Job 39

<<  JOB 39  >>

1  Mual vumai me te fa nai cu tang ling aw sim?
Kiho in fa nai can tang rel thill aw sim?

2  Amahte in hla zai paai tang ling aw sim?
Cen zai camcu fangin te tang ling aw sim?

3  Amahte in kual ai a fate khiah te tang ling aw sim?

4  Cia a fate khiah a cak ngai in rongei in khang ai
amahte hlanlam nung ai amahte hnenah let leh lo i.

5  Aisu in hampalakai lak khiah luat ruai i?
Aisu in a ri hawk sah i?

6  Hampalak khiah amahte inn tuhin bawt ing.
Amahte umhmun tuhin ngaal kualak khiah dah sah ing.

7  Amah in khua songai aw te khiah zainam lo i.
A khawngtu pa hawkhnak aw khiah ngaai kul lo

8  Mualtlang tluan khiah a lenghmun i.
Amahin hnuh hing hmuahhmuah sii i.

9  Hampalakai kawlpaw cangin na naper sah tuh im?
Na kawlpaw inn ah zancaam nuam tuh im?

10 Hampalak kawlpawl cang khiah lovai tuhin
rihual thawn pen thill tuh i sim?
Lovai tuhin na hnua in na hlun tuh im?

11 Amah khiah thahat ngai manin rinsan tur sim?
Na naper khiah amah ap tur sim?

12 Amah in rong na khawm sahin fangcil hmunah
pum tuhin amah khiah sang tur sim?

13 Ostrich te in a ko khiah a hngal ngai in zaap i.
Ikhalselai a kote khiah ngathur te ko thawn bang awm?

14 Ziangmanti fangin ostrich in a ti khiah
laipua lakah zam ai laivut songah lum ruai i.

15 Amah in a ti khiah ke in tlawh thai lio le
ramsa in khoi ruai thai lio khiah hih lo i.

16 A fate khiah amah fate lo bangin riahsia ngai in sik i.
Ciamanin a naper hnak khiah a lovang inapui ai
amah in zaikhai poi lo i.

17 Ziangmanti fangin Pathian in fimhnak khiah
pe lo ai lingthiamhnak khai pe lo i.

18 Ikhalselai a dawp tuhin a ko pharh fangin
siphuh le siphuh totu pa khiah hnihcip i.

19 Siphuh khiah thahat ruai thill aw sim?
A hawng khiah sam saungai thawn silh aw sim?

20 Khokhuak bangin lau ruai ben aw sim?
Amahte in rung fangin mite khiah lau ruai i.

21 Rawn zawllai ah a ke thawn laipua khuat i.
A cak ngai manin ang i.
Raaltawng hmunah dungpet in dawp i.

22 Lauhnak khiah zauhsuam ai zaikhai kih lo i.
Vangsau in khai let ruai ben tuh lo i.

23 Conkiang phur hmun bawm khiah a naak ah
feipui le feiniu kawmin thler thliahthlo in phur

24 Thinso ngai in amahte pum khiah hlin kong in
a hmai lam ah dawp i.
Thirhlung aw khiah za fangin ding ngio in
um menma thill lo i.

25 Thirhlung tum sawng fangin cia siphuh in, ‘A ha!’ ti in ti i.
Raaltawng hnak a rim khiah a hla ngai in ling teu i.
Raalbawite ai khuari bang ai auhnak khai za teu

26 Muniu khiah na fimhnak manin zuang thiam im?
Na fimhnak manin hlanglam ah zuang thiam im?

27 Cen mupui tang na ruaihnak in van lam ah
zuang in a sangber hmun a bu sa awm?

28 Mupui khiah khu vumah a bu sa ai
ciata ah zan fangin um i.
Lungsir khiah a raalrelh hmun i.

29 Cia vumin a dawp tuhhnak sa te khiah cul i.
A mit in khua hlapui khai hmu ben i.

30 A fate in a thi te khiah dut ai a rekhnak ramsa
umhmun ah ani khai um ve i.” ti in sawn i.

<<  JOB 39  >>