1 I mit thawn thukham dun zo i ing.
Cia ilekhaw zaimanin fenu niu khiah
sik tuh hnelhno ing?
2 Ziangmanti fangin vancung ai
Pathian hnen in minung te vo khiah ziang i?
Vancung ai a Cungnung Pathian hnenin,
amahte ro khiah ziang i?
3 Hnophnak khiah misualte ca i lo im?
Siathnak khiah a pha lo bawntute ca i lo im?
4 Pathian in i lampui khiah i hmu sah lo im?
I kalsuan khiah a veksenin i siar sah sio lo im?
5 Thudon kong in lamvak lengkhaw,
i ke in mi zawl tuhin a rang in lo vak talekhaw
6 Pathian in a hman ai i nuncan khiah
ling tuhin a hman zazu thawn i teh tu seh.
7 Lam khelh in vak in i mit khiah
hlunin sual ngah lengkhaw,
cen i kut khiah rim ruai ngah lengkhaw,
8 I cii cinghnak khiah mi dangte in lo ei tu seh.
I khawm tuh rongte khiah i phai sah tu sio seh.
9 Nupang pakhat in sual i so in,
i omui pa dawngkham hiangah bawh in
um ta pang lengkhaw,
10 I nu khiah mite rongrial sah tu in lo cang tu seh.
Mi dangte in amah thawn lo itkhat tu seh.
11 Ziangmanti fangin cia khiah zakthi kul i.
Cawhkuan pe tlak sualhnak i.
12 Ziangmanti fangin cia khiah
a vuva ai kang sio tu maisa bang i tuh ai,
i miathnak hmuah i pai sah tuh berh i.
13 Nupang le pasal i hnenumte in
i hnenah thu nai fangin,
amahte thu khiah zainam sah lo in um lengkhaw,
14 Pathian in i zawt fangin,
akontih bangin sawn tuh ing?
I cawh fangin akontih bangin sawn tuh ing?
15 Kin nuu pum songai kin bawntu
Pa in amahte khiah bawn ve lo im?
Amah in a bang ten in
kin nuu pum songah kin mam i lo im?
16 Mi farahte ai caakhnak khiah
pe lo in le hmaitong te mit khiah mal ruai lengkhaw,
17 Cen paa nai lote in ei ngah tuh lo in
kaimah lek in rong khiah ei lio lengkhaw,
18 (Ikhalselai amah khiah a paa bang in cawm ing.
Hmaitong nuu khiah i nuu pum songai
i te pahin konghoi ing.),
19 Sil tuh pon nai lo manin thi tu le
pon sil tuh nai lo mi farah khiah hmu in,
20 Amah khiah i tu hmul thawn
lum ruai napui ai a thin songin
hmuifu i bur hlahlekhaw,
21 Paa nailo pa khiah zung ah
tazacuai in neh thai ling napui in
amah khiah i kut daang in vit lengkhaw,
22 I kut khiah i kodar songin tlok tu lio seh.
A munhmun a kua songin i kut khiah hlaai tu lio seh.
23 Ziangmanti fangin Pathian ai
i hnawmcan tuh khiah i lau rauh i.
A thawm lian ze manin cia bang khiah bawn ngam lo ing.
24 Sui khiah i ummhnak in hmang in,
sui a cit hnenah, ‘Nangmah khiah rin na san ing’
ti in ti ngah lengkhaw,
25 I naperhnak manin milian i cang in
i naihhnak vumah ang ngah lengkhaw,
26 Ni khiah a tlaang teng fangin le
hla khiah a tleu teng fangin bia in,
27 I thinlung khiah a thupniu in sual i sawm in,
i kaa in i kut te khiah amahte bia kongin thut lengkhaw,
28 He khai cawh tlak sualhnak i tuh i.
Ziangmanti fangin cia khiah van vumai Pathian el i cang tuh i.
29 I huatute khiah bawngsia fangin
i ang in cia pa vumah a pha lo hleng fangin
hngal ngah lengkhaw,
30 (Amah khiah awrsia in cam tuhin
i kaa khiah sual siang lo ing.)
31 I inn ai umtu mite in,
‘Job rong thawn kham awng lo tu aisu um pa?’
ti ta hlahselai,
32 (Ikhalselai mikhualte khiah
lamlak ah it kul lo i.
Ziangmanti fangin khual tlawngtute khiah
i dawngkham hon awng ing.)
33 I thin songah i mawhhnak khiah
Adam in a sualhnak thup bang in thup lengkhaw,
34 Mi zapui khiah kih manin le mi innkua tamngai ai
zauhsuamhnak khiah i lau manin,
pong lo niu in um in sumpua ah khai
suak ngam lo in, thup lengkhaw,
35 (Aw, i ngai tu mi pakhat teng um selai!
Kaimah veve ohnak tuhin i ponghnak khiah
hmingthu zo ing. Ciamanin a Cungnung Pathian in
i sawn tu hang seh.
I sualhnak i kawk sahtu pa in
mawh i hlukhnak khiah lai in ngan tu seh.
36 I kodar ah phur ngam tuh rori ing.
Kumpibawi lukhuk bangin khu tuh ing.
37 I kalsuan hmun caang khiah amah rel tuh ing.
Kumpibawi fapa bangin amah hnenah kawi tuh ing.)
38 I loram in kaimah khiah i hau in
a vaihnak lote khiah mithli thawn beh lekhaw,
39 A songai suakhnak rong khiah
a man tham lo in ei in lovaitute khiah lungsia ruai lengkhaw,
40 Lo songah sangvut kung po lo in
hlingkung po tu seh.
Kawlkawn po tahin hampa lo po tu seh.”
ti in rel. Job thurelhnak bo i hang.