Lamentation 2

<<  LAMENTATION 2  >>

1  Zaitluk in BAWIPA in Zion fenu khiah
a thinrawhnak thawn mairo bangin khuk i.
Israel a mawihnak khiah vancung in laipua ah sep teu i.
A thinraw nia ah a kefot hmun khiah hih leh lo i.

2  Ninghio lo in BAWIPA in Zakuk songai
umtute khiah lem berh i.
A thinraw ze in Judah fenu raalkapte
inn khiah bal sah berh i.
A kumpibawi ukhnak le a bawite khiah
mi ai nautat tuhin laipua ah lon sah berh i.

3  A thinraw ngai in Israel ki khiah cem sah sek i.
Amahte raalte hmai in a kiahhan kut khiah ton leh lio i.
Amah in Zakuk khiah, a pumpalah in mai bang in kang ruai i.

4  Amah khiah amahte raal bang in ding ai,
A kahpuk khiah a er cia in dah i.
A kiahhan kut thawn, amahte raalte
bangin, a mit thawn hmuhhiam hnak
minungte khiah a veksen in rek i.
Zion fenu buk vumah a thinrawhnak khiah
mai bang in burh i.

5  BAWIPA khiah amahte raal bang i.
Amah in Israel mite khiah lem sek i.
Amah in Israel mite kumpibawi innte khiah
a vek in lem sek i.
Amah in raalkapte inn khiah hnawm sah sio i.
Judah fenu hnenah kaphnak le
lungsia hnak khiah zaai ruai i.

6  Amah tabernacle khiah vuandum bangin hnawmcan i.
Amah pumkhawm hmun khiah bal sio i.
BAWIPA in ul tuhai bawn zohnak puaite le
Sabbath te khiah Zion ah hai tuh sek in bawn i.
A thinraw khiah mai bang in kang manin
kumpibawipa le phungkipa khai zainam sah lo i.

7  BAWIPA in a awlta cabuai khiah zainam awl lio i.
A temple khiah zam lio i.
A kumpibawi inn te khiah a raalte kut ah ap lio i.
Amahte in BAWIPA inn songah,
Ul tuhai bawnhnak puai nia ai bangin
ruung lio in um i.

8  BAWIPA in Zion fenu seen khiah hnawmcan
tuhin tum cia zo i.
Amah in a rin riin zo i.
Hnawmcan awl tuhin a kut khiah ton leh lo i.
Ciamanin amah in khua renhnak seen le
khan khiah lungsia ruai i.
A panih in hmunkhat in hnawm sek i.

9  A kawldawngkhamte khai lai pua ah tlok berh i.
Amah in a kawldawngkham thirfungte
khiah ek ai hnawm sah sio i.
A kumpibawite le a bawite khai mi phun
dang kualak ah um i.
A Thukham khai um nawn lo i.
Cen a prawfet te in khai BAWIPA hnenin
thu ngah nawn lo i.

10 Zion fenu ai upate khai laipua ah pong lo in to i.
Amahte lu vum ah laivut vurh ai vaidip sil i.
Jerusalem fenute in a lu khiah laipua ah ut i.

11 Mithli thawn mit i vai i.
Thin hnai i hnok rauh i.
I minungte fenu hnawmcan manin le
Naupangte le nausente khiah khua lakai
lam lakah tha nai lo in tlu zel manin, lung i sia rauh i.

12 Khua songai lamlak ah maa nai ai
thikhum in tlu tu te bangin le amahte nuu
kaang songah amahte nunhnak khiah thi riaro kongin,
A nuute hnenah, amahte in,
“Rong le capittizu akonah i?” ti in zawt i.

13 Aw Jerusalem fenu,
Akontih in thin na nuam ruai thill ngang?
Zai thawn san na teh tuh ing?
Aw Zion fenu niu,
Thin na nuam ruai tuhin zai thawn san na teh tuh ing?
Ziangmanti fangin na hnawmhnak khiah
tipui zah in kau i.
Aisu in na lawm ruai thill tuh i?

14 Na prawfette in a hman lo le thu don thu na hmu sah i.
Raalte ai na pom sahhnak thawngtlate
khiah tlun thai leh tuhin
Amahte in na sualhnak khiah na phuang sah nuam lo i.
Ikhalselai amahte in thudon thu le
a hman lo thu lek na hmu sah i.

15 Na khel tute in na zauhsuamin papabeng i.
Amahte in Jerusalem fenu khiah
zauhsuam in amahte lu khiah leuh ai:
“He khua khiah ‘a mawi ber le
laivum pumpalah ai anghnak khua i.’ ti ai
ko hnak khua im?”ti in ti i.

16 Na raalte hmuah in na hau i.
Amahte in zauh na suam ai amahte kam khiah riat in,
“Amah khiah neh lio i hang sing.
He nia khiah kin iang hnelhnohnak nia i hang.
Tunin tawk lio ai hmu lio i hang sing.” ti in rel i.

17 BAWIPA in a tumhnak bangin bawn zo i.
Hlanlai ai a rel awnghnak a thu bangin khim ruai i.
Amah in hnawmcan ai ninghio lo i.
Amah in na raalte khiah na lakah ang ruai i.
Amah in na raalte tha khiah hat ruai i.

18 Amahte thin songin BAWIPA hnenah,
“Aw Jerusalem fenu renhnak seen,
Runti bangin mithli khiah sun le zan in luang tu seh.
Nangmah veve khiah bawm hnelhno mah.
Na mit khai com ruai mah.

19 Tho tulai, zanlai in kap in au tu.
Santari kil pan ngom in au tu.
BAWIPA hmai ah ti bang in na thinlung khiah bung tu.
Lamceh caang ai a bang in tlu tu na fate ca in
BAWIPA hnenah na kut khiah tung tu.” ti in kap i.

20 Aw BAWIPA, sik in ruat tu.
He khiah aisu hnenah bawn i si?
Nupuite in amahte song ai suakhnak,
amahte ai lenhnak amate fate khiah ei tuh im?
Phungki pa le prawfet pa khiah BAWIPA
temple songah rek tuh im?

21 Lamceh lakah mitar le naupang tilo in thi i.
I fenute le i tlangvalte khiah vangsau in rek i.
Na thinraw nia ah amahte khiah rek i si.
Nangmah in amahte khiah ro ai ninghio lo i si.

22 Puai nia ah rongsim tuhin i ko bangin,
Laukulhnak khiah i hiang cingkim ah ko i si.
BAWIPA thinraw nia ah a tlan ngah tu le a luat tu um lo i.
I kilkhawlhnak le i cawmhnak te khiah
I raalte in i hnawmsah berh i.”

<<  LAMENTATION 2  >>