Job 9

<<  JOB 9  >>

Ciafangin Job in,

2 “He khiah a hman peu i ti khiah ling ing.
Ikhalselai minung khiah a kontih in
Pathian hmai ah cianghlim thill tuh i?

3  Amah thawnin eldun nuam rinin,
thawngkhat song ah vel khat bang rin
sawn ben tuh lo i.

4  A fimhnak khiah thuk ze i.
A huthawm khiah lian ze i.
Amah khiah hlun lo in kang tu khiah
ur lo niu in suak ngah tu aisu um pa?

5  Amah in mualtlangte khiah thawnai
A thinraw in mualtlangte khiah bungbalet in
dah fangin mualtlangte in ling lo i.

6  Amah in laipua khai thing ai
a khuamte khai hlin ruai i.

7  Amah in ni khai rel ai ni khai tlang lo i.
Cen arsite varhnak khai kham sio i.

8  Amah lek in vante khiah pharh ai
tipui vumai tihual vumah vak i.

9  Amah khiah Vompui le Orion le
Plelades le hlanglam ai arsi te Bawntu i.

10 Amah in ngaihsun urkul te khiah bawn ai
aisu in khai ling ban lo i.
Cen a bawnhnak ngaihsun urkulte khiah siar zo lo i.

11 Amah in i khel fangin, amah khiah hmu thill lo ing.
Amah in i hiang in feh fangin,
a feh lam khiah ling sah lo ing.

12 Amah in duk lekhaw,
aisu in amah khiah kham thill i?
Aisu in amah hnenah,
‘Zai bawn i si?’tiin zawt thill i?

13 Pathian in a thinraw khiah sup lo i.
Rahab raalbawite rin a ke ah bok i.

14 Ciamanin akontih in ani thawn
eldun ngam tuh ing?
A kontihin amah thawn sawn dun tuhin
ponka tawk tuh ing?

15 Mawhhluk tuh nai lo napui ai,
amah khiah sawn thill lo ing.
I Thukhantu pa hnenah
ngaihharhnak lek ngen thill ing.

16 Amah khiah ko inglai amah in i awi selai,
amah in i thu i ngai sah um lo ing.

17 Amah in tihual khuahupui thawn i seu tuhai,
a thu um lo in i maa khiah tam ruai i.

18 Haihawh i sam fangin, amah in i com siang i.
Ikhalselai rimsuhnak thawn i dim ruai i.

19 Thaa lamah ti sing lai amah khiah cak ngai i.
Thu dikcang lam ah ti sing lai,
aisu in amah khiah ko tuh i?

20 Kaimah khiah mawhhluk tuh nai lo rin in,
i ponkaa in i cawh tuh i.
Mawh nai lo ing lai ciarinin
mawhzo i ti in sung i phiat tuh i.

21 Mawhhluk tuh nai napui lo ai,
kaimah veve khiah ling tau lo ing.
I nunhnak khiah hmuh i heh i.

22 A veksen in a bangten i.
Ciamanin, ‘Amah in mawhhluk tuh nailo te le
misualte khiah a bangvek in
hnawmcan i.’ ti in rel ing.

23 A cawhhnak in thihhnak hleng ruai vut fangin,
mawhluk tuh nai lote thin rimsuhnak khiah hnihsan i.

24 Laipua khiah mi sualte kut ah pe i.
Amah in thukhantute mit khiah hup sah i.
Amah i hlahlekhaw, aisu i tuh i?

25 I nunhnak khiah a dawptute hnak in rang sawn i.
Anghnak hmu lo pah in amahte khiah zuang sek i.

26 I nunhnak khiah a rang ngai ai fehtu
timbaw bangin khel liatlo i.
Mudokka in a rong khiah
a rang ngai in dawp bang in rang i.

27 Cen, ‘I camhnak khiah hai tek ngang.
I lungsiahnak hmel khiah thleng in
hni tuh ing.’ ti ing lai,

28 I tuarhnak hmuahhmuah manin i lau i.
Ziangmanti fangin, nangmah in kaimah khiah
mawh nai lo in i dah tuh lo i si.

29 Mawh zo i ti in sung i phiat zo manin,
ziangmanin a lovang in tuar tuh hnelhno ing?

30 Kaimah veve khiah vurti thawn takhlu in,
i kutte khiah sapia thawn som rinin,

31 nawng kua songah i phum tuh i si.
Ciafangin i thilthuam te rinin ning i dul tuh i.

32 Zung ah taza cuai dun in kai in amah khiah
sawn thai in amah khiah kaimah bang minung i lo i.

33 A kut khiah kin vumah dah in kin laklawh ah
kin thu kin tan sahtu tuh um lo i.

34 Ciafangin Amah in A tokrolh khiah i lang sah tuh selai,
a kih kul Amah khiah i lau ruai ma seh.

35 Ciafangin amah khiah kih lo in pong ngam tuh ing.
Ikhalselai tunin ciatih bang i lo i.

<<  JOB 9  >>