tohmun siphuh kung khiah a ciang lo i. 10Cia pa hnia ah zai thil khai i tu seh a khing tu pa khiah zanlam tian ciang lo in um tuh i. Ciabang thil phurtu pa in a pon sawp tu selai ti thawn takhlu tu selai zanlam tian a ciang lo in um tuh i. 11Ti thawn a kut som lo ai a hmaihma hnai  suak naitu pa ai khinghnak pa in a pon khiah sawp tuhai ti thawn takhlu tuh le zanlam tian a ciang lo in um tuh i. 12A hmaihma hnai suak naitu pa ai khinghnak bel khiah khoi ruai tuh ai thing hlengte khiah ti thawn som tuh i.

13Cen a hmaihma hnai suak naitu pa in a hmaihma hnai suak khiah lawm fangin ni sarih tian siar tu selai ciafangin amah cianghnak tuhin a pon khiah sawp tu selai a ruang khiah ti fim thawn takhlu tu sehlai amah khiah ciang tuh i. 14Ni riat nia fangin khuro panih i hlahle laileng niu panih thawnin tawkdunhmun tabernacle dawngkham ah Bawipa  hnenah kawih tu selai phungki hnenah pe tu seh.     15Ciafangin cia pa in pakhat khiah sualhnak ca in hlu tuhai a khatta khiah mei thawn tai in hlu tuh i. Ciatih bangin phungki pa in cia pa hmaihma hnai suakhnak manin Bawipa hmai ah a sualhnak khuk sah tuh i.

16Mi pakhat in a phuti suak ruai lekhaw a ruang pumpalah in ti thawn takhlu tu selai zanlam tian ciang lo in um tuh i. 17Cen cia phuti khiah pon ah le savun vumah bek lekhaw  ti thawn som tuhai zanlam tian a ciang lo in um tuh i. 18Nupang pakhat khiah pasal thawn itkhat in cia pa phuti suak lekhaw a panih in ti thawn takhlu tu selai zanlam tian a ciang lo in um tuh i.

19Nupang pakhat in a ruang in hmaihma hnai suak in cia ti khiah thi ilekhaw cia nuu khiah ni sarih song amah lek in um tu seh. A khing tu hmuah in zanlam tian a ciang lo in um tuh i. 20Ciatih ai a thi suak teng in a talhmun caang khiah ciang tuh lo i. Cen a tohmun caang khai ciang tuh lo i. 21Cen a ithmun khing tu pa in a pon khiah sawp tu selai ti thawn takhlu tu selai zanlam tian a ciang lo in um tuh i. 22Cen cia nuu tohmun khing tu pa in a pon khiah sawp tu selai ti thawn takhlu tu selai zanlam tian a ciang lo in um tuh i. 23Cen a ithmun i tu seh a tohmun i tu seh khing tu pa khiah zanlam tian a ciang lo in um tuh i. 24Pasal pakhat in cia nuu thawn itkhat in a thi khiah cia pa nawi lekhaw amah khiah ni sarih song a ciang lo in um tuh i. Cen cia pa ithmun caang khiah a ciang lo in um tuh i.

25Nupang pakhat in hla caang ai a thi nai siar lo ah thi nai lekhaw, ihlahle hla caang ai a thi naihnak khiah ni tam deuh rai lekhaw, a thi suak song hmuah in a thi nai kel bangin amah khiah a ciang lo in um tuh i. 26Cen a thi suak teng ai a ithmun caang khiah a thi nai teng ai bangin a ciang lo in um tuh i. Cen a tohmun caang khai a thi nai teng ai bangin a ciang lo in um tuh i. 27Ciate khing tu pa khiah a ciang lo in um tuh i. Amah in a pon khiah sawp tu selai ti thawn takhlu tu selai zanlam tian a ciang lo in um tuh i.

28Ikhalselai a thi suakhnak khiah lawm lekhaw ni sarih tian iang tu selai ciafangin amah khiah ciang tuh i. 29Ni riat nia fangin khuro panih i hlahle laileng niu panih khiah tawkdunhmun tabernacle dawngkham ah phungki pa hnenah kawih tu seh. Ciafangin phungki pa in pakhat khiah sualhnak ca in hlu tuhai a khatta khiah mei thawn tai in hlu tuh i. Ciatih in phungki pa in cia nuu in thi nai manin a ciang lohnak khiah Bawipa hmai ah khuk sah tuh i.

31Ciatih bangin Israel mite in a ciang lo khiah a tumce in dah tu seh. Cialo fangin amahte lakai i tabernacle khiah amahte a cianglo hnak in rim ruai tuh ai amahte khiah thi tuh i. 32He khiah a ruang ai hmaihma hnai suak nai tu le a phuti suak ruai manin amahte khiah a ciang lo in um tu te ca ai dan upadi i. 33Cen hla siar ai thi nai tu nupang le a ruang ai hmaihma hnai suakhnak naitu nupang pasal i tu seh cen a ciang lo nupang thawn it khat tu pa ca ai dan upadi i.”ti in rel i.

<<  LEVITICUS 15  >>