Job 34

<<  JOB 34  >>

Ciafangin Elihu in,

2 “Ning mifimte, i thu i ngai tuu-ih.
Linghnak nai ningte in ning bil thawn i za tuu-ih.

3 Ziangmanti fangin karuh in rongtep bangin,
bil in khai ponka khiah thiathiam ve i.

4  A hman khiah ling tlang nga sing.
A pha khiah zir tlang nga sing.

5  Ziangmanti fangin Job in,‘Dik i cang i.
Ikhalselai Pathian in i thu khiah
a hman in i khan sah nuam lo i.

I hman napui ai thudon rel i vuah i.
Khelh napui lo ai i urhnak khiah
a bawl thill lo urhnak i.’ ti in rel i.

7  Zauhsuamhnak khiah ti bangin ding ai,

8  A pha lo bawntute thawn rual dun ai vakkhat tu
le  misualte thawn vakkhat tu aisu khiah
Job thawn bang i?

9  Ziangmanti fangin amah in,
‘Pathian thinkhim ruai tuh khiah
zai khai hnempui lo i.’ ti in ti i.

10 Ciamanin ning lingthiam mi ningte in i ngaai tuu-ih.
Pathian in a pha lo bawn lo i.
A Cungnung Pathian in sualhnak khai per lo i.

11 Ikhalselai minungte khiah amahte perhnak bangin rul i.
A nung dan bangin lehsawng tawk ruai i.

12 Pathian in a pha lo rauh in bawn tuh hrimhrim lo i.
Cen a Cungnung Pathian in thuhman khiah
hnawmcan tuh hrimhrim lo i.

13 Aisu in amah khiah laivum uk ruai i?
Laivum pumpuhluk khiah aisu in
amah khiah peng ruai i?

14 Amah in nuam selai, a Ciang Rauhla le
a haihawh khiah amah hnenah lang leh lio selai,

15 Nunhnak naite veksen khiah thi tuh berh ai
minung khiah laivut ah cang leh tuh i.

16 Lingthiamhnak nai leisikhaw, he khiah za tuu-
I ponka khiah ngaai tuu-ih.

17 A hman daih lo pa in mi-uk pha awm?
A hmanber Pa khiah mawhhluk nga i sim?

18 Kumpibawipa hnenah, ‘Zai na fai lo i.’ ti in
rel tuh khiah mawi awm?
Cen mi bawite hnenah tang, ‘Misual i si.’ ti in
rel  mawi awm?

19 Ikhalselai Pathian in mi bawite khiah hmaison lo i.
Cen amah in miliante khiah mi farahte hnak in
zainam cuanglo i.
Ziangmanti fangin amahte khiah
a kut ai bawnhnak ciang i.

20 Amahte khiah cammalak zanseulai in thi i.
Minungte khiah thing ai thi sek i.
Mi upate khiah minung kut hmang lo in lang sio  i.

21 Ziangmanti fangin a mit in minungte lampui khiah hmu i.
A kalsuanhnak khiah a veksenin hmu sah i.

22 Misualte relh hmun tuhin khuathim hmun le
a thimbik nihlim khai um lo i.

23 Amah hmai ah thukhan tuhin mite khiah kawi
tuhin Pathian in minung khiah thuzawt kul lo i.

24 Amah in mi upate khiah thuzong lo pahin
zan sio in seu i.
Amahte umhmun ah mi dang dah i.

25 Ziangmanti fangin amah in amahte perhnak khiah ling sah i.

   Zanlai in amahte khiah lon ai amahte khiah per berh i.

26 Amahte khiah misual bangin,
mi dangte hmai ah beng i.

27 Ziangmanti fangin amahte in amah khiah
hlun lo in let ai a lampui khiah hlun lo manin i.

28 Amahte in farahte kaphnak khiah a hnenah
hleng ruai i.
Ciamanin Amah in anharsa tuartute kaphnak
khiah za sah i.

29 Amah khiah pong lo in um fangin,
aisu in amah khiah mawhhluk thill i?
A hmai khiah thup fangin, aisu in amah khiah
hmu thill i?
Ikhalselai mi phunpui i tu seh, mi pakhat lek i tu seh,
amahte khiah amah in uk i.

30 Ciamanin mihrokhrawl in mite khiah uk tuh lo
ai, minungte khiah zawl tuh lo i.

31 Mi pakhat in Pathian hnenah, ‘I mawh te i.
Sual tuh nawn lo ing.

32 I hmu thill lohnak thu khiah i cuk tu.
A pha lo khiah bawn lengkhaw,
bawn awl tuh lio ing.’ ti in rel selai,

33 Pathian in nangmah khiah,
sir na nuam lo manin,
nangmah daihhnak bangin na tham tuh im?
Cia khiah nangmah in ril kul tuh i si.
Kai in ril thill lo ing. Ciamanin na linghnak i rel tu.

34 Lingthiam mite le i thu i ngaaitu mifimte in,

35 ‘Job in ling lo pui in pong i.
A ponghnak khiah fimhnak um lo i.’ ti in i ti i.

36 Job in misualte bangin sawn manin,
aw Job khiah a ur bik in lo cawh selai!

37 Ziangmanti fangin a sualhnak zolo in
Pathian khiah tawng i.
Hmuhheh kul in kin lakah papabeng ai,
pon tamngai thawn Pathian khiah tawng i.” ti
in rel i.